Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Icebo Iciweme Ukufuma Kuli BaLesa!

 Isambililo 13

Kani Findo Icebo Iciweme Cilabilapo pa Kupempela?

Kani Findo Icebo Iciweme Cilabilapo pa Kupempela?

1. Kani ukupempela konse kuli lukoso bwino?

Mu kupempela konse muli abantu abafwaya ukupempela baLesa ne mitima ya bucine. Icebo iciweme ca kweba ati baLesa balababona abantu aba kube’fyo kabili balabalama. Pano icakubombomanika ca kweba ati abantu bambi balapyungisha ukupempela ili balukucita ifibipile. (2 AbaKolinto 4:3, 4; 11:13-15) Koti ni fyefyo ifitulishiwa mu malyashi, kumbi ukupempela kulofweleshako abo abepaya abantu abengi ukwakuti pakuti pa kufutukila ubuteko, kulofweleshako ukwikapaya abantu mu nkondo, kabili kulasuminisha ukulukulala abanice mu kubapatikisha ne kubapensha. Mama ifya kube’fyo ifi fibombomanika abafwaya ukupempela baLesa ne mitima ya bucine!—Pendeni Matayo 24:3-5, 11, 12.

Ukupempela kwa cine kulalemya baLesa, pano ukupempela kwa bufi kulabasomesha. Kulasambisha ifitafisangwapo mu Baibolo, ukubikako ne fisambisho fya bufi pali baLesa na pa bafwile. Pano baLesa balafwaya abantu ukwishiba bucine pali bo.—Pendeni Esiceli 18:4; 1 Timote 2:3-5.

2. Kani findo icebo iciweme cilabilapo pa kupempela?

Icakusangalasha ca kweba ati baLesa tabatumpaikwapo ku kupempela ukucita koti kulibatemenwe, pano mu cinenene ukutemenwe icalo cakwe Satana. (Jakobo 4:4) Amashiwi abaLesa aleta ukupempela kwa bufi ati ‘Babiloni Umukulu.’ Ili ishina lyalifumine ku mushi wa kale kuuko ukwatatikiile ukupempela kwa bufi ili Ubulobe bwa mpindi yakwe Noa bwashilile. Bukumo, baLesa bakaleta ukonala ukukaba lukoso kwa kupwalamucila pa kupempela kwa bufi ukupensha abantu.—Pendeni Ukufisulula 17:1, 2, 5, 16, 17; 18:8.

Kuli na fimbi ifi icebo iciweme cilabilapo. BaYehova tababalubileko abantunshi abo abafwaya ukupempela bo ne mitima ya bucine pano abali mu kupempela kwa bufi ukulekenelekene  mu calo conse. Balukubekatanya ukupitila mu kubasambisha bucine.—Pendeni Mika 4:2, 5.

Ukupempela kwa cine kulukwikatanya abantu

3. Kani findo abantu abafwaya ukupempela baLesa ne mitima ya bucine belelwe ukucita?

BaYehova balalama abantu abatemenwe bucine ne fiweme. Balafwaisha makosa ati bafumemo mu kupempela kwa bufi. Abantu abatemenwe baLesa balalitemenwa ukucita koti ni fyopele’fyo bababuula baLesa pakweba ati babasangalashe.—Pendeni Ukufisulula 18:4.

Mu mpindi ya basambile ba kutanga, abantu abalukufwaya ukupempela baLesa ne mitima ya bucine ili baumfwile icebo iciweme ukufuma ku basambile, balisangalele. Balisambilile amekalilo aaweme ukufuma kuli baYehova, amekalilo aakusangalasha, aamashuko ne bucetekelo. Cakubwenako iciweme kuli fwebo buno bukumo pakuti ili baumfwile icebo iciweme balibikile baYehova pantangiile mu myeo yabo.—Pendeni 1 AbaTesalonike 1:8, 9; 2:13.

BaYehova balabapokelela mu cisoolo cabo abo abafumamo mu kupempela kwa bufi. Kani muketabe ku kwita kwa baYehova, mukaba icibusa cabo, mukasangana icisoolo ca butemwe ica baabo abapempela baYehova, kabili mukekala umuyayaya.—Pendeni Mako 10:29, 30; 2 AbaKolinto 6:17, 18.

4. Kani baLesa bakacita shani pakweba ati abantu bonse mu calo bakasangalale?

Ukusololola ukulukwisa pa kupempela kwa bufi cebo iciweme. Kukashilisha amakatasho mu calo conse. Ukupempela kwa bufi takukatumpaikapo abantu nakabili neli ukubalekanya. Bonse abakalukuliko pali yeyo mpindi bakekatana mu kupempela baLesa bacine bamo lukoso.—Pendeni Ukufisulula 18:20, 21; 21:3, 4.