KANI mwebo mulalanguluka ati findo fikacitika pa Kasuba ka Kusololola? Abengi balalanguluka ati umo umo, amamilyoni abantu akatwalwa kwi tebe lya baLesa. Kulya, eko umo umo bakamusololola. Bambi bakalambulwa ukuya mu kwikala mu paladaiso kwiulu, bambi nabo bakasolololwa ukuya mu kukululushiwa mu mulilo umuyayaya. Nangabe’fyo, Baibolo ilalabila ifipuseneko pali yeyo impindi. Amashiwi abaLesa alabuulishisha ati talipo ni mpindi ya kutiinisha, sombi ati ni mpindi ya bucetekelo ne kubuukulushe’fintu.

Pa Ukufisulula 20:11, 12, tulapendapo ukubuulishisha kwa ntangishi Yoane ukwa Kasuba ka Kusololola ati: “Nalibwene itebe ilitubile ilikulu, nababo abaikele-po; nakumenso abo ekwabutucile ukufuma icalo capansi neulu: tapabwenekele apa fiŋgekala. Popele nalibwene abafwile abacepele nebacindeme, baliimakene pamenso etebe; lomba amabuku aliifunwinwe-po; nebuku limbi nalyo lyaliifunwinwe-po, ilyo libuku lyaMweo; popele imilandu yabafwile yalisololwelwe kufintu ifyo ifyalembelwe mumabuku, koti milimo yabo.” Mba ninani Umusololweshi uwalabilwapo apa?

BaYehova Lesa e Basololweshi abacilile aba bantunshi. Nangabe’fyo, balipeele umbi umulimo wa kusololola. Koti ni fyefyo tupenda pa Ifyacitilwe 17:31, intangishi Paulu yalilabiile ati baLesa “baliansicile akasuba ako bakasololola-mo nebamucalo ukuluŋgeme kumuntu uyo uyu basalulwile.” Uyu Umusololweshi uusalulwilwe ni baYesu Klistu ababuushiwe. (Yoane 5:22) Pano, lomba, nilwisa Akasuba ka Kusololola kakatatika, kabili nilwisa kakashila?

 Ibuuku lya Ukufisulula lilalangisha ati Akasuba ka Kusololola kakatatika panuma ya nkondo ya Amagedono, ili ubwikashi bwakwe Satana pa calo bukonalwa. * (Ukufisulula 16:14, 16; 19:19–20:3) Panuma ya Amagedono, Satana ne fibanda fyakwe bakakakwa mu cikanda imyaka imyanda ikumi (1,000). Mu mpindi iyo, ba 144,000 abakuteka nabo kwiulu bakaba abasololweshi “nekulukwikaliko’bufumu pamo nabaKlistu imyaka imyanda ikumi.” (Ukufisulula 14:1-3; 20:1-4; AbaLoma 8:17) Akasuba ka Kusololola talipo ati ni mpindi ice iikashila lukoso mu maawala 24. Kasuba ka myaka imyanda ikumi (1,000).

Mu myake’yo imyanda ikumi, baYesu Klistu ‘bakasololola abalabi ne bafwile.’ (2 Timote 4:1) ‘Abalabi’ bakaba ‘libumba lya bantu ilikulu’ ilikapuluka pa Amagedono. (Ukufisulula 7:9-17) Intangishi Yoane nakabili yalibwene “abafwile . . . baliimakene pamenso etebe” lya kusololola. Koti ni fyefyo baYesu baalaile, abantu “abali mufilende bakomfwe’siwi lyakwe [Klistu], nekufuma-mo” ukupitila mu kubushiwa. (Yoane 5:28, 29; Ifyacitilwe 24:15) Pano ni pali fiisa fintu bakabasololwela?

Koti ni fyefyo intangishi Yoane yabwene, “amabuku aliifunwinwe-po,” kabili “imilandu yabafwile yalisololwelwe kufintu ifyo ifyalembelwe mumabuku, koti milimo yabo.” Kani mu mabuuku aya mulilembelwe imilimo ya kale iya bantu? Koku, abantu tabakasolololwapo pakuti pa fintu baalukucita ili tabangafwa. Mba tuliishi shani ifyo? Baibolo ilalabila ati: “Uyo uwafwile alikakulucile kukubifya.” (AbaLoma 6:7) Fyopele’fyo, ifyakubifya fya baabo abakabuushiwa fikafuutwa. Pakuti pali fyefyo, ayo amabuuku alyelelwe ukwimakaninako ifintu na fimbi ifi baLesa bakafwaya ati ficitwe. Pakweba ati bakekale umuyayaya, cikabe’celelwe kuli baabo abakapuluka pa Amagedono na baabo abakabuushiwa ukulonda amafunde abaLesa, ukubikako lukoso na fyonse ifya bukumo ifi baYehova bakafisulula mu myaka imyanda ikumi (1,000). Fyopele’fyo, abantu bakasolololwa pakuti pa fintu ifi bakacita mu Kasuba ka Kusololola.

Mu Kasuba ka Kusololola abantu bakakwata ishuko lya kutanga ilya kusambilila ne kucita ukufwaya kwa baLesa. Kukaba  umulimo uukulu uwa kusambisha. Icinenene, ‘aba mu calo bakasambilila ukulungama.’ (Yisaya 26:9) Nangabe’fyo, talipo ni bonse abakafwaya ukulukucita ukufwaya kwa baYehova. Yisaya 26:10 alalabila ati: “Naŋgaba’ti alukupoka uluse uwakubifya, tekuti asambile ukuluŋgama; mucalo umuli ukusicimana aŋgacite’fyakubifya, nekubulo’kubona ubukulu bwabaYawe [baYehova].” Aba abakubifya bakonalwa umuyayaya mu Kasuba ka Kusololola.—Yisaya 65:20.

Pa kushila kwa Kasuba ka Kusololola, abantunshi abakapuluka ‘bakaba ne mweo’ mu cinenene pakuti bakaba abantunshi abawaminine. (Ukufisulula 20:5) Fyopele’fyo, mu Kasuba ka Kusololola, abantunshi bakabwelela mu mibelo ya kuba abawaminine koti ni fifilya baali pa kutanga. (1 AbaKolinto 15:24-28) Eli pano kukaba ukweshiwa kwa kupelako. Satana bakamukakulula mwi kati lyakwe kabili bakamusuminisha ukwesha abantunshi impindi ya kupelako. (Ukufisulula 20:3, 7-10) Abo abakamucicila bakasangalala ukuba pali babo Baibolo ilaya ati: “Abaluŋgeme bakapyane’calo, bakalukwikala-mo insiku syonse lukoso.” (Amasamo 37:29) Inya, Akasuba ka Kusololola kakaba lishuko ku bantunshi bonse ababucetekelo!

^ par. 1 Ukulosha kuli Amagedono, twamukombeteleni ati mubone mwi buuku lya Insight on the Scriptures, Volume 1, amabula 594-595, 1037-1038 ilya mu Cisungu, kabili mubone icapitala 20 mwi buuku lya Pepeni Lesa Wine Wine Eka ilya mu Cibemba. Onse obilo alatulishiwa na Bamboni sha baYehova.