Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Kani Findo Baibolo Muli Bucine Isambisha?

 ICAPITALA 18

Ukubatishiwa Kulakosha Bucibusa Bwenu na BaLesa

Ukubatishiwa Kulakosha Bucibusa Bwenu na BaLesa
  • Kani umuntu balamubatisha shani pakuti abe umuKlistu?

  • Nifisa fintu mwelelwe ukucita pakweba ati mufikepo pa kubatishiwa?

  • Kani umuntu alalituula shani kuli baLesa?

  • Mba niwisa mulandu uulibelele woyo mwelelwe ukubatishiwa?

1. Mba nindo icilolo ca mwi solololo ica kwi Etiopia calombeele ukubatishiwa?

“BONENI, amenda ŋga! Cindo icakuŋkanya ŋga nabatisiwa?” Uwaipwishe’fyo aali cilolo ca mwi solololo ica ku Etiopia mu mpindi ya basambile. UmuKlistu uwalukwitwa ati Filipo alimulangishe uyo umuEtiopia ati baYesu e baali ni  baMasaya abalailwe. Pakuti ifi asambilile mu Malembo fyalimufikile pa mutima, umuEtiopia alipyungilepo fimo. Alilangishe ati aalukufwaya ukubatishiwa!—Ifyacitilwe 8:26-36.

2. Mba nindo mwelelwe ukwalakanyapo ukwakuti pa kubatishiwa?

2 Kani mulisambilile bwino amacapitala akutanga aalilino ibuuku na Bamboni sha baYehova, cipale mungomfwa ati mwalyanshika ukwipusha ati, ‘Cindo ica kunkanya nebo ukubatishiwa?’ Ukufika pali ino mpindi mulisambilile pa kulaya kwa mu Baibolo ukwa kukwata umweo wa muyayaya mu Paladaiso. (Luku 23:43; Ukufisulula 21:3, 4) Mulisambilile na pa mibelo ya cinenene iya bafwile na pa bucetekelo bwa kubuka. (Uwakutulisya 9:5; Yoane 5:28, 29) Cipale mulabungana pamo na Bamboni sha baYehova pa kubungana kwabo ukwa mwi kelesha kabili mulilibwenene ifi bacita ifya mu kupempela kwa cine. (Yoane 13:35) Ne cintu icicindeme ukwakuti, cipale mulitatikileko ukukusha bucibusa bwenu na baYehova Lesa.

3. (a) Kani findo baYesu bafundile abasambile babo? (b) Kani umuntu balamubatisha shani?

3 Kani mungalangisha shani ati mulukufwaya ukupyungila baLesa? BaYesu balibuulile abasambile babo ati: “Kamuyeni . . . mukalukusambisya imisyobo yonse yabantu, nekubabatisya.” (Matayo 28:19) BaYesu abene balilangishe icakutuntululako ili babatishiwe mu menda. Tababaminshilepo lukoso amenda, kabili tababetiilepo lukoso amenda pa mutwi. (Matayo 3:16) Ishiwi lya kweba ati “batisha” lilifumine kwi shiwi lya ciGiliki ilyalula ati “ibisha.” Pakuti pali fyefyo, umuKlistu pa kumubatisha balamwibisha onse umubili mu menda.

4. Kani ukubatishiwa mu menda kulalangishe’ndo?

4 Ukubatishiwa kulapengelwa kuli bonse abo abalukufwaya ukuba ifibusa fya baYehova Lesa. Ukubatishiwa kulalangisha apaswetele ati mulukufwaya ukupyungila baLesa. Kulalangisha ati mwasangalala ukucita ukufwaya kwa baYehova. (Amasamo 40:7, 8) Nangabe’fyo, pakweba ati mufikepo pa kubatishiwa, mulyelelwe ukucite’fintu na fimbi.

 UKWISHIBA NE BUCETEKELO EFIPENGELWA

5. (a) Nicisa cintu ica kutanga mwelelwe ukucita pakweba ati mufikepo pa kubatishiwa? (b) Mba nindo ukubungana kwa mwi kelesha kucindamine?

5 Mulitatikileko kale ukucita icintu ca kutanga. Kani mulicitile shani ifyo? Cipale ukupitila mu kusambilila Baibolo ne munkonsha, mulitatikileko ukubeshiba baYehova Lesa na baYesu Klistu. (Pendeni Yoane 17:3) Pano kuli ifingi ifya kusambilila. AbaKlistu balafwaya ‘ukwisulamo ne kwishibisha ukwa kufwaya kwabo baLesa.’ (AbaKolosai 1:9) Ukusangwako ku kubungana kwa mwi kelesha ukwa Bamboni sha baYehova kukamofweniko makosa ukucite’fi. Cicindeme ukusangwako ku kubungana ukwa kube’fyo. (AbaEbeya 10:24, 25) Ukusangwako impindi shonse ku kubungana kukamofweniko ukufusha ukwishiba kwenu pali baLesa.

Ukwishiba ukulungeme ukwa Mashiwi abaLesa cintu icicindeme pakweba ati mufikepo pa kubatishiwa

6. Fyakuti shani ubwingi mwelelwe ukwishiba ifya mu Baibolo pakweba ati mufikepo pa kubatishiwa?

6 Nacine, talipo ati mulyelelwe ukwishiba fyonse lukoso ifili mu Baibolo pakweba ati mufikepo pa kubatishiwa. Icilolo ca mwi solololo ica ku Etiopia caliishiko fimbi, pano calukufwaya ukucofwako pakuti cumfwishe na fimbi ifya mu Malembo. (Ifyacitilwe 8:30, 31) Fyopele’fyo, mucili ne fya kusambilila ifingi. Icinenene, tamukashilapo ukusambilila pali baLesa. (Uwakutulisya 3:11) Nangabe’fyo, ili tamungabatishiwa, mulyelelwe ukutango’kwishiba ne kusumina fimbi fyefyo Baibolo isambisha. (AbaEbeya 5:12) Ku cakubwenako, mulyelelwe ukwishibe’cine pa lwa mibelo ya bafwile ne mulandu ishina lya baLesa ne Bufumu bwabo ficindamine.

7. Kani ukusambilila Baibolo kulyelelwe ukucite’ndo kuli mwebo?

7 Pano, ukwishiba talipo ati e kupengelwa lukoso, pakuti “apakubulo’kucetekela tapesiba ukubatemwesya [baLesa].” (AbaEbeya 11:6) Baibolo ilatubuula ati ili bambi abantu mu mushi wa kale uwa Kolinto baumfwile icebo ici abasambile ba baYesu batuliishe, “balicetekele nekubatisiwa.” (Ifyacitilwe 18:8) Koti ni fyopele’fyo, ukusambilila Baibolo kulyelelwe ukumulengeni ukuba ne bucetekelo bwa kweba ati Baibolo Mashiwi aafumine kuli baLesa. Ukusambilila Baibolo kulyelelwe  ukumofweniko ukukwato’bucetekelo mu kulaya kwa baLesa na mu makosa akupulusha aamulambu wa baYesu.—Josyua 23:14; Ifyacitilwe 4:12; 2 Timote 3:16, 17.

UKUBUULAKO BAMBI BUCINE BWA MU BAIBOLO

8. Findo fikamulengeni ukubuulako bambi ifi musambilile?

8 Ili ubucetekelo bulukukula mu mutima wenu, mukasangana ukube’cikateshe ukwikala lukoso ukwakubula ukubuulako bambi ifi musambilile. (Jelemiya 20:9) Mukalukufwaisha ukubuulako bambi pali baLesa ne kufwaya kwabo.—Pendeni 2 AbaKolinto 4:13.

Ubucetekelo bulyelelwe ukumulengeni ukubuulako bambi ifi mucetekelemo

9, 10. (a) Mba nibani mungatatikilapo ukubuulako bucine bwa mu Baibolo? (b) Mba nifindo mwelelwe ukucita kani mulukufwaya ukulukutulisha pamo na Bamboni sha baYehova?

9 Cipale mungatatikako ukubuulako bambi bucine bwa mu Baibolo ukwakubulo’kubalenga ukufiitwa. Mungatatikilapo ukulabila pali bucine ku bakwabenu, ababyenu, aba mwikala nabo apepi, na babo mupyunga nabo. Mukupita kwa mpindi, mukapengela ukulukutulisha mu nshila iyanshikilwe pamo na Bamboni sha baYehova. Pali yeyo impindi, mukabe abakakulukile ukulabila ne Mboni iyo iilukumusambisheni Baibolo. Kani caboneka ati mwafikapo ukutulisha ku bantu abengi, kukaba ukwanshika ukwa kweba ati mwebo na woyo uumusambisheni mukakumane ne bakulu babili aba mwi kelesha.

10 Ici cikamofweniko ukubeshibisha bambi abakulu ba buKlistu abembela itanga lya baLesa. (Ifyacitilwe 20:28; 1 Petilo 5:2, 3) Kani aba abakulu babona ati muliishi ne kucetekela fimbi fyefyo Baibolo isambisha, mulukucita koti ni fyefyo baLesa bafunda, ne kweba ati icinenene mulukufwaya ukuba Imboni ya baYehova, abakulu bakamwishibisheni ati mwafikapo ukulukutulisha ku cintu bwingi. Eli mukaba uwakutulisha uutangabatishiwa uwa cebo iciweme.

11. Kani findo bambi belelwe ukuleka ili tabangafikapo ukutatika ukutulisha ku bantu abengi?

11 Ku kabeya kambi, cipale aba baeluda bangabona ati mulyelelwe ukwalulako mumbi mu mekalo enu ne mibelo pakweba ati mufikepo ukutulisha ku bantu abengi. Pambi  kungaba kuleka ifyakucita fimbi ifya mfiso ifi mufishile ku menso abantu bambi. Pakuti pali fyefyo, ili tamungalomba ati mube uwakutulisha uutangabatishiwa, mulyelelwe ukuleka ukucita ifyakubifya, ifili koti bucencemeshi, ukukolwa, ne kupyungishe’miyanda mu nshila iitayelelwe.—Pendeni 1 AbaKolinto 6:9, 10; AbaGalatya 5:19-21.

UKULAPILA NE KWALULUKA

12. Mba nindo mwelelwe ukulapila?

12 Kuli na fimbi ifi mwelelwe ukucita pakweba ati mufikepo pa kubatishiwa. Intangishi Petilo yalilabile ati: “Lapileni, mwaluluke, ati ifyakubifya fyenu fisimaŋgane.” (Ifyacitilwe 3:19) Ukulapila kufiitilwa icinenene ifintu ifi mucitile. Ukulapila kulyelelwe ukucitwa kani umuntu alikeele amekalo abumbifi, pano nakabili kulapengelwa nangaba ati umuntu taalukucitapo ifya bumbifi. Mba nindo kupengelwa? Nipakuti bonse lukoso abantunshi balibifishe kabili balafwaya ati baLesa babafitulukile. (AbaLoma 3:23; 5:12) Ili tamungasambilila Baibolo, tamwaishibilepo ukufwaya kwa baLesa. Popele nga mwalukucita shani koti kufwaya kwabo? Pakuti pali fyefyo, mulyelelwe ukulapila.

13. Kani ukwaluluka cindo?

13 Icikonkapo pa kulapila ‘kwaluluka.Mulyelelwe ukucita ificililepo pa kufiitilwa lukoso ifi mwalukucita. Mulyelelwe ukuleka ifyo ifi mwalukucita akale ne kukoselela ukweba ati mukalukucita ifilungeme. Ukulapila ne kwaluluka efyelelwe ukucitwa ili tamungabatishiwa.

UKULITUULA MWEBENE

14. Kani nicisa icintu icicindeme mwelelwe ukucita ili tamungabatishiwa?

14 Kuli na cimbi icintu icicindeme mwelelwe ukucita ili tamungabatishiwa. Mulyelelwe ukulituula mwebene kuli baYehova Lesa.

Kani mulingalituule mwebene kuli baLesa mwi tembelo?

15, 16. Kani ukulituula mwebene kuli baLesa kulaalule’ndo, kabili findo filenga umuntu ukucite’fyo?

15 Kani mwalituula mwebene kuli baYehova Lesa mwi tembelo  lya bucine, ninshi mwabalaya ati nibo lukoso ebo mukalukupyungila umuyayaya. (Ndutelonomi 6:15) Mba nindo, lomba, umuntu angafwaila ukuba umusha wa baLesa? Pakuti twasuke ico icakwipusha, nga tulanguluke pali cici icakupalanya. Mucalakanye ati umwalalume aambisha umwanakashi. Ili amwishiba umwanakashi ukwakuti ne kubona ati ali ne mibelo iiweme, umwalalume alamutemwa ukwakuti umwanakashi. Mukupita kwa mpindi, cikaba lukoso icelelwe ukumweba ati bopane. Iciine, kani akoope akakwata ifyakucita na fimbi. Pano ubutemwe bukamulenga ukucite’co icintu icicindeme.

16 Kani mwabeshiba baYehova ne kubatemwa, mukafwaisha ukubapyungila ne mweo wenu onse, ukwakubula ukupange’mipaka umwakupelela ukubapempela. Uyo onse uulukufwaya ukulonda Umwana wa baLesa, baYesu Klistu, alyelelwe ‘ukulikaana.’ (Mako 8:34) Tulalikaana fwebene kani tatulukukanikapo ati ifyo ifintu ifi tufwaya ukucita tafilukutucicila ukumfwila baLesa impindi shonse. Kanshi, ili tamungabatishiwa, ukucito’kufwaya kwa baYehova Lesa e cintu icelelwe ukuba icicindeme mu mweo wenu.—Pendeni 1 Petilo 4:2.

UKUCICILO’MWENSO WAKWEBA ATI MUNGAFILWA

17. Mba nindo bambi abantu tabafwaila ukulituula kuli baLesa?

17 Bambi abantu balashingashinga ukulituula kuli baYehova nipakuti balomfwo’mwenso uwa kucite’cintu ica kube’fyo. Cipale balatiina ukweba ati bakasololola kuli baLesa pakuti pano baKlistu abalituulile. Pakuti pa mwenso wakweba ati cipale bangafilwa ne kwansha baYehova insoni, balalanguluka ati ciweme ukwikala lukoso ukwakubula ukulituula kuli baLesa.

18. Kani findo fingamukosheni ukulituula kuli baYehova?

18 Ili mulukwishiba ifya kutemwa baYehova, mukakoshiwa ukulituula kuli bo ne kupyungisha apapelele amakosa ukucita koti ni fyopele’fyo mwabalaile. (Uwakutulisya 5:4) Panuma ya kulituula, icinenene mukafwaisha “ukulukwenda abelelwe  baSikulu [baYehova] ukuleto’kutemwesya konse.” (AbaKolosai 1:10) Pakuti kani mulibatemenwe baLesa, tamukalangulukapo ati cikateshe ukucito’kufwaya kwabo. Ukwakubula ne kukanika mukasumina ifyalabile intangishi Yoane, iyalembele ati: “Ubutemwe bwabaLesa nibubu, ati tulukulama’mafunde abo: lomba amafunde abo taalemene, tau.”—1 Yoane 5:3.

19. Mba nindo tamwelelwepo ukutiina ukulituula kuli baLesa?

19 Talipo ati mulyelelwe ukuba abawaminine pakuti mulituule kuli baLesa. BaYehova baliishi apa mungapelela kabili tabacetekelapo ati mucite ifingi ukucishapo apa mungapelela. (Amasamo 103:14) Balukufwaya mwebo ukushuka kabili bakamukosheni ne kumofweniko. (Yisaya 41:10) Mungacetekela ukweba ati kani mwapemamo muli baYehova ne mutima  wenu wonse, bo “bakalukukulanjisya insila syobe.”—Ifisimpi 3:5, 6.

UKULANGISHA UKULITUULA KWENU UKUPITILA MU KUBATISHIWA

20. Mba nindo ukulituula kuli baYehova takwelelwepo ukuba lukoso ukwa mu bumfiso?

20 Ukwalakanya pa fintu ifi twafuma mu kulabilapo kungamofweniko ukulituula mwebene kuli baYehova mwi tembelo. Onse lukoso uyo uutemenwe baLesa icinenene alyelelwe  nakabili ‘ukufisulula ukwakuleta ukupuluka.’ (AbaLoma 10:10) Kani mungacita shani ifyo?

Ukubatishiwa kulaalula ati twafwa kuli fyefyo ifi twalukucita akale ne kubuka mu kucita ukufwaya kwa baLesa

21, 22. Kani mungalanga shani apaswetele pa bantu abengi ubucetekelo bwenu?

21 Mulyelelwe ukwishibisha uwakwikatanya ibumba lya bakulu mwi kelesha mwenu ati mulukufwaya ukubatishiwa. Akanshika ukweba ati baeluda bambi bakapitulukemo na mwebo mu fyakwipusha ifilabila pali fyefyo Baibolo isambisha ifi mwelelwe ukwishiba pa kutanga. Kani aba abakulu basumina ati mwafikapo, bakamubuuleni ati mungabatishiwa pa kubungana ukukulu ukukakonkapo. * Ifyebo ifilabila pali fyefyo ukubatishiwa kwalula filapeelwa impindi shonse pa kubungana ukwa kube’fyo. Eli uwalabila ifyebo alabuula bonse abali pa mulongo wa kubatishiwa ukwasuka ifyakwipusha fibili ifipubile pakweba ati balilabilile abene ubucetekelo bwabo pa bantu abengi.

22 Ukubatishiwa e kwishibisha apaswetele ati mulilituulile kuli baLesa kabili pano muli Mboni ya baYehova. Abalukubatishiwa balabebisha umubili onse mu menda ukulangisha apaswetele ati balilituulile kuli baYehova.

UMULOLELE UKUBATISHIWA KWENU

23. Kani findo caalula ukubatishiwa “mwisina lyabaTata nelyaMwana nelyaMupasi Uswetelele”?

23 BaYesu balilabile ati abasambile babo bakababatisha “mwisina lyabaTata nelyaMwana nelyaMupasi Uswetelele.” (Matayo 28:19) Ici cilukwalula ati uulukubatishiwa alyelelwe ukwishiba ubukulu bwa baYehova Lesa na baYesu Klistu. (Amasamo 83:18; Matayo 28:18) Nakabili alyelelwe ukwishiba ifi umupashi uswetelele, neli amakosa abaLesa apyunga.—AbaGalatya 5:22, 23; 2 Petilo 1:21.

24, 25. (a) Kani findo ukubatishiwa kulangisha? (b) Kani nicisa icakwipusha celelwe ukwasukwa?

24 Nangabe’fyo, ukubatishiwa talipo kuliibisha lukoso mwebene  mu menda. Ukubatishiwa kulalangisha icintu cimbi icicindeme. Ukwibila panshi pa menda kulalangisha ati mwafwa kuli fyefyo ifi mwalukucita akale. Ukutumpulwa mu menda kulalangisha ati pano muli abalabi mu kucita ukufwaya kwa baLesa. Anukeni nakabili ati mulilituulile kuli baYehova Lesa abene, talipo ni ku mulimo, ku cintu ici mufwaisha ati cicitwe, ku bantunshi bambi, neli ni kwi bumba. Ukulituula kwenu ne kubatishiwa e citati ca kukwata bucibusa ubukosele na baLesa—bucibusa ubupalamishe.—Amasamo 25:14.

25 Ukubatishiwa talipo ati e kupuluka. Intangishi Paulu yalilembele ati: “Kamukonsya ukupuluka kwenu mwebene nekutina nekututuma.” (AbaFilipoi 2:12) Ukubatishiwa citati lukoso. Pano icakwipusha ni cici, Kani mungalilama shani mu butemwe bwa baLesa? Icapitala ca kupelako ice buuku lino cikaasuka ici icakwipusha.

^ par. 21 Ukubatishiwa kulacitwa umwaka ne mwaka pa kubungana ukukulu ukwa Mboni sha baYehova.