Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Bweleni Kuli BaYawe

 ICIPUTUSHA 5

Bweleleni ku ‘Mwembeshi wa Myeo Yenu’

Bweleleni ku ‘Mwembeshi wa Myeo Yenu’

Kani na mwebo mulipitilepo mu makatasho aalabilwapo muli kakano akabuuku? Kani mulipitilemo, ishibeni ati talipo ni mwebo mwenka. Abapyungishi ba baLesa abengi—abaaliko mu mpindi ili Baibolo yalukulembwa ne baino mpindi—bonse balapita mu makatasho akube’fyo. BaYawe bangamofweniko ukushilisha amakatasho koti nifyefyo baofweleko abapyungishi babo abakale.

BaYawe bakamofweniko ukubwela kuli bo

 ISHIBENI ati baYawe bakamofweniko ukubwela kuli bo. Bakamofweniko ukwishiba ifi mungacefyako ukubamba mu mutima, ukusomeshiwa umutima ne kubulo’kupenshiwa mu mutima pakuti pakuba na cimanga umuswetele. Namulifyefyo mungatatika nakabili ukupyungila baYawe pamo ne bapyungishi babyenu. Ifi mulukupitamo fingapalana ne fibaapitilemo abaKlistu bakutanga bamo, babo intangishi Petilo alembeele ati: “Mwebo mwali koti ni mbelele ishilukulilufya, sombi bukumo mulibweleele ku mwembeshi eku cilolo ca mitima yenu.”—1 Petilo 2:25.

Ukubwela kuli baYawe ecintu iciweme ici mwelelwe ukucita. Pakuti pando? Eli mungasangalasha baYawe. (Ifisimpi 27:11) Koti nifyefyo mwishi, ifitucita fingalengesha baYawe ukusangalala neli ukufitwa. Nangabefyo baYawe tabatupangilishapo ukubatemwa ne kubapyungila. (Ndutelonomi 30:19, 20) Umuntu uusambilile pa fya mu Baibolo alibuulishishe ici cebo muli iyi nshila ati: “Umutima wa muntu uli koti ciibi icitacisuukilapo posonde sombi mukati.” Ili twasalululapo ukupyungila baYawe pakuti pa kubatemwa cilaba koti twaisula ico iciibi. Ili twapyunga muli yeyo nshila, tulabapeela impese iiweme, ekweba ati bucine bwesu kulibo—kabili tulabalengesha ukusangalala ukwakuti. Mucinenene, takupo cimbi icingatulengesha ukusangalala ukucila pa kupyungila baYawe mu nshila iyi bafwaya.—Ifyacitilwe 20:35; Ukufisulula 4:11.

Ukulunda pali fyefyo, kani mwatatika nakabili ukupyungila baYawe, mukakwata ifimupengela mu fya baLesa. (Matayo 5:3) Muli iisa nshila? Abantu mu calo conse balepusha ati: ‘Mba nindo tubelele pa calo?’ Balafwaisha makosa ifyasuko ku fyakwipusha ifilabila pa mweo. Tulapengela ifya baLesa ni pakuti baYawe efibatupangile. Baalitupangile ati tulukusangalala ili tulukubapyungila. Takupo cimbi icitusangalasha ukucila pakwishiba ati tulukupyungila baYawe pakuti pa kubatemwa.—Amasamo 63:1-5.

Mwane ishibeni ati baYawe balafwaya mwebo ukubwela kuli bo. Nindo twalabilile fyo? Alakanyeni pali cici: Ili tabangalemba kano akabuuku balitembelelepo makosa. Cipale mwalipokelele aka kabuuku ku bakulu ba mwi kelesha neli ku mu Klistu mubyenu. Kabili mwalitemenwe ukukapenda ne kupyungisha ifimwapendelemo. Fyonse fi filukulangisha ati baYawe balamwanukeni. Mucinenene, balukumukulileni kuli bo mukutekanya .—Yoane 6:44.

Tungakoshiwa ukwishiba ati baYawe balanuka abapyungishi babo abalekele ukubapyungila. Ici ecakoseshe inkashi yesu Donna. Kailabila ati: Panini panini kantatika ukuleka bucine, pano impindi ishingi nalukusangana ati ndukwalakanya pa mashiwi aali pa Masamo 139:23, 24, apalabila ati: ‘Muncentanishishe, (neli Mufwaya-fwaye muli nebo) mwe baLesa, mwishibo’mutima wanji: Mungeshe, mwishibe ukwalakanya kwanji, mubone kani muli nebo muli inshila yakubifya, muntangilile mu nshila ya muyayaya.’ Nalishibile ati nshaelelwepo ukulukucita ifya muli cici calo—nshinaelelwepo ukuba muli co—kabili nalishibile ati nalyelelwe ukuba lukoso mukwanshika kwa baYawe. Nalitatikile ukubona ati baYawe tabalubileko kuli nebo; Nalukupengela lukoso ukubwela kuli bo. Kabili ndisangalele pakuti ndibwelele kuli bo!”

“Nalitatikile ukubona ati baYawe tabalubileko kuli nebo, nalukupengela lukoso ukubwela kuli bo

Tulukutembela ati na mwebo mukatatike nakabili ukulitemwesha “ ukusemba kwa baYawe.” (Neyamiya 8:10) Mukalitemwesho’kwakuti pakubwela kuli baYawe.