Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Bweleni Kuli BaYawe

 ICIPUTUSHA 1

“Nkafwaya-fwaya Iyalubile”

“Nkafwaya-fwaya Iyalubile”

Alakanyeni pali cici, ili imbelele ilukulya ifyani, panini panini yafuma pa shibyakwe. Popele yaleka ne kubona ukuli umwembeshi ne mbelele shibyakwe. Bwaila ne kwila. Yalubila mu mukolo umuli ifilwani, kabili tapapo abakuipulusha. Mukupelako, yaumfwa ishiwi lya mwembeshi, uulukubutukila ukuli imbelele, aibuula, kabili aipambanya mu cakufwala cakwe ne kuipinta ku ng’anda.

BAYAWE impindi ishingi balalipalanya ku mwembeshi wakube’fyo. Muli Baibolo balatukosha ati: ‘Boneni, nebo ne mwine, nkashifwaya-fwaya imbelele shanji, ne kushilama.’—Esiceli 34: 11, 12.

“Imbelele sha mu Minwe Yandi”

Kani imbelele sha baYawe ni shiisa? Tungalabila ati ni babo abatemenwe ukupempela baYawe. Baibolo ilalabila ati: ‘Kamwisa, ngatubacindike, tubalambile; ngatufukame pa menso abaYawe abatulengele. Pakuti bo ni baLesa besu, fwebo tuli bantu ba pa cembelelo cabo, tuli mbelele sha mu minwe yabo.’ (Amasamo 95: 6, 7) Koti ni filya imbelele ilonda umwembeshi, abapempela baYawe balafwaisha ukulonda abembeshi babo. Kani bawaminine? Koku. Abapyungishi ba baLesa impindi shimbi ‘balipalanganishiwe,’ ‘balilubile,’ popele “koti ni mbelele ishilukulilufya.” (Esiceli 34:12; Matayo 15:24; 1 Petilo 2: 25) Nangabe’fyo, ili umuntu aya ili afuma kuli baLesa panini panini, BaYawe balacetekela ati kambi kasuba akabwela.

 Kani mucili mulomfwa ati baYawe bacili bembeshi benu? Kani baYawe balalangisha shani ati bembeshi pali bulelo? Langulukeni pali shishi inshila shitatu:

Balatupeela ifyakulya fya ku mupashi. BaYawe kabalabila ati: ‘Nkashilisha pa fyembelelo ifiweme, shikalala mu cimpata iciweme; shikalukulya pa fyembelelo fya nkandashi pa mapili aku Ishilaeli.’ (Esiceli 34: 14) BaYawe tabangafilwapo ukutupeela ifyakulya fya ku mupashi ifipusenepusene ifiisa pa mpindi iyelelwe. Kani mungaanuka ilyashi, neli vidyo iyaasukile itembelo mwatembeele ati bamofweniko? Tali ici calimushinineni ati baYawe balamulameni mwebo pa lwenu?

Balatulama ne kutofwako. BaYawe balilaile ati: ‘Nkabwesha iyalubile, ne kukakapo iikonokele, ne kukosha iilwele.’ (Esiceli 34:16) BaYawe balakosha abanakile neli ababamba mu mitima ku fyakukatasha. Balakaka ishikonokele, ukushofwako ukutenduluka ku fyakusomenwa—cipale ifingafuma na ku baKlistu babyabo. Kabili balabwesha ishilubile na shesho cipale ishikatashiwa ne malangulushi aabipile.

Balishi ati ebelelwe ukutulama. BaYawe kabalabila ati: ‘Nkashipulusha ponse apo shapalanganishiwe, nkafwayafwaya iilubile.’ (Esiceli 34: 12, 16) Kuli baYawe imbelele iyaluba talipo ati ninshi cashila bailubako. Baleshiba ili imbelele yaluba, balaifwayafwaya kabili ili baisangana balasangalala. (Matayo 18: 12- 14) Baleeta ababapempela ati ‘imbelele shanji, imbelele sha mu minwe yandi.’ (Esiceli 34:31) Muli pali shesho imbelele.

Kuli baYawe imbelele iyaluba talipo ati ninshi cashila bailubako. Balasangalala kani imbelele yabwela

‘Tucitileni Inshiku Shesu Koti Shakale’

Nindo baYawe balukumufwaya-fwaileni ne kumwiteni ati mubwelele kuli bo? Nipakuti balukufwaya ati mube abasangalele. Balilaile ati ‘amashuko akaloka koti ni mfula” pa mbelele shabo. (Esiceli 34:26) Uku talipo kulaya kwa lukoso. Mulilibwenene ubushininkisho bwa mashuko ambi.

Anukeni ifi caali ili mwaishibile baYawe pa kutanga. Ku cakubwenako, mwalyumfwile shani ili mwaishibile bucine pe shina lya baLesa ne kufwaya kwabo pa bantunshi? Kani mwaanuka ifi caali icakusangalasha ili mwabele pamo ne baKlistu babyenu pa kubungana ukukulu? Ili mwatulishe icebo iciweme ku muntu uwafwaishe ukukutikisha, tali mwalibwelele ku ng’anda abasangalele?

Mungaba abasangalele naino mpindi koti nifyefyo caali. ‘Mutwalwile kuli mwebo, mwe baYawe; eli tukaalululwa; tucitileni inshiku shesu koti shakale.’ (Imisowa yakwe Jelemiya 5:21) BaYawe balyasukile ili itembelo, kabili abantu babo balitatikile ukubapyungila mu kusangalala nakabili. (Neyamiya 8: 17) BaYawe efibakacita na kuli mwebo.

Cipubile ukulabila ati nkabwelela kuli baYawe, pano ukubwelela kukateshe. Boneni amakatasho aabapo pa kubwelela kuli baYawe kabili na fyefyo mungaashilisha pa kubwelela.