Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Kani Findo Baibolo Muli Bucine Isambisha?

 IFYEBO NA FIMBI

Kani BaYesu Balifyelwe mu December?

Kani BaYesu Balifyelwe mu December?

BAIBOLO taitubuulilepo ili baYesu bafyelwe. Nangabe’fyo, Baibolo ilatubuula icilangilila ukweba ati baYesu tabafyelwepo mu December.

Langulukeni ifi umwela uba impindi ya December mu Betelemi, mopele umo baYesu bafyalilwe. Umwenshi wa Cisalefi uwa baJuda (muli ino mpindi myenshi ya November/December) kwalukutanta kabili kwalukuba ne mfula. Umwenshi uwakonkele pali uyo ni Tebeti (December/January). Kwalukutanta iyo impindi ya mwaka icakweba ati kwalukuba ne candwa (snow) mu mipunda umuli amapili. Lekeni tubone pano ifi Baibolo ilabilapo ifi umwela wali muli cilya calo.

Umulembeshi wa Baibolo Esila alatubuula ukweba ati umwenshi wa Cisalefi muli bucine wali mwenshi ili kwalukutanta kabili kwalukuba ne mfula. Panuma yakulabila ati abantu balilibunganishishe ku Jelusalemi “pamwensi wabuisanu naine [Cisalefi], pakasuba kamakumi abili akamwensi uyo,” Esila alilondele ati abantu ‘baalukututuma pakuti pa mfula ikulu.’ Ukulosha ku mwela ifi wali pali ilya mpindi iya mwaka, abantu abenji ababungene pamo abene kabalabila ati: “Nimpindi yamfula iyinji; lomba tatwisi  ukwimakana posonde.” (Esila 10:9, 13; Jelemiya 36:22) Kanshi e mulandu bacembela abalukwikala ku Betelemi tabalukuyapo mu kwembelela ukutali impindi ya bushiku ili umwenshi wa December waisa!

Nangabe’fyo, Baibolo ilatubuula ukweba ati bacembela bali mwiyamba mu kwembela imbelele shabo ubushiku baYesu bafyelwe. Muli bucine, umulembeshi wa Baibolo Luku abuulishisha ati pali ilya mpindi, kwali bacembela “abalukwikala pacembelelo nekulukulaŋga-laŋga ubusiku petaŋga lyabo lyambelele” apepi ne mushi wa Betelemi. (Luku 2:8-12) Boneni ukweba ati abembeshi balukwikala posonde, takwalipo kufakasha lukoso impindi ya kasuba. Bali ne tanga lya mbelele shabo impindi ya bushiku. Pano filya mu Betelemi mwalukutanta ne mfula makosa impindi ya December, abembeshi bangaba mwiyamba ne tanga lya mbelele shabo? Koku, tekuti babepo. Ifyacitikile pa kufyalwa kwa baYesu filatubuula ukweba ati tabafyelwepo mu December. *

Amashiwi abaLesa alatubuulishisha ili baYesu bafwile, pano pa lwa kasuba bafyelwe, finini Amashiwi abaLesa atubuula. E mulandu ne Mfumu Solomoni yalabilile ukweba ati: “Isina iliweme ilicilile ukuwama napamafuta amakwebo apatali; kabili akasuba kakufwa kulicilile ukuwama napakasuba kakufyalwa kwamuntu.” (Uwakutulisya 7:1) Tekuti tukankamanepo, penka, ukubona umulandu Baibolo ilabililepo ifyakuti ubwingi pa lwa kupyunga kwa baYesu ne fyakonshiwilwe pa kufwa kwabo.

Ili baYesu bafyelwe, abembeshi ne matanga abo bali mwiyamba ubushiku

^ par. 1 Kani mulukufwaya ifyebo na fimbi, koti mwabona ibuuku lya Ukupelulula Ukufuma Mu Malembo pa mabula 45-49, ilya mu Cibemba ilitulishiwe ne Mboni sha baYehova.