Tolokeleni

Tolokeleni muye pa filukusangwamo

 Isambililo 11

Kani Amashiwi AbaLesa Alatutangilila Shani?

Kani Amashiwi AbaLesa Alatutangilila Shani?

Kani amafunde amu Baibolo alatofwako shani ukubulo’kucita ifingaleta amakatasho ku mweo wesu neli uwa bantu bambi?—AMASAMO 36:9.

1. Mba nindo twelelwe ukutangililwa?

Abalengeshi besu ba mano ukutucila. Pakuti ni baWishifwe ababutemwe, balatulama. Nakabili, takwalipo kufwaya kwabo ati tulukulyendela lukoso. (Jelemiya 10:23) Popele, koti ni fyopele filya abana belelwe ukutangililwa ku bafyashi babo, na fwebo fwense tulyelelwe ukutangililwa na baLesa. (Yisaya 48:17, 18) Amafunde amu Baibolo alatutangilila kabili iyi ni mpese ukufuma kuli baLesa.—Pendeni 2 Timote 3:16.

Amafunde aba Yehova alatusambisha ifya kwikala amekalilo aaweme buno bukumo ne kutulangisha ifi tungapoka amalambulo amuyayaya kuntangiile. Pakuti baLesa ebatulengele, balyelelwe ukutupeela amafunde kabili na fwebo tulyelelwe ukualonda ayo amafunde.—Pendeni Amasamo 19:7, 11; Ukufisulula 4:11.

2. Kani Amashiwi abaLesa alatutangilila shani?

Bumbi bucine bwa mu Baibolo bulatulangisha ifi baLesa bafwaya ati tulukucita mu fintu ifilekenelekene. Ambi amafunde alatubuula ifyakucita pa fintu ifiishibikilwe apaswetele. (Ndutelonomi 22:8) Tulyelelwe ukucenjela, neli ukubikako akalango ukumfwisha ifi bucine bwa mu Baibolo bulukutubuula ukucita. (Ifisimpi 2:10-12) Ku cakubwenako, Baibolo ilatusambisha ati umweo ni mpese ukufuma kuli baLesa. Ubo bucine bungatutangilila ili tuli ku milimo, pa ŋanda, kabili na lyelyo tulukwenda na motoka neli kani ni ncinga. Kani twaanuka bucine bwa kweba ati umweo ni mpese, tatukacitapo ifingabika umweo wesu neli uwa bantu bambi mu kukatashiwa.—Pendeni Ifyacitilwe 17:28.

3. Kani niesa amafunde obilo aacilile ubukulu?

BaYesu baalilabile amafunde obilo aacilile ubukulu. Ilya kutanga lilafisulula umulandu fwe bantunshi twalengeelwe. Twalilengelwe  ati tubeshibe baLesa, tulukubatemwa, ne kulukubapyungila mu bucetekelo. Tulyelelwe ukwalakanyapo pali lili ifunde lya kutanga ili tulukusalululapo ifyakucita ifili fyonse lukoso. (Ifisimpi 3:6) Abo abacita ifyelelwe na lili ifunde balakwata bucibusa na baLesa, balaba ne kusangalala ukwinenene, kabili bakaba ne mweo wa muyayaya.—Pendeni Matayo 22:36-38.

Ifunde lya bubili lingatutangilila mu kukwata bucibusa ubuweme ne bantu bambi. (1 AbaKolinto 13:4-7) Ukupyungisha ili ifunde lya bubili kulisankenemo ne kutuntulula inshila baLesa bacitilamo ifintu ku bantunshi.—Pendeni Matayo 7:12; 22:39, 40.

4. Kani tulashukilamo shani mu mafunde abaLesa?

Amafunde abaLesa alasambisha aba mu fisoolo ifi bangekatana mu butemwe. (AbaKolosai 3:12-14) Nakabili, Amashiwi abaLesa alalama ifisoolo pakuti alasambisha bucine ubungatutangilila. Ubu bucine bwa kweba ati icupo cilyelelwe ukulukuliko inshiku shonse.—Pendeni Ifyakutaŋga 2:24.

Pa kulukulonda ifi Baibolo isambisha, tungalama ifi tukwete ifya ku munefu ne kulanguluka kwesu. Ku cakubwenako, abengisha imilimo impindi ishingi balafwaya abapyungishi abalonda ifi Baibolo isambisha ukweba ati abantu balyelelwe ukuba aba bucine neli abaweme mu fintu fyonse kabili abapyungisha ukwakuti. (Ifisimpi 10:4, 26; AbaEbeya 13:18) Amashiwi abaLesa nakabili alatusambisha ukweba ati tulukumfwa ati tuli ne fintu ifyakutukumana ifyelelwe kabili ati tulukulemya bucibusa bwesu na baLesa ukucila pa fintu ifya ku munefu.—Pendeni Matayo 6:24, 25, 33; 1 Timote 6:8-10.

Ukulonda amafunde abaLesa kungalama umweo wesu. (Ifisimpi 14:30; 22:24, 25) Ku cakubwenako, ukulonda ifunde lya baLesa ilikaanya ukupendwa kungatulama ku kubulo’kulwala amalwashi aabipile na ku kucita ifingaleta ukukatashiwa. (Ifisimpi 23:20) BaYehova balitusuminishe ukunwa ifyakunwa ifilengesha abantu ukupendwa pano tulyelelwe ukulinga. (Amasamo 104:15; 1 AbaKolinto 6:10) Tulashukilamo mu mafunde abaLesa pakuti alatusambisha ati tulyelelwe ukulama ifi tucita ne kulanguluka kwesu. (Amasamo 119:97-100) Nangabe’fyo, abaKlistu bacine tabalondapo lukoso amafunde abaLesa pakuti balashukilamo, koku. Sombi balacita fyopele’fyo ni pakuti balafwaya ukulukulemya baYehova.—Pendeni Matayo 5:14-16.