Tolokeleni

Tolokeleni muye pa filukusangwamo

 ICIPUTUSHA 4

Ukulyumfwa Uwa Mulandu—“Munsweshe mu Kubifya Kwandi”

Ukulyumfwa Uwa Mulandu—“Munsweshe mu Kubifya Kwandi”

BaMartha balilabile ati: “Imilimo natatikile ukupyunga yalilengele ubwikashi bwa cisoolo canji ukuwama, pano yalindengeshe ukutatika ukucita ifintu ifitafisuminishiwepo mu malembo. Nalitatikile ukucita ifitenje fya maolide, ukucita ifya mapolitiki, ne kuya lukoso ku calici. Nalilekele ukupyunga bwino ifya baYawe pa myaka 40. Ili imyaka yalukuya ili ipita, eli nacililemo ukulanguluka ati baYawe tekuti bamfitulukilepo neli panini. Nshalukulangulukapo ati ningafitulukilwa. Nipakuti nalishibile ati ifi nalukucita kwali kubifya.”

UKULYUMFWA uwa mulandu cipinto icikulu. Imfumu Dafidi yalilabile ati: “Pakuti ifya kusendama fyanji fyapuuta na pa mutwi wanji: Koti cipinto icilemene fyankanga ukufipinta.” (Amasamo 38:4) AbaKlistu bambi balakatashiwa makosa pa kulukwalakanya pali fyefyo baabifishe, ukubona koti baYawe tekuti babafitulukilepo. (2 AbaKolinto 2:7) Kani efi cili na kuli mwebo? Kani mulomfwa ati mulitalamukile makosa kuli baYawe icakuti tekuti bamufitulukilenipo pa kubifya ukukulu mwacitile? Koku mwane, mungapalamina kuli bo!

“Ngatulyambawishe Pamo”

BaYawe tabafutatilapo abalapila. Nacine balapalamina ku bakube’fyo! Mu cakupalanya ca mwana uwalubile, baYesu balipalenye baYawe ku mufyashi uwa butemwe uwali ne mwana uwashiile icisoolo cakwe ne kuya mu kwikala ubwikashi bwa bungwa. Mukupita kwa mpindi, umwana alisalulwilepo ukubwela ku bafyashi bakwe. “Sombi ili acili ukutali, bawishi balimubwene, ne kuba ne nkumbu, ne kubutuka, ne kumukumbata na mu mukoshi, ne kumufyonta.” (Luku 15:11-20) Kani mulafwaya ukupalamina kuli baYawe, pano mulomfwa ati ‘mucili ukutali’ na kuli bo? Koti mufyashi mu cakupalanya ca baYesu, baYawe bangamubeleni inkumbu na mwebo. Balafwaisha ukumupokeleleni ili mwabwela.

Pano mungacita shani kani mulomfwa ati ifyakubifya fyenu filicililemo ubukulu ica kweba ati baYawe tekuti bamufitulukilenipo? Twamukombeteleni ukubono’bwite bwa baYawe pali Yisaya 1:18 apalabila ati: “Iseni lomba, ngatuliambawishe pamo fwebene na bene; nangaba’ti ukubifya kwenu kulikashikile cee, kukatuba tuu koti candwa; nangaba’ti kuli cee koti milopa, kukaba koti masako ambelele ukutuba.” Fya cine, nangaba ati ukubifya kwenu kwakashika cee koti fikashikile ifyaponena pa cakufwala icitubile, baYawe tekuti bafilwepo ukumufitulukileni.

BaYawe tabafwayapo mwebo ukupitilisha ukulukupenshiwa muli cimanga. Nga pano, lomba mungacita shani pakweba ati mufitulukilwe kuli baLesa ne kuba na cimanga umuswetele? Boneni ifintu fibili ifi Imfumu Dafidi yacitile. Icakutanga, alilabile ati: “Nalisumine kuli mwebo ifyakubifya fyanji.” (Amasamo 32:5) Anukeni ati baYawe balimwitileni kale ati mulukutembela kuli bo ne ‘kulyambawisha pamo’ nabo. Sumineni ubu ubwite. Fisululeni ifyakubifya fyenu kuli baYawe, kabili babuuleni ifi mulukumfwa. Pakuti pali fyefyo apitilemo, Dafidi alitembeele mu kucetekela ati: ‘Munsweshe mukubifya kwanji. . . . Umutima uubombomene uwakulapila tamukaupufya, mwe baLesa.”—Amasamo 51:2, 17.

Ica bubili, Dafidi alipokelele ukofwewa ukufuma ku wakushimika Natani, uwalukwimakaninako baLesa. (2 Samweli 12:13) Pali bulelo, baYawe balitupeele abakulu ba mwi kelesha abasambishiwe bwino ifyakofwako abalapila ukuba ifibusa fya  baYawe. Ili mwaya ku bakulu ba mwi kelesha, bakapyungisha Amalembo ne kutembelela pamo na mwebo pa kumofweniko ukuba abaswetele ku mutima, ukucefyako neli ukufumyapo ifili ku mutima, ne kumofweniko ukupola mu fya baLesa.—Jakobo 5:14-16.

BaYawe balafwaya mwebo ukuba na cimanga umuswetele

“Alishukile uyo Ukupulaisha Kwakwe Kufitulukilwe”

Fya cine, mungomfwa ati ukufisulula ifyakubifya fyenu kuli baYawe Lesa ne kubona abakulu ba mwi kelesha fili pa fintu ifikateshe ukucita. Na Dafidi e bukatasho akwete. ‘Alikutumene’ pa mpindi imo, ukwakubula ukufisulula ukubifya kwakwe. (Amasamo 32:3) Pano, nangabe’fyo, alibwenenemo mu kufisulula ukubifya ne kulungika inshila shakwe.

Ukubwenamo ukukulu Dafidi akwete kwa kweba ati alibele ne kusangalala. Alilembele ati: “Alishukile uyo ukupulaisha kwakwe kufitulukilwe, ne kubifya kwakwe nako ne kufimbwapo.” (Amasamo 32:1) Nakabili alitembele ati: ‘Mwe baYawe, mungasamune pa kanwa kanji, eli kakalangisha ukulukumucindikeni.’ (Amasamo 51:15) Ili bamufitulukile kabili na pa kutoota ubune bwa baLesa ubwakufitulukila, Dafidi alikoshiwe ukubuulako bambi pali baYawe.

BaYawe balafwaya mwebo ukuba na cimanga umuswetele. Kabili balafwaya mwebo ukutulisha kuli bambi pali bo ne kufwaya kwabo, ukwakubula ukulyumfwa aba mulandu, sombi ukucite’fyo ne mutima uusangalele. (Amasamo 65:1-4) Anukeni ubwite bwabo ubwa kufwaya ‘ati ifyakubifya fyenu fishimangane; fyopele’fyo shikese impindi shakukosa isha kufuma kuli baYawe.’—Ifyacitilwe 3:19.

Ifi efyacitikile kuli baMartha. Balishimikile ati: “Umwana wandi alipitilishe ukuntumina Makashini ya Akatambo ka Wakulama na Loleni! Panini panini, nalitatikile ukubwela kuli baYawe. Icankateshe makosa pa kubwela kuli baYawe, kulomba ukufitulukilwa pa kubifya kwanji konse uku nabifishe. Pano mukupelako, Nalitembeele kuli baLesa ne kubalomba ukumfitulukilako. Cikateshe ukusumina ati paalipitile imyaka 40 ilinshingabwela kuli baYawe. Ndishininkishe ati nangaba ati papita imyaka iya kuti ubwingi, umuntu angakwata ishuko lya kupyungila baYawe ne kuba mu butemwe bwabo nakabili.”