Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 116: Ifitungekala Umuyayaya

Icisimicisyo 116: Ifitungekala Umuyayaya

KANI ungalabila ifi moye umwanice ne babyakwe balukupenda? Inya, ni lilino lyenke’buku ili ulukupenda—Ibuku Lyanji Ilya Fisimicisyo fya mu Baibolo. Kabili balukupenda cino cenke’cisimicisyo ici ulukupenda—“Ifitungekala Umuyayaya.”

Umusankwa alukupenda

Kani waisiba ifibalukusambilila? Ica kutanga, ici twelelwe ukucita kwisiba pali baYehoba na Yesu Umwana wabo pakweba’ti tukekale umuyayaya. Baibolo ilalabila ati: ‘Iyi e nsila tungekalilamo umuyayaya. Tusambilile pali baLesa bacine benka, ne Mwana batumine pa calo, Yesu Klistu.’

Mba tungasambilila syani pali baYehoba Lesa na pali Yesu Umwana wabo? Insila imo kupenda Ibuku Lyanji Ilya Fisimicisyo fya mu Baibolo ukufuma ku kutanga ukufika na kumpelo. Lilatubule’fingi pali baYehoba na pali baYesu, tali e fyenka? Kabili lilalabile’fingi pa fintu ifibacitile ne fintu ifibali ne kucita. Pano tulyelelwe ukucite’ficililepo pa kupenda lukoso ili ibuku.

Baibolo

Kani walibona lilya limbi ibuku ilili pansi? Ni Baibolo. Eba umbi akupendele ifiputusya ukufuma mu Baibolo apo apalukufuma ifisimicisyo fya mwi buku lino. Baibolo ilatubula ilyasi ilikumanine ilitufwaya pakweba’ti fwebo fwense tungabapyungila baYehoba mu nsile’ilungeme ne kupoka umweo wa muyayaya. Kansi tulyelelwe ukwikatisya ukusambilila Baibolo ne munkonsya.

Pano ukusambilila lukoso pali baYehoba Lesa na baYesu Klistu talipo epo tungapelela lukoso. Tungabesiba ukwakuti ne kusambisya kwabo, nangabe’fyo tekuti tuupokepo umweo wa muyayaya. Kani wacisiba cimbi icifwaikwa?

Tulyelelwe nakabili ukucite’fintu fyefyo tusambilila. Kani wamwisiba Juda Isikalyote? Aali pa bali 12 abo baYesu basalulwile ukube’ntangisi syabo. Juda alibesi makosa baYehoba na baYesu. Mba findo fyacitikile kuli ye? Mukupita kwa mpindi alibele ne lunkumbwa, kabili alilobele baYesu ku bapate babo pa ndalama sye silifa 30. Popele Juda takapokapo umweo wa muyayaya.

Kani wamwanuka Geasi, umwalalume twasambililepo mu Cisimicisyo 69? Alukufwaya ukukwatako fimo fimo ifyakufwala ne ndalama ifitafyali fyakwe. Popele alibepele pakweba’ti engafipoka ifi ifintu. Pano baYehoba balimupanikile. Kabili bakatupanika nafwebo kani tatumfwilile amafunde abo.

Pano kuli abengi abantu abaweme abo abapyungiile baYehoba lyonse mu bucetekelo. Tulukufwaya ukuba koti nibo, tali e fyenka? Samweli umwanice cakubwenako iciweme ica kulonda. Anuka, koti nifyefyo twabwene mu Cisimicisyo 55, aali cipale ne myaka sine neli sisanu isya kufyala ili atatikile ukupyungila baYehoba pe sema lyabo. Popele nangaba’ti uli mwanice lukoso, taulipo uli mwanice makosa ukweba’ti tekuti ubapyungile baYehoba.

Muli bucine, umuntu fwense tulukufwaya ukulonda ni baYesu Klistu. Neli baali lukoso abasankwa, koti nifyefyo ifilangililwe mu Cisimicisyo 87, emo baali mwi tempuli baalukusambisya nabambi pali baWisibo aba kwiulu. Lekeni tulonde icakubwenako cabo. Lekeni tubuleko abantu abengi ukufika apo tungakumanisya pali baLesa wesu baYehoba na pa Mwana wabo, Yesu Klistu. Kani twacite’fi fintu, eli tukekalamo umuyayaya mu paladaiso wa bukumo uwa baLesa pa calo.

Yoane 17:3; Amasamo 145:1-21.



Ifyakwipusya

  • Mba nifindo twelelwe ukwisiba kani tulukufwaya ukwikala umuyayaya?
  • Mba tungasambilila syani pali baYehoba Lesa na pali baYesu, koti nifyefyo ifi moye umwanice ne babyakwe balukucita mu cikope?
  • Mba nilise’buku limbi ulukubona mu cikope, kabili mba nindo twelelwe ukulukulipendela libili libili?
  • Ukulundapo pa kusambilila pali baYehoba na baYesu, mba nicisa cimbi ici twelelwe ukucita kani tulukufwaya ukunonka umweo wa muyayaya?
  • Mba nicindo tusambililako ku Cisimicisyo 69?
  • Kani icakubwenako iciweme icakwe Samweli umwanice icisimikilwe mu Cisimicisyo 55 cilalangisye’ndo?
  • Kani tungalonda syani icakubwenako ca baYesu, kabili kani twacite’fyo, findo tukacita kuntangile?

Ifyakwipusya na fimbi

  • Pendeni Yoane 17:3.

    Kani Amalembo alalanga syani ukweba’ti ukutwalilila ukubesiba baYehoba Lesa na baYesu Klistu tacalulapo ati kulukusungila lukoso mu mutwi ifintu ifya cine? (Mat. 7:21; Jako. 2:18-20; 1 Yoa. 2:17)

  • Pendeni Amasamo 145:1-21.

    Mba nifisa fimo fimo ifi twelelwe ukulukubapelelapo ubuleme baYehoba? (Amasa. 145:8-11; Fisu. 4:11)

    Kani baYehoba bali syani ‘abaweme ku bantu bonse,’ kabili ubune bwabo bungatupalamisya syani kuli bo? (Amasa. 145:9; Mat. 5:43-45)

    Kani tulibatemenwe baYehoba ne mutima wesu wonse, cikatulenga ukucite’ndo? (Amasa. 119:171, 172, 175; 145:11, 12, 21)