Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Kani Findo Baibolo Muli Bucine Isambisha?

 ICAPITALA 19

Mulukulilama mu Butemwe bwa BaLesa

Mulukulilama mu Butemwe bwa BaLesa
  • Cilaalule’ndo ukutemwa baLesa?

  • Kani tungalilama shani mu butemwe bwa baLesa?

  • Mba baLesa bakashukisha shani abo abalukulilama mu butemwe bwabo?

Kani mungalenga baYehova ukuba abakupulukilamo benu muli ino mpindi ya makatasho?

1, 2. Nikwisa tungasangana umwakupulukila ino myaka?

ALAKANYENI mwebene ukweba ati mulukwenda mu nshila akasuba kabili icipuupu cilukutuukaala. Mwiulu mwafita na bwii. Ukubyata ne kubuluma fyatatika, imfula yatatikako ne kupokomoka. Mwaendesha, ukwakubulo’lucetekelo mulukufwaya umwakuube’mfula, namo neli kubonekapo ii. Pano, kumpelo ya nshila mwabona icakwibaka. Cikosele kabili muumine bwino pakuti imfula tailukwingilamo. Mame’fi mungasangalala ukusangana icakwibaka icili koti ni fyopele’fyo!

2 Tulukwikala mu mpindi ya makatasho. Imibelo ya calo ilukuya lukoso ili ibipilako. Nangabe’fyo, tulikwete umwakupulukila umuweme, umwakupulukila ku konalwa ukuli konse. Mungaba nimwiso’mo? Boneni ifi Baibolo isambisha ili ilabila ati: “Nakulabila ifyakuli baYawe [baYehova], ati: Bo emwakupulucila mwanji, eŋanda yanji ikosele; nibaLesa banji, muli bo emo ndukucetekela.”—Amasamo 91:2.

3. BaYehova koti baba shani abakupulukilamo besu?

3 Langulukeni pali ceco! BaYehova, Abalengeshi  kabili Abacilile pa calo na mwiulu monse, bangaba abakupulukilamo besu. Bangatulama bwino, pakuti balikwatishe amakosa ukucila uuli onse neli ukucila icili conse icingesa ati citusomeshe. Nangaba ati twasomeshiwa, baYehova koti bashilisha uko ukukatashiwa. Tungalenga shani baYehova ukuba abakupulukilamo besu? Tulyelelwe ukupemamo muli bo, nakabili, Amashiwi abaLesa alatukosha ati: “Mulukulilama mubutemwe bwabaLesa.” (Juda 21) Fya cine, tulyelelwe ukulilama fwebene mu butemwe bwa baLesa, ukwikatisha bucibusa bwesu na baWishifwe aba kwiulu. Kani twacita koti ni fyopele’fyo tukalabila ati baLesa e bakupulukilamo besu. Pano bucibusa bwesu na baLesa bungebakwa shani?

ISHIBENI UBUTEMWE BWA BALESA KABILI PYUNGENI KOTI KUTEMWA KWABO

4, 5. Nishisa nshila baYehova balangiilemo ubutemwe kuli fwebo?

4 Pa kulukulilama mu butemwe bwa baLesa, tulyelelwe ukumfwisha ifi baYehova balangile ubutemwe kuli fwebo. Langulukeni pali fimo fimo ifi Baibolo isambisha ifimwasambilile ne kofweleshiwa na lilino ibuuku. Abalengeshi besu, baYehova balitupeele icalo iciweme ukwakuti umu twikala. Balibikilemo ifyakulya ne menda, amekalilo aaweme, inama ishiweme, kabili ne fimenwa menwa ifiboneka bwino. Abalembeshi ba Baibolo, baLesa, balifisulwile ishina lyabo ne mibelo yabo kuli fwebo. Kabili, Amashiwi abo alafisulula ukweba ati balitumine Umwana wabo uubatemenwe ukwisa pa calo, ukusuminisha baYesu ukusomenwa kabili ne kufwa pakuti pali fwebo. (Yoane 3:16) Pano ico icakupa lukoso cilalule’ndo kuli fwebo? Cilatupeela ubucetekelo ubuweme pa lwa kuntangiile.

5 Ubucetekelo bwesu pa lwa kuntangile bulyeyamine muli fyefyo baLesa bacitile. BaYehova balikalikile ubuteko bwa kwiulu, Ubufumu bwa buMasaya. Bukumo lukoso bukafumyapo ukupenga konse kabili ne kulenga icalo ukuba paladaiso. Langulukeni pali ceco! Tungekalamo mulya ne mweo mu butende kabili mukusangalala inshiku shonse lukoso. (Amasamo 37:29) BaLesa balitupeele amafunde akutubuulishisha ifitungekala bwino pali ino mpindi. Balitupeele ne mpese ya kutembela, muli yeyo inshila tungalabila nabo impindi iili yonse ukuli konse lukoso ukutungalukuli. Ishi ni nshila lukoso shinini baYehova balangiilemo ubutemwe ku bantunshi bonse pamo na ku muntu umo umo.

6. Kani findo mungacitapo mwebo pa butemwe bwa baYehova?

 6 Icakwipusha icicindeme kuli mwebo ukulipusha ni cici: Findo ningacitapo nebo pa butemwe bwa baYehova? Abengi bangalabila ati, “Cilyelelwe nebo ukubatemwa baYehova pakuti nane balintemenwe.” Kani ifyo efi namwe mumfwa? BaYesu balilabile ati ifunde ilyakucila ubukulu pa mafunde onse ni lili ati: ‘Ulukutemwa baYehova Lesa wobe, ne mutima wobe wonse, ne mweo obe onse kabili ne mano obe onse!’ (Matayo 22:37) Ukwakubula ne kupikisha mulikwete imilandu iingi iya kulangilamo ubutemwe kuli baYehova Lesa. Pano ukumfwa lukoso ati mulibatemenwe e calula ati mulitemenwe baYehova ne mutima wenu onse, umweo wenu wonse, kabili ne mano enu onse?

7. Kani ukumfwa lukoso ati mulibatemenwe baLesa e cipengelwa kuli mwebo ku kulangisha ubutemwe kuli bo? Buulishisheni.

7 Koti ni fyefyo balabilepo mu Baibolo, ukutemwa baYehova kulicililepo na pa kumfwa lukoso ati tulibatemenwe. Fya cine, nangaba ati ukumfwa ati tulibatemenwe baYehova kuncindeme, uko ukumfwa e kutatika lukoso ukwa butemwe ubwinenene kuli baLesa. Ku cakubwenako: Mulukufwaya ukulya icisepo, eli pano umuntu amutambikeni umukefu, kani mungatemwa? Tekuti mutemwe yo! Ulya umukefu eubabyala pakuti cilya iciti cikule ne kwikata ifisepo. Koti ni woyo umukefu, ubutemwe bwa kuli baLesa e kutatika lukoso. Baibolo ilasambisha ati: “Ubutemwe bwabaLesa nibubu, ati tulukulama’mafunde abo: lomba amafunde abo taalemene, tau.” (1 Yoane 5:3) Ubutemwe bwacinenene, ubwa kuli baLesa bulyelelwe ukutwala ifisepo ifiwaminine. Bulyelelwe ukubonekela mu fyakucita fyesu.—Matayo 7:16-20.

8, 9. Tungalanga shani ubutemwe bwesu kabili ne kutota kuli baLesa?

8 Tulalanga ukweba ati tuli ne butemwe kuli baYehova kani tulukulama amafunde abo ne kulukulonda ifi batubuula. Talipo cikateshe ukupyungisha amafunde abo. Amafunde abaYehova taakateshepo, alibeleleko ukutofwako ati tulukuli abakutemwesha,  abasangalele, ne mweo uuweme. (Yisaya 48:17, 18) Kani tulukupengela ukwikala koti ni fyopele’fyo baYehova balukutubula, tulalanga baWishifwe ba kwiulu ati mucinenene tulatota pali fyonse lukoso batupyungiile fwebo. Ku cakulengesha ukubombomana, banini pali lelo abalangisha ukutota. Tatufwayapo ukuba abakubulo’kutota, koti bantu bambi abaaliko ili baYesu bali pano pa calo. BaYesu baliposeshe abantu 10 abaali ne manata, pano umo lukoso e waalulukile mu kubatota bo. (Luku 17:12-17) Nacine, ngatube koti ni uulya umo uwatotele, tekuba koti ni babalya 9 abatabalangile ukutota!

9 Mba pano niesa amafunde abaYehova ao twelelwe ukulama? Twalabilapo makosa paengi muli lilino ibuuku, pano lekeni tulabilepo lukoso anini. Ukulonda amafunde abaLesa kukatofwako fwebo ukulukwikele mu butemwe bwa baLesa.

PITILISHENI UKUPALAMINA KULI BAYEHOVA

10. Buulishisheni umulandu cicindamine ukupitilisha ukulukusambilila pali baYehova Lesa.

10 Ukusambilila pali baYehova e cakucita icicindeme pa kupitilisha ukulukupalamina kuli bo. Tatwelelwe ne kuleka ukusambilila. Kani mwali posonde apatantile mulukonto’mulilo,  mba kani mungaleka umulilo ulukushimika mpaka washimikilila? Koku. Mungalukusonselako inkuni pakuti ulukwaka ne kweba ati mwikale apakabile. Mungatantililwa kabili ne kufwa mungafwa kani umulilo wenu washimika! Koti ni nkuni ishilenga umulilo ukulukwaka, efili “nemano abaLesa” alalenga ubutemwe bwesu kuli baYehova ukukoselako.—Ifisimpi 2:1-5.

Koti mulilo, ubutemwe bwenu kuli baYehova bulapengela inkuni pakweba ati bupitilishe ukwaka

11. Kani ifi baYesu balukusambisha abalukubalonda fyalibalengele ukuba shani?

11 BaYesu baalukufwaya abasambile babo ukupitilisha ukuba ne butemwe ukulukwaka muli bo kuli baYehova na ku Mashiwi abo aabucine. Panuma ya kubuka ukufuma ku bafwile, baYesu balibuulile abasambile babo bobilo pa fyakushimika fya mu Malembo aciEbeya ifyafishiwepo koti ni fyefyo ifyalailwe pali bo. Mba nicindo icafuminemo? Mukupelako lomba nabo abasambile ne kulabila ati: “Kansi imitima yesu tayalukupya muli fwebo, ili balukwambala nafwebo munsila, nekulukutubulisisya amalembo?”—Luku 24:32.

12, 13. (a) Ku bantunshi abakuti ubwingi shino nshiku, cindo cicitikile ku butemwe bwabo kuli baLesa na Baibolo? (b) Tungacicila shani ukweba ati ubutemwe bwesu tabushilile?

12 Ili pa kutanga lukoso mwasambilile fyopele’fyo Baibolo isambisha, tali umutima wenu walisangalele, mwali ne munkonsha, kabili ne butemwe bwa kuli baLesa? Ukwakubula ne kukanika efi cali. Kubengi efi cali koti ni fyopele’fyo. Pano ukukatashiwa ukubapo fya kulama ubo’butemwe ne kofweleshako ubo butemwe ukukula. Tatulukufwayapo ukulondaisha ifya cicino’calo. BaYesu balishimikile ati: “Ubutemwe bwabantu abenji bukaleka.” (Matayo 24:12) Mungacita shani pakuti ubutemwe bwa kuli baYehova kabili ne bwa bucine bwa mu Baibolo ukubula ukuleka?

13 Tekweshapo ukuleka ukusambilila pali baYehova Lesa na baYesu Klistu. (Yoane 17:3) Mulukwalakanya, neli ukulanguluka pa Mashiwi abaLesa mulukusambilila ne kulipusha mwebene ati: ‘Mbe’ci cilukunsambishe’ndo pali baYehova Lesa? Mba nicindo cimbi nasambilila icakulenga nebo ukutemwa baLesa ne mutima wanji wonse, ne kulanguluka kwanji konse, ne mweo wanji onse?’ (Pendeni 1 Timote 4:15) Ukwalakanya kwa fyefyo kungamofweniko ukulukuli ne butemwe ubwakuti kuli baYehova.

14. Kani itembelo lingatofwa shani ukulama ubutemwe bwesu ubwa kuli baYehova ukubulo’kushila?

 14 Inshila naimbi mungalengelamo ubutemwe bwenu ubwa kuli baYehova ukubula ukushila kutembela ukwakubulo’kuleka. (1 AbaTesalonike 5:17) Mu Capitala 17 ica lilino ibuuku, twalisambilile ukweba ati itembelo ni mpese iyakuti ubune iyakufuma kuli baLesa. Koti ni fyenka filya abantunshi abalukumfwana bambaala impindi shonse, fyopele’fyo na bucibusa bwesu na baYehova bukaba ubuwaminine kabili bukalukuli ubukosele kani tulukutembela impindi shonse. Tatwelelwepo ukulukutembela cikulu litembelo, ukulukulabila amashiwi antu amo impindi shonse lukoso ukutembela ukwakubula ukubikako ne kalango. Tulyelelwe ukulabila kuli baYehova koti mwana uulukulabila na bawishi babutemwe. Pa kulabila tulyelelwe ukulukuli ne mucinshi, fya cine, ukuba abakakulukile pakulabila, abacetekelwe, kabili ukulabila ukufuma panshi pa mutima. (Amasamo 62:8) Ukusambilila Baibolo ne kutembela ukufuma panshi pa mutima ficindeme mu kupempela kwesu, kabili filatofwako ukulukulilama mu butemwe bwa baLesa.

SANGANENI UKUSANGALALA MU KUPEMPELA KWENU

15, 16. Mba nindo twelelwe ukubwena umulimo wa kushimikila pa Bufumu ati mulemyo kabili koti maboni?

15 Isambililo lya pa lwesu ilya Baibolo ne tembelo kupempela koko tungacita ili tuli fwenka. Pano, nangabe’fyo, ngatulabile pa kupempela kwa pa bengi: ukulabila ku bantu bambi pa bucetekelo bwesu. Kani mulitatikileko ukulabila ne bantu bambi pa cine ca mu Baibolo? Kani mulitatikile, cipale mulasangalala pali woyo mulemyo. (Luku 1:74) Ili twabuulako bambi icine tusambilile pali baYehova Lesa, ninshi tulukupyunga umulimo uucindeme uupelwe ku baKlistu bacine bonse, uwakushimika icebo iciweme ica Bufumu bwa baLesa.—Pendeni Matayo 24:14; 28:19, 20.

16 Intangishi Paulu alukubona ukupyunga kwakwe ukweba ati kucindeme makosa, pakuti alikwitile ati maboni. (2 AbaKolinto 4:7) Ukulabila ku bantu pali baYehova Lesa kabili ne kufwaya kwabo e mulimo uuweme mungapyungako. Mulimo uuweme kuli baShikulu, kabili mulafuma ifiweme. Ili mulukupyungako uyu mulimo, ninshi mulukofwako abantu abatekenye imitima ukupalamina kuli  baWishifwe aba kwiulu kabili ukubofwa ukwenda mu nshila ya ku mweo wa muyayaya! Mba niwisa mulimo uungawama koti niwuyu? Nakabili, ukucitila bumboni pali baYehova ne Mashiwi abo kulakusha ubucetekelo bwenu kabili kulakosha ubutemwe bwenu  kuli bo. Kabili baYehova balatota makosa ukulibikilishako kwenu. (AbaEbeya 6:10) Ukulukupyunga impindi ne mpindi mu mulimo kukamofweniko ukulilama mu butemwe bwa baLesa.—Pendeni 1 AbaKolinto 15:58.

17. Mba nindo umulimo wa buKlistu welelwe ukupyungilwa mu kwangufya pali bulelo?

17 Cicindeme ukwanuka ati umulimo wa kutulishe’cebo ici ica Bufumu ulyelelwe ukupyungwa bwangu. Baibolo ilalabila ati: “Ulukutulisya Isiwi; ulukukosa.” (2 Timote 4:2) Mba nindo twelelwe ukubela abakosele pali lelo? BaLesa balatubula ati: “Akasuba kabaYawe [baYehova] akakulu kali apepi; kali apepipepi, kalukwaŋgufya.” (Sefaniya 1:14) Fya cine, iyi’mpindi ilukwangufya ukwisa ili baYehova bakashilisha imibelo yonse iilipo. Abantu balyelelwe ukucenjeshiwa! Balyelelwe ukwishiba ukweba ati ino e mpindi ya kusobolapo baYehova ukuba Imfumu yabo. Ukushila ‘tekuti kushinge.’—Abakuci 2:3.

18. Mba nindo twelelwe ukupempelela baYehova pamo ne baKlistu babyesu?

18 BaYehova balafwaya tulukubapempela pamo penka ne baKlistu babyesu. Ici eci Amashiwi abo alabilila ati: “Ŋgatulaŋgulukansyanye, ati tubusye ubutemwe nemilimo iweme; ŋgatubulo’kuleko’kubuŋgana, koti nifyefyo ifi bacita bambi, sombi ŋgatulukucenjesyansyanya; ukwakucila kabili pakubona ati akasuba kalukupalamina.” (AbaEbeya 10:24, 25) Kani twabungana pamo ne babucetekelo babyesu pa mabungano, tulaba ne mpindi iiweme iya kulemya kabili ne kupempela baLesa besu abatemiwe. Kabili tulakoshanya ne kucenjeshanshanya.

19. Tungapyunga shani pakweba ati tukoshe ubutemwe mwi kelesha lya buKlistu?

19 Ili tucita ubulunda ne baKlistu bambi abapempela baYehova, tulakosho’butemwe kabili na bucibusa bwa mwi kelesha. Cicindeme ukulukufwayamo ubune mu babyesu, koti ni fyefyo baYehova bafwayamo ubune muli fwebo. Mwilukucetekela lukoso ukubonamo ukuwaminina mu babucetekelo babyesu. Anukeni ukweba ati tulapusanapusana mu kukula kwa kwishiba ifya baLesa kabili fwebo fwense tulabifya. (AbaKolosai 3:13) Fwaisheni ukuba bucibusa na babo abatemwishishe baYehova, kabili mukasangana ati mulukukula mwebene ku kwishiba baLesa. Muli bucine, ukwishiba  baYehova ne bakwabesu tupempela nabo kukamofweniko ukulukulilama mu butemwe bwa baLesa. Kani baYehova balabapa shani ilambulo abo ababapempela bo ne bucetekelo kabili abalilama mu butemwe bwabo?

IKATISHENI “UMWEO UWACINE”

20, 21. Kani “umweo uwacine” niwisa, kabili mba nindo ubelele bucetekelo ubuweme?

20 BaYehova balalambula abapyungishi babo aba bucetekelo pa kubapa umweo, pano mweo wa shani babalambula? Pano mwebo muli na woyo umweo pali ino mpindi? Fwebo fwe bengi tekuti tukanikepo ne kukanika. Pakuti tulapema, tulalya, kabili tulanwa. Muli bucine tulyelelwe ukulukuli abalabi. Kabili mu mpindi shesu ishakusangalala, koti pambi twalabila ati, “Pano ano muli bucine e mekalo!” Nangabe’fyo, Baibolo ilabuulishisha mu kucindama ati takulipo umuntunshi pali ino mpindi uulukwikala ne mweo muli bucine.

BaYehova balafwaya mwebo mukalukusemba ne ‘mweo wa cinenene.’ Kani mwebo mukaupoka uyo umweo?

21 Amashiwi abaLesa alatubuulishisha ‘ukwikatisha umweo uwa cine.’ (1 Timote 6:19) Ayo mashiwi alatubuula ati “umweo uwacine” e woyo tutembetele ukupoka kuntangile. Inya, ili tukaba abawaminine, tukafikapo ukwikatisha umweo wa cinenene, pakuti tukalukwikele koti kufwaya kwa baLesa ukwa pa kutanga. Ili tukatatika ukwikala mu paladaiso umutamukalukulipo amalwashi, tukalukwikele mu butende, kabili mukusangalala, mukupelako tukaba ne kusangalala pakuba ne ‘mweo wa muyayaya.’ (1 Timote 6:12) Tali ubo bucetekelo bwa cinenene?

22. Kani mwebo koti ‘mwaikatisha shani ku mweo wa cinenene’?

22 Koti ‘twaikatisha shani ku mweo wa cine’? Mu fyebo fintu fimo, Paulu abakosha abaKlistu ukweba ati “ŋgabalukucite’fiweme” kabili “bakafule mumilimo iweme.” (1 Timote 6:18) Mukubwenesha, pakweba ati tukwate uyu mweo cileyamina pali fyefyo tulukupyungisha icine ceco tulukusambilila ukufuma mu Baibolo. Pano, kani Paulu alyalwile ukweba ati ukulambulwa kwa kuba ne ‘mweo wa cine’ nipakuti pa kupyugisha kwa kucita ifiweme? Koku, nipakuti ni “impese yaluse” ukufuma kuli baLesa. (AbaLoma 5:15) Nangabe’fyo, baYehova balafwaisha makosa ukulambula babo ababapyungila mu kupemamo muli bo. Balukufwaya mwebo ukwikala ne ‘mweo wa cinenene.’ Ukuba ne kusangalala,  ubutende, umweo wa muyayaya kuntangile filipembelele abo abapitilisha ukulukulilama mu butemwe bwa baLesa.

23. Mba nindo cicindamine ukulukulilama mu butemwe bwa baLesa?

23 Cingabe’ciweme umuntu onse ukulipusha umwine ati, ‘Kani ndukupempela baLesa koti kwelelwa kwa fyefyo balabile muli Baibolo?’ Kani tulukulyesha fwebene, utusuba tonse, ne kusangana ukweba ati tulukupempela baLesa koti ni fyefyo Baibolo ilabiile, ninshi tulukupyunge’cilungeme. Tungaba ne lupata ukweba ati baYehova e bakupulukilamo besu. Bakalama bwino abantu babucetekelo ukupita na mu mpindi sha makatasho isha shishino inshiku sha kupelako. BaYehova nakabili bakatupulusha ne kutwingisha mu calo iciweme icili lukoso apepi. Mame’fitukasangalala ukuba muli ceco icalo! Nakabili tukaba abasangalele ukwishiba ukweba ati muli ino impindi ya kupelako tulisalulwilepo ukupyungila baLesa! Kani mwasalululapo ukupyunge’fyo ino mpindi, mukasangalala ukuba ne ‘mweo wa cinenene,’ umweo koti ni fyenka filya baYehova Lesa balukufwaya, ukulukuliko inshiku shonse lukoso!