Tolokeleni

Tolokeleni muye pa filukusangwamo

 ICIPUTUSHA 3

Ukusomeshiwa Umutima—“Kani Umbi Ali ne Mulandu pa Mubyakwe”

Ukusomeshiwa Umutima—“Kani Umbi Ali ne Mulandu pa Mubyakwe”

BaLinda kabalabila ati: “Umukwabesu umwanakashi uutwalukubungana nakwe alimbepeshe ati nalimwibile’ndalama. Abakwabesu bambi abaumfwileko balibwene ati fya cine nalibile. Mukupita kwa mpindi, uyu umukwabesu umwanakashi alimbuulile ati talipo ninebo naibile. Nangaba ati alilombele ukumufitulukilako, nshalukufwayapo ukumufitulukila pakuti pa kumbifisha ishina lyanji.”

KANI umukwabenu mupempela naye alingamusomeshenipo umutima koti nifyefyo caali kuli baLinda? Ku cakubombomanika, ili ifyakube’fi fyacitika, abengi balabombomana kabili cilabalengesha ne kubula ukupyunga bwino ifya baLesa. Kani ifi efi cili na kuli mwebo?

Ninani ‘Uukatulekanya ku Butemwe bwa BaLesa’?

Pakuti pa kufiitwa cingaba icikosele ukufitulukila umukwabesu uwatubifishe. Ukuba, abaKlistu balyelelwe ukutemwanshanya. (Yoane 13:34, 35) Pano uutupempela naye kani atubifya, tulalengeshiwe’nsoni kabili tulasomenwa ukwakuti.—Amasamo 55:12.

Fya cine, Baibolo ilalabila ati kulaba impindi ili umuKlistu angaba ne fyakulitamasha neli ukuba “ne mulandu pa mubyakwe.” (AbaKolosai 3:13) Nangabe’fyo, ili cacitika kuli fwebo pa lwesu, cingaba icikateshe ukupyungilapo. Kani kulipo ifingatofwako ukupyungilapo? Boneni ukufunda kutatu ukwa mu Malembo:

Bawishifwe Abakwiulu Balishi Ifintu Fyonse. BaYawe balabona fyonse ificitika, ukubikako ne fisendeme fyonse ifitucitikila ne kukatasha fileta pali fwebo. (AbaEbeya 4:13) Nakabili, baYawe balomfwa ububi ili tulukupenga. (Yisaya 63:9) Tabasuminishapo “ukukululuka neli amakatasho” neli icili conse ukubikako ne bapyungishi babo ‘ukutulekanya ku butemwe bwa baLesa.’ (AbaLoma 8:35, 38, 39) Penka nafwebo tungabatenteka ukubula ukuleka icili conse neli uuli onse ukutulekanya na baYawe.

Ukufitulukila Talipo ati Kusuminisha Bumbifi. Ili twafitulukila abatubifishe, ninshi talipo ati tulukucefya ifi bacitile neli ukusuminisha bumbifi. Anukeni ati baYawe balipatile ukubifya, nangaba ati balafitulukila kani pali umulandu wakucitile’fyo. (Amasamo 103: 12, 13; Abakuci 1:13) Ili baYawe balukutukoselesha ukufitulukila bambi ninshi balukufwaya ati tulukubatenteka. Nipakuti ‘tabapitilishapo ukufiitwa inshiku shonse.’—Amasamo 103:9; Matayo 6:14.

Ili twafitulukila bambi tulabwenamo. Tulabwenamo shani? Alakanyeni pali fifi. Mwaimya ibwe ili talilemenepo ne kulema, mwalikata ne maboko yenu. Tamukatashiwepo makosa ukulikata pa mpindi inini. Mba pano kani mwaesha ukuliimya pa mpindi iitali? Ni pa mpindi ya kuba shani mungapitilisha ukulikata—kani ni pa mamineti? Kani ni pe awala limo? Neli ukucilapo? Ukwakubula ukukanika, mungakatala ukwakuti! Fya cine ukulema kwe bwe ni kwenka kulya, takwalukilepo. Pakuti mwalimya pa mpindi iitali ecingalengesha ukukatala. Efi cingaba nalyelyo mwafiitwa. Ukupitilisha ukufitwa pa mpindi iitali nangaba ati ni pa mulandu uunini, e kungalengesha ukusomenwa kwesu ukucilamo. E mulandu kanshi baYawe batukoselesesha ukufitulukila ababyesu. Mucinenene  ukucite’fyo kulibeleleko ku bune bwesu.—Ifisimpi 11:17.

Ili twafitulukila bambi tulabwenamo

“Nalyumfwile Koti ni BaYawe Ebalukulabila Kuli Nebo”

Cindo caofweleko baLinda ukubula ukufiitwa pa mpindi iitali ili bababifishe ku mukwabo bapempela naye? Pali fyefyo bacitile paali ne kwalakanya makosa pa mulandu Amalembo atubuulila ukufitulukila. (Amasamo 130:3, 4) BaLinda calibakoseshe ukwishiba ati kani bafitulukila abantu bambi, eli baYawe nabo bangabafitulukila. (AbaEfesa 4:32–5:2) Ukulosha kuli fyefyo bakutulukile pa kupenda Baibolo baLinda kabalabila ati: “Nalyumfwile koti ni baYawe ebalukulabila kuli nebo.”

Mu kupita kwa mpindi, baLinda balilekele ukufitwa. Kabili mukukakuluka balimufitulukile uwabasomeshe, kabili ino mpindi e cibusa cabo icipalamishe. BaLinda balipitilishe ukupyungila baYawe. Mwane ishibeni ati baYawe balukufwaya ukumofweniko na mwebo pakweba ati mungacita koti ni baLinda.