Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Kani Findo Baibolo Muli Bucine Isambisha?

 ICAPITALA 15

Ukupempela Uku BaLesa Basuminishe

Ukupempela Uku BaLesa Basuminishe
  • Kani nikonse ukupempela ukusangalasha baLesa?

  • Tungeshiba shani ukupempela kwa cine?

  • Kani nibani buno bukumo abapempela baLesa muli bucine?

1. Nibwisa bune tungasanganamo kani tulukupempela baLesa koti ni fyopele’fyo bafwaya?

BAYEHOVA LESA balatulamo’kwakuti kabili balafwaya twalibwena ubune ubufumamo mu kofwelesha kwabo. Kani twabapempela bo mu nshila iyelelwe, tukaba ne kusemba kabili tukaseesha amakatasho aengi mu myeo yesu. Kabili bakatushukisha ne kutofwako. (Yisaya 48:17) Pano, kuli amakelesha amapempelo imyanda ne myanda aalabila ati alasambisha ifya cine pali baLesa. Nangabe’fyo, aya makelesha amapempelo alasambishe’fipusenepusene pafi baLesa bali kabili nefi bafwaya fwebo ukulukuli.

2. Koti twasambilila shani ifya kupempela baYehova mu nshila iilungeme, kabili mba niciisa cakubwenako icilukutofwako ukumfwisha pali cici?

2 Kani mungeshiba shani mwebo ati iyi e nshila iilungeme baYehova bafwaya ukubapempelelamo? Tamwelelwe ukusambilila ne kupalanya ifi amapempelo onse lukoso asambisha. Mulielelwe lukoso ukusambilila ifi Baibolo muli bucine isambisha pa kupempela kwa cine. Ku cakubwenako: Mu fyalo ifingi, muli amakatasho ya ndalama sha bufi. Kani bamupeeleni umulimo wa kwishiba indalama sha bufi, koti mwapyunga shani? Kani ni pa kulukwanuka indalama ya bufi iili yonse lukoso? Koku. Cingabe’ciweme ukupyungisha impindi yenu ku kusambililo’kwishiba ifiboneka indalama sha cinenene. Panuma ili mwaishiba ifiboneka indalama ya cinenene, koti mwaishiba  ifiboneka indalama sha bufi. Mu kupalanya kuli fyefyo, kani twasambilila ifya kwishiba ukupempela kwa cine, koti twaishiba ne mapempelo abufi.

3. Koti ni fyopele’fyo baYesu balabile, findo twelelwe ukucita kani tulukufwaya baLesa ukutusumina?

3 Cincindeme kuli fwebo ukupempela baYehova mu nshila basuminishe. Abantu abengi balisumine ukweba ati amapempelo onse alasangalasha baLesa, pano Baibolo taisambishapwe’fyo. Ukulabila lukoso ati ndi muKlistu tacilipo icikumanine. BaYesu balilabile ati: “Abakulabila kuli nebo ati: BaSikulu! BaSikulu! tabali bonse abakenjila muBufumu bwaKwiulu, sombi beŋka abo abacita koti kufwaya kwabaTata abakwiulu.” Kani tulukufwaya baLesa ukusumina ukupempela kwesu, pakuti pali fyefyo, tulyelelwe ukusambilila ifi baLesa bafwaya kuli fwebo ne kulukucita fyenke’fyo. BaYesu balitile baabo abatabapyunga ukufwaya kwa baLesa ati ‘abakucite’fisendeme.’ (Matayo 7:21-23) Koti ni ndalama sha bufi, amapempelo abufi alukoso. Ne cibipishe cakweba’ti amapempelo akube’fyo alatwala ku konalwa.

4. Mba baYesu ifibalabile pa nshila shobilo filaalule’ndo, kabili inshila imo imo ilatwala pi?

4 BaYehova balipeele uuli onse pa calo ishuko lya kupoka umweo wa muyayaya. Pano pa kuba ne mweo wa muyayaya mu Paladaiso, nangabe’fyo, tulyelelwe ukupempela baLesa koti ni fyefyo bafwaya kabili ne kulukwikala koti kusuminisha kwabo. Ica kubombomanika ca kweba’ti abengi balakaana ukwikala koti kufwaya kwa baLesa. E mulandu baYesu balabilile ati: “Injileni pamulyaŋgo uce: pakuti umulyango ukulu nenshila ikulu iile mukupela kukonalwa; mopele umo emuya nebantu abenji. Pakuti umulyaŋgo uce nenshila ice iile mukupela kumweo, sombi uyo ulabona abace.” (Matayo 7:13, 14) Ukupempela kwa cine kulatwala ku mweo wa muyayaya. Ukupempela kwa bufi kulatwala ku konalwa. BaYehova tabafwayapo umuntu uuli onse ukonalwa, kabili uyo e mulandu balukupeelela abantu ishuko lya kusambilila pali bo ukuli konse. (2 Petilo 3:9) Muli bucine, inshila tupempelelamo baLesa koti yatulenga twaba ne mweo neli ukufwa.

 IFI MUNGESHIBA UKUPEMPELA KWA CINE

5. Kani tungabeshiba shani abapempela mu kupempela kwa cine?

5 Kani ‘inshila ya ku mweo’ mungaisangana shani? BaYesu balilabile ati ukupempela kwa cine koti kwaishibikilwa ku mibelo ya babo abantu abalimo. Balilabile ati: “Mukabesibila kufisepo fyabo,” pakuti “Imiti yonse iweme ilekata ifisepo ifiweme.” (Matayo 7:16, 17) Mu mashiwi ambi, abo abali mu kupempela kwa cine ifya kubeshibilako ni fyenka filya basumiinemo kabili ne mibelo yabo. Nangaba ati tabawamininepo kabili nabo balacita ifyakubifya, abapempeshi bacine balafwaya-fwaya ukucito’kufwaya kwa baLesa. Lekeni pano tulabile pa fintu 6 ifi tungeshibilako ukupempela kwa cine.

6, 7. Kani abapyungishi ba baLesa balaibona shani Baibolo, kabili baYesu balimakanikile shani icakubwenako muli fyefyo twelelwe ukuibona?

6 Abapyungishi ba baLesa aba cine balasambisha ifili mu Baibolo. Baibolo iine yenka ilalabila ati: “Amalembo onse alunjicilwe afumine kuli baLesa alielelwe ukusambisya, nekucenjesya, nekulunjika, nekufunda ukuluŋgeme: ati umuntu wabaLesa akalukuli uwaminine, ukonsiwe lukoso ukulukucite’milimo yonse iweme.” (2 Timote 3:16, 17) Ku baKlistu babyakwe, intangishi Paulu yalilembele ati: “Ili mwapokele kuli fwebo isiwi lyakumfwa ilyabaLesa, mwalilipokelele koti lisiwi lyabantunsi teko, sombi koti nififi ifi lili icine, lisiwi lyabaLesa.” (1 AbaTesalonike 2:13) Pakuti pali fyefyo, ifi abapempeshi bacine basumiinemo ne mibelo yabo tafifuminepo ku mano abuntunshi neli ku fyakutantaaka. Filifumine mu Mashiwi abaLesa, Baibolo.

7 BaYesu Klistu balimakanikile icakubwenako iciweme ica kusambisha ukufuma mu Mashiwi abaLesa. Mwi tembelo lyabo kuli baWishibo abaKwiulu, balilabile ati: “Isiwi lyenu ebucine.” (Yoane 17:17) BaYesu balicetekele Amashiwi abaLesa, kabili fyonse ifibalukusambisha fyalukubeelana bwino ne Malembo. Mu mpindi ishingi baYesu balukulabila ati: “Fililembelwe.” (Matayo 4:4, 7, 10) Popele apo baYesu balukulabila ifilembelwe mu malembo. Mu kupalana na fyefyo, abantu ba baLesa muli yiyino myaka tabasambishapo ifyakwalakanya fyabo. Balisumiine ukweba ati Baibolo e Mashiwi abaLesa, kabili ukusambisha kwabo kulieyamine kuli fyenka filya ilabila.

8. Kani mu kupempela baYehova muli ne kucite’ndo imbi?

 8 Abali mu kupempela kwa cine balapempela lukoso baYehova ne kulenga ishina lyabo ukwishibwa. BaYesu kababuulishisha ati: “Ulukucindika baSikulu [baYehova] Lesa wobe, kabili ulukubapyunjila bo beŋka.” (Matayo 4:10) Fyopele’fyo, abapyungishi ba baLesa balapempela lukoso benka baYehova. Uku kupempela kulisankenemo ne kulenga abantu ukwishiba bucine pe shina lya baLesa bacine ifi lili kabili nefi bali. Amasamo 83:18 alalabila ati: “Besibe ati mwebo mweŋka, mwemuli neshina lyabaYawe (neli, baYehova), nimweBacilile lukoso napacalo conse.” BaYesu balitubuulishishe ifyakofwako abantu ukwishiba baLesa, koti ni fyefyo balabile mwi tembelo ati: “Nalilifisulwile isina lyenu kubantu abo abamwampele abafumine pabapacalo capansi.” (Yoane 17:6) Mu kupalana na fyefyo, abapempeshi bacine ino myaka balasambisha bambi pe shina lya baLesa, ukufwaya kwabo, ne mibelo yabo.

9, 10. Kani nimuli shisa nshila abaKlistu bacine balilangishisha ati balitemwanshenye?

9 Abantu ba baLesa balitemwanshenye. BaYesu balilabile ati: “Pakuti pali kuku abantu bonse bakesiba ati muli basambile banji, kani mukalukwikele nekutemwanshanya.” (Yoane 13:35) AbaKlistu ba kutanga baali ne butemwe kuli umo ne mubyakwe koti ni bubo baYesu balabilepo. Ubutemwe baLesa batubuulile ukuba nabo bulashiliisha umusobololo, kabili bulalengesha abantu ukwikatana mu bwana bwankashi ubwakubulo’kushila. (Pendeni AbaKolosai 3:14) Abali mu mapempelo abufi tabakwetepo ubutemwe ubuli koti bwa pa bwana bwankashi. Tuliishi shani’fi? Pakuti bo balepayana abene na bene pakuti pa kupusana kwa fyalo ne mushobo. AbaKlistu bacine tabapyungishapo ifyakulifunako ku kwipaya abaKlistu babyabo neli abantu bambi. Baibolo ilalabila ati: “Abana babaLesa nebana bamusensesi balibwenekele muli fifi: ati abantu bonse utaacite’filuŋgeme taali wakuli baLesa, neli niwoyo utaatemwo’mukwabo. . . . Tuŋgelelwa ukutemwansyanya: ati tekucita koti nifyefyo ifi acitile Kaini, uwali wakuli yeyo-mbifi, nekwipayo’mukwabo.”—1 Yoane 3:10-12; 4:20, 21.

10 Fya cine, ukuba ne butemwe bwa cinenene talipo kubula  lukoso ukwipaya bambi. AbaKlistu bacine ukwakubula akaso balapyungisha impindi yabo, amakosa abo, ifipe fyabo pakweba ati bofweleshanye ne kukoshanya. (AbaEbeya 10:24, 25) Balofwana mu mpindi ya makatasho, kabili balicetekele ababyabo. Muli bucine, balapyungisha ukufunda kwa Baibolo ukulabila ati: “Ŋgatulukucite’fiweme kubantu bonse.”—AbaGalatya 6:10.

11. Mba nindo twelelwe ukusuminina baYesu Klistu ukweba ati ebo baLesa bakapyungisha pa kutupulusha?

11 AbaKlistu bacine balisumiine baYesu Klistu ati ebo baLesa batumine ku kutupulusha. Baibolo ilalabila ati: “Mubantu bambi bonse neli umo tamuli-po ukupuluka; pakuti kabili pansi pano tapali-po isina limbi iliilicilwe kubantu ilyelelwe fwebo ukupulucila-mo.” (Ifyacitilwe 4:12) Koti ni fyopele’fyo twabwene mu Capitala 5, baYesu balipeele umweo wabo icakulubula abantunshi abacumfwilo. (Matayo 20:28) Nakabili, baYesu e Mfumu baLesa bekalikile pa Bufumu bwa kwiulu ubukateka icalo conse. Kabili baLesa balafwaya fwebo ukweba ati tulukubomfwila baYesu ne kupyungisha ukufunda kwabo kani tulukufwaya umweo wa muyayaya. Eci na Baibolo ilabilila ati: “Uyo ulukupema-mo muMwana euli neMweo uwamuyayaya; sombi uyo utaasuminino’Mwana taakabona-po Umweo.”—Yoane 3:36.

12. Ukubula ukuba aba pa calo e kweba’ti shani?

12 Abapempela ifya cine tabalipo ba papano pa calo. Ili balukubesha pantangile yakwe Pilati, uwalukwikalika abaLoma, baYesu kabalabila ati: “Ubufumu bwanji tabuli bwamucalo cino icapansi.” (Yoane 18:36) Temulandu ne calo ukubekala, abasambile bacine aba baYesu batekwa ba Bufumu bwa kwiulu kabili tabalibikamo mu fya mapolitiki neli panini. Tababapo ku kabeya akali konse aka mapolitiki. Nangabe’fyo, abapempeshi ba baYehova tabakanyapo abo abasalapo ukuba mu mapolitiki ya calo, neli abalukufwaya ukuba abekalikishi ba calo neli kani balukufwaya ukusala abekalikishi. Nangaba ati abapempeshi ba baYehova tabalibikamo mu fya mapolitiki, bo balalama amafunde. Mba nindo? Nipakuti Amashiwi abaLesa alababuula ‘ukukomekwa ku bukulu ububekalika.’ (AbaLoma 13:1) Kani paba ukupusana  pafi baLesa bafwaya eli nefi ubuteko bulukufwaya, abapempeshi bacine balalonda icakubwenako ca ntangishi, ishalabile ati: ‘Ukutwelelwa ukumfwila baLesa ukwakucila na pa kumfwila abantu.’—Ifyacitilwe 5:29; Mako 12:17.

13. Mba abasambile bacine aba baYesu balabona shani Ubufumu bwa baLesa, namulifyefyo cindo batulisha pali bubu Ubufumu?

13 Abasambile bacine aba baYesu balatulisha ukweba ati Ubufumu bwa baLesa e bwenka lukoso abantunshi belelwe  ukucetekela. BaYesu balishimikile ati: “Icebo ici Iciweme icaBufumu cikatulika monse mucalo capansi, koti nibumboni kumikoka yonse yabantu, elyo kukesa ukushila.” (Matayo 24:14) Pa mupunda wa kukoselesha abantu ukucetekela ukuteka kwa buntunshi ukweba’ti e kukashilisha amakatasho, abasambile bacine aba baYesu Klistu balatulisha Ubufumu bwa kwiulu ubwa baLesa ati ebo twelelwe ukucetekela. (Amasamo 146:3) BaYesu balitusambishe ifya kutembela pali bubulya ubuteko ubuwaminine ati: “Ubufumu bwenu bwise. Ukufwaya kwenu kucitwe, pansi pano koti nikwiulu.” (Matayo 6:10) Amashiwi abaLesa aalishimikile ati Ubufumu bwa kwiulu “bukapalaishisha nekonala ubu-bufumu [ubulipo pali ino mpindi] bonse; nabo ubwine nekwiminina inshiku shonse isyakulukuyayaya.”—Danyeli 2:44.

14. Mba nibani abapyunga fyefyo ukupempela kwa cine kwelelwe ukupyunga?

14 Koti ni fyefyo twalabilapo, lipusheni mwebene pano ati: ‘Mba nikwisa kupempela ukusambisha ififuma mu Baibolo kabili ne kulenga ishina lya baYehova ukutulishiwa? Mba nikwisa kupempela ukulanga ubutemwe koti ni fyefyo baLesa bafwaya, ukucetekeele muli baYesu, ukutakuliibikamo mu fya cicino icalo, kabili ukutulisha ati Ubufumu bwa baLesa e bwenka lukoso abantunshi belelwe ukucetekela? Pa mapempelo onse aali mu calo, mba nikwisa ukupempela ukukumanisha ifipengelwa?’ Bucine ubwaboneka apatubile bwa kweba ati ni Mboni sha baYehova.—Pendeni Yisaya 43:10-12.

FINDO MUKACITA?

15. Findo baLesa bafwaya panuma ili twaishiba ati eko bali?

15 Ukucetekela muli baLesa talipo lukoso ati e cifwaikwa pa kubasangalasha. Fya cine, pakuti na Baibolo ilalabila ati ifibanda nafyo filicetekele ati baLesa eko bali. (Jakobo 2:19) Apatubile lukoso, nangabe’fyo, ifibanda tafipyungapo koti kufwaya kwa baLesa kabili balifipatile. Pakuti baLesa batushukishe, tatwelelwepo lukoso ukusumina ati eko bali pano tulyelelwe ne kucita ifi bafwaya. Kabili tulyelelwe ukufumamo mu kupempela kwa bufi ne kulukuli mu kupempela kwa cine.

16. Findo twelelwe ukucita ili caisa ku fingatulundanya ne kupempela kwa bufi?

 16 Intangishi Paulu alitubuulishishe ili alabile ati tatwelelwepo ukupyungako ificitwa mu kupempela kwa bufi. Kaalemba ati: “BaLesa [baYehova balabila] ati: Fumeni-mo muli bo, mulukulekene nabo; tekukuma-ko kucintu icibipile neli cimo, eli ŋkamupokeleleni.” (2 AbaKolinto 6:17; Yisaya 52:11) AbaKlistu bacine balalifumyako kuli fyonse lukoso ifingabalundanya ne kupempela kwa bufi.

17, 18. Kani ‘Babiloni Umukulu’ cindo, kabili mba nindo twelelwe ukwendesesha ‘ukufumamo muli ye’?

17 Baibolo ilatubwenesha ati konse lukoso ukupempela kwa bufi kulilundene na ‘Babiloni Umukulu.’ * (Ukufisulula 17:5) Ili shina lilatwanushako umushi wa kale uwa Babiloni, koko ukupempela kwa bufi kwatatikile panuma ili Ubulobe bwa mu mpindi yakwe Noa bwashilile. Ifisambisho ifingi ififulile mu kupempela kwa bufi muli yiyino myaka filituntukile ku Babiloni wa ku kale. Ku cakubwenako, akale abaBabiloni balukupempela ubuntu bwa patatu ubwa bulesa. Pali bukumo, icisambisho icikulu ici basambisha mu mapempelo aengi ca buntu bwa patatu ubwa bulesa. Pano Baibolo ilatusambisha apaswetele ati kuli lukoso bamo baLesa bacine, baYehova, kabili ati baYesu Klistu bana babo. (Yoane 17:3) AbaBabiloni balisumine ne kweba’ti abantunshi bali ne mweo uutaufwapo, uufumamo mu muntu kani afwa ne kuya ku mupunda umbi mu kupenga. Bukumo nabo, amapempelo aengi alasambisha ati umweo uutaufwapo neli umupashi koti wapenga mu mulilo wa kulukuyayaya.

18 Pakuti ukupempela kwa baBabiloni kwali lukoso ukuli konse, kanshi Babiloni Umukulu uwa ino mpindi buteko bwa calo ubwa kupempela kwa bufi. Kabili baLesa balishimikile ati ubu buteko bwa kupempela kwa bufi bonse bukonalwa mu kupulumucilwa. (Ukufisulula 18:8) Kani pano mwabona ici mwelelwe ukulifumishako mwebene kuli Babiloni Umukulu? BaYehova  Lesa balafwaya mwebo ‘ukufumamo muli ye’ ili kucili mpindi.—Ukufisulula 18:4.

Kani mulukupyungila baYehova pamo ne bantu babo, mukaba ne fyakuti ubwingi ifyakucila na pali fyefyo mwashiile

19. Kani findo mukasangana mu kupyungila baYehova?

19 Kani mwebo mwafumamo mu kupempela kwa bufi, bambi abantu aba mwali nabo bakaleka ukuba ne bulunda na mwebo. Nangabe’fyo, kani mulukupyungila baYehova pamo ne bantu babo, mukaba ne fyakuti ubwingi ifyakucila na pali fyefyo mwashiile. Koti basambiile ba kutanga aba baYesu abashiile fyonse ne kubalonda, na mwebo mukakwata abakwabenu abengi aba mwi kelesha. Mukaba mu cisoolo icikulu ica mamilyoni abaKlistu bacine icili mu calo conse, abakamutemweni mucinenene. Kabili mukaba ne bucetekelo ubuweme ubwa kuba ne mweo wa muyayaya ‘pa mpindi iyo iikesa.’ (Mako 10:28-30) Pambi mukupita kwa mpindi, abo abalekele ukuba ne bulunda na mwebo pakuti pafi musuminemo bakeshiba ifi Baibolo isambisha ne kuba abapempeshi ba baYehova.

20. Mba nifindo fili kuntangiile ifi bapembelela abo abali mu kupempela kwa cine?

20 Baibolo ilasambisha ati baLesa bukumo lukoso bakufumyapo bumbifi pa calo kabili ne kulete’calo ca bukumo icilungeme icikalukutekwa ne Bufumu bwabo. (2 Petilo 3:9, 13) Mame’calo ifi cikawama! Kabili muli cenke’co icalo, mukaba lukoso ukupempela kumo, kumo lukoso ukupempela kwa cine. Kani cingelelwa kuli mwebo ukupyungapo fimo pa kulukuli ne bapempeshi bacine yenka ino mpindi?

^ par. 17 Kani mulukufwaya ukwishibilapo na fimbi pafi Babiloni Umukulu e makaninako ukupempela konse lukoso ukwa bufi ukuli pa calo, boneni ifyebo na fimbi, pa mabula 219-220.