Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Kani Findo Baibolo Muli Bucine Isambisha?

Kani Ifi Efi BaLesa Baalukufwaya?

Kani Ifi Efi BaLesa Baalukufwaya?

KANI mwapenda inyunshipepala iili yonse, mwatamba TV, neli mwakutika ku cilimba, mulukusangana amalyashi aengi pa lukansa, inkondo, ne fyakutiinisha fya bapate! Langulukeni pa makatasho enu. Cipale ubulwashi neli imfwa ya bakwabenu filukumuleteleni ukukatashiwa ukukulu. Mungomfwa koti ni fyefyo umuntu umuweme Jobo aumfwile, uwalabile ati ukukatashiwa kwanji ‘kungacila ukulema na pa misenga iya ku fishiba.’—Jobo 6:2, 3.

Langulukeni pali fifi:

  • Kani ifi efi baLesa baalukufwaya ubwikashi bwanji ne bwa bantu bambi ukuba?

  • Mba nikwisa ningasangana ifyakungofwa ukushilisha amakatasho?

  • Kani kuli ubucetekelo bwakweba’ti pa calo pakaba ubutende?

Baibolo ilasuka ifyelelwe kuli fifi ifyakwipusha.

 BAIBOLO ILASAMBISHA ATI BALESA BAKACITE’FI FINTU PA CALO.

“Bakasumwina iminsosi yonse kumenso abo; tapakalukuli imfwa libili, neli ninsoni, neli kulila, neli kusomenwa konse, tau.”—Ukufisulula 21:4

“Ukonaicile akasotoka koti musope.”—Yisaya 35:6

“Nemenso ampofu akasibulwa.”—Yisaya 35:5

‘Abantu bonse abali mu filende bakafumamo.’—Yoane 5:28, 29

 “Injikale taikalabila ati: Ndukulwala.”—Yisaya 33:24

“Pakalukuli [ifyakulya] amasaka aenji lukoso pacalo.”—Amasamo 72:16

 UKOFWAKO UKUTUNGASANGANA MULI FYEFYO BAIBOLO ISAMBISHA

Mwikana bwangu ukweba’ti ifyalabilwapo pa mabula akutanga fyakwalakanya lukoso. BaLesa balilaile ati bakacita koti kulaya kwabo, kabili Baibolo ilabuulishisha ifi bakacite’fi.

Baibolo ilapeela ukofwa na kumbi. Ilatulanga ifi tungekela ubwikashi bwa kulitemwesha ubwa cinenene bukumo. Mulangulukeko panini pa fimulengeni ukubombomana ne makatasho enu. Fyenke’fi fintu fili koti kubulwa ukukwate’ndalama, amakatasho amu cisoolo, ukulwala, neli ukufwa kwa bakwabenu. Baibolo koti yamofweni ili mwakwata amakatasho muli bulelo, kabili koti yapeela ukofwa pa kwasuka ifyakwipusha koti ni fifi:

  • Mba nindo tupengela?

  • Kani tungacita shani ili twakatashiwa mu bwikashi?

  • Kani tungacita shani pakweba ati icisoolo cesu cibe icisangalele?

  • Mba nicindo cicitika kani umuntu afwa?

  •  

  • Tungacetekela shani ati baLesa bakafishapo imilayi yabo iya kuntangile?

 Pakuti mulukupenda ili buuku cilukulangisha ukweba’ti mulukufwaya ukwishiba ifi Baibolo isambisha. Ili buuku likamofweni. Boneni ukweba’ti amapalakalafu alikwete ifyakwipusha panshi ye bula. Abantu abengi balatemwa ukupyungisha inshila ya kwipusha ne kwasuka ili balukusambilila Baibolo na Bamboni sha baYehova. Tulukucetekela ati na mwebo mukaitemwa. BaLesa ngabamushukisheni pakuti bukumo mulukutatika ukulitemwesha kwa kusambilila ifi Baibolo muli bucine isambisha!