Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 105: Ukupembelela mu Jelusalemi

Icisimicisyo 105: Ukupembelela mu Jelusalemi

ABA bantu abali apa basambile ba baYesu. Babomfwila baYesu kabili baikala mu Jelusalemi. Kabili ili bonse bacili balukupembelela pamo, icongo icikulu caisula mu ŋanda monse. Cilukumfwika koti kupuupa kwa cipuupu icikulu. Kabili eli imini sya mulilo syatatika ukubwenekela pa mitwi yabo bonse abasambile. Kani waibona imililo pa mitwi yabo bonse? Mba findo filukwalula fyonse’fi?

Umupashi uswetelele pa basambile ba kutanga

Cimpelampela! BaYesu bali kwiulu na baWisibo, kabili balukupela umupasi uswetelele uwa baLesa ku basambile babo. Kani waisiba ifi uyu umupasi wabalengo’kucita? Bonse batatika ukulabila mu milaka iipusenepusene.

Abantu abengi mu Jelusalemi baumfwa icongo icilukumfwika koti cipuupu icikulu, kabili baisa mu kubona ifilukucitika. Bamo bamo abantu balifumine mu mikoka imbi abaisa kuno mu kubungana kwa baIsilaeli ukwa Pentekosite. Mama icakukankamika aba bensu bapokelela! Baumfwa abasambile balukulabila mu milaka yabo pa lwa fintu ifiweme ifi baLesa bacitile.

Abensu balabila ati: ‘Aba bantu bonse balifumine ku Galili. Mba syani, lomba, bo balukulabila imilake’yi ipusenepusene iya ku fyalo uko tufumine?’

Petilo pano aimakana ati abalondolwele. Abilikisya ne kubabula ifi baYesu babepeye kabili nekweba’ti baYehoba balibabusisye baYesu pa bafwile. Petilo alabila ati: ‘Pano baYesu bali kwiulu ku kuboko kwa baLesa ukwa kulwine. Kabili bapela umupasi uswetelele uwalailwe. Emulandu mwabwena ne kumfwila ifi fimpelampela.’

Ili Petilo alabila ifi fintu, abantu abengi babombomana ukwakuti pa fyacitilwe kuli baYesu. Baipusya ati: ‘Mba tucite syani?’ Petilo ababula ati: ‘Mulyelelwe ukwalula imibelo yenu kabili mubatisiwe.’ Popele pali kenka kalya akasuba abantu apepi na 3,000 babatisiwa kabili baba basambile ba baYesu.

Ifyacitilwe 2:1-47.



Ifyakwipusya

  • Koti nifyefyo ifilangilwe mu cikope, findo fyacitika ku basambile ba baYesu abalukupembelela mu Jelusalemi?
  • Mba nicisa cintu cabakankamika abensu abaisa ku Jelusalemi?
  • Kani findo Petilo abalondolwela abantu?
  • Kani abantu baumfwa syani panuma yakukutika kuli Petilo, kabili findo ababula ukweba’ti bacite?
  • Nibanga abantu ababatisiwa pa kasuba ako aka Pentekosite, 33 C.E.?

Ifyakwipusya na fimbi

  • Pendeni Ifyacitilwe 2:1-47.

    Kani amasiwi akwe Petilo aasangwa pa Ifyacitilwe 2:23, 36 alalanga syani ukweba’ti umukoka wa baJuda wonse wali ne mulandu wa kwipaya baYesu? (1 Tes. 2:14, 15)

    Kani Petilo alipele syani icakubwenako iciweme mu fyakwalakanya ifya mu Malembo? (Cit. 2:16, 17, 29, 31, 36, 39; Kolo. 4:6)

    Kani Petilo alipyungisye syani “imipinjilo yaBufumu bwaKwiulu” iyakutanga, yeyo baYesu bamulaile ukumupa? (Cit. 2:14, 22-24, 37, 38; Mat. 16:19)