Tolokeleni

Tolokeleni muye pa filukusangwamo

 IFYEBO NA FIMBI

BaYesu Klistu—BaMasaya Balailwe

BaYesu Klistu—BaMasaya Balailwe

PA KUTOFWAKO ukubeshiba baMasaya, baYehova Lesa baalibuulile abakushimika aba mu Baibolo abengi ukubuulishisha utwishibilo twa pa kufyalwa, utwa pa kutulisha, ne twa pa mfwa ya baabo abalailwe ukupulusha abantunshi. Fyonse ifi ifyakushimika fyalikonshiwe muli baYesu Klistu. Ifi ifyakushimika filungeme  kabili filibuulishiwe bwino. Pakweba ati tumfwishe’fi, ngatulangulukepo pa fyakushimika finini lukoso ifyashimikile ukufyalwa kwa baMasaya ne bwanice bwabo.

Uwakushimika Yisaya alishimikile ati baMasaya bakafyalilwa mu citentekwa ca Mfumu Dafidi. (Yisaya 9:7) Muli bucine, baYesu balifyalilwe mu citentekwa cakwe Dafidi.—Matayo 1:1, 6-17.

 Mika, uwakushimika naumbi uwa baLesa, aalishimikile ati uyu umwanice mukupita kwa mpindi akaba mwikalicishi kabili kaalabila ati akafyalilwa mu ‘Betelemi Efilata.’ (Mika 5:2) Pa mpindi baYesu bafyalilwepo, kwali imishi ibili mu Isilaeli iyalukwitwa ati Betelemi. Umo wali apepi na ku Nasaleti ku nofu ya Isilaeli, naumbi nao, wali apepi na Jelusalemi mu Juda. Betelemi uwali apepi na Jelusalemi akale walukwitwa ati Efilata. BaYesu balifyalilwe muli wenka ulya umushi, koti ni fyopele filya ukushimika kwalabiile!—Matayo 2:1.

Na kumbi ukushimika ukwa mu Baibolo kwalishimikile ati Umwana wa baLesa akeetwa ‘ukufuma mu Ijipiti.’ Ili baali abanice, baYesu baalibatwite ku Ijipiti. Pano kabababweleshamo kwabo ukubafumya ku Ijipiti panuma ili Elode afwile, namulifyefyo ukushimika kwalikonshiwe.—Osiya 11:1; Matayo 2:15.

Muli cati iili pe bula 200, amalembo aatantikilwe panshi ya mutwi uulukulabila ati “ Ukushimika” alukulabila pa fyebo ifya kuli baMasaya. Tulukumukombeteleni ukupalanyako aya amalembo na opele ayo aatantikilwe panshi ya mutwi uulukulabila ati “Ukukonshiwa.” Ukucite’fyo kwakukosha ubucetekelo bwenu mu kulungama kwa Mashiwi abaLesa.

Ili mulukusalala aya amalembo, mwanuke ati ayo aalukulabila pa kushimika aalilembelwe ninshi kucili imyaka iingi ukweba ati baYesu bafyalwe. BaYesu kabalabila ati: ‘Ifintu fyonse ifilembelwe mu Mafunde akwe Mose na mu Bakushimika na mu Masamo, ifya kuli nebo, filyelelwe ukukonshiwa.’ (Luku 24:44) Koti ni fyefyo mungabona mu Baibolo yenu, fyonse lukoso ifi ifyakushimika fyalikonshiwe ukwakubulo’kushako!