Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 104: BaYesu Babwelela Kwiulu

Icisimicisyo 104: BaYesu Babwelela Kwiulu

MUKUYA kwa nsiku, baYesu balibwenesya ku basambile babo imiku iingi. Pa mpindi imo bababona cipale ku basambile 500. Ili babonekela kuli bo, kani waisiba ifi baYesu balabilapo kuli bo? Bufumu bwa baLesa. BaYehoba balitumine baYesu pa calo mu kusambisya pa Bufumu. Kabili batwalilila ukucite’ci na panuma ya kubusiwa ukufuma ku bafwile.

BaYesu babwelela kwiulu

Kani ulukubwanuka ubufumu bwa baLesa ati ni cindo? Inya, Ubufumu buteko ubwa cinenene ubwa baLesa ubwa kwiulu, kabili baYesu ni Babo baLesa basalulwile ukuba imfumu. Koti nifyefyo twasambilila, baYesu balilangisye ifi bakaba imfumu iiweme ukupitila mu kuliisya abansala, ukuposya abalwasi, kabili ne kubusya abafwile!

Popele ili baYesu bakateka koti ni mfumu mwiulu pa myaka imyanda ikumi, kani icalo cikaba syani? Inya, icalo conse cikalengwa ukuba paladaiso iiweme. Takukabapo inkondo, bumapusi, ukulwala, neli nimfwa. Tulisi ati ifi fya cine nipakuti baLesa balilengele icalo ukuba paladaiso pakweba’ti abantu bakasangalale. Emulandu balengele ibala lya Edeni pa kutanga. Kabili baYesu bakasininkisya ukweba’ti ifi baLesa bafwaile ukucita mukupelako fyacitwa.

Pano impindi yafika iyakweba’ti baYesu babwelelemo kwiulu. Pa nsiku 40 baYesu balukulibwenesya ku basambile babo. Popele basininkisya ati balabi nakabili. Pano ili tabangabasya abasambile babo bababula ati: ‘Mwikale mu Jelusalemi mpaka mukapokelele umupasi uswetelele.’ Umupasi uswetelele makosa abaLesa aapyunga, aali koti ni kabesya iilukupuupa, woyo eukofwa abasambile babo ukucita ukufwaya kwa baLesa. Mukupelako, baYesu balabila ati: ‘Mukatulisye pali nebo ukufika ne kupelele’calo.’

Panuma baYesu balabile’fi, icintu icakukankamika cacitika. Batatiko’kuya kwiulu, koti nififi ulukubona apa. Eli ikumbi lyabafisa tabalukuboneka, kabili ne basambile tabalukubabonapo baYesu nakabili. BaYesu baya kwiulu, kabili kwenka kulya batatika ukuteka abasambile babo pa calo.

Abasambile balukulolesha mwiulu

1 AbaKolinto 15:3-8; Ukufisulula 21:3, 4; Ifyacitilwe 1:1-11.



Ifyakwipusya

  • Kani nibanga abasambile ababona baYesu pa mpindi imo, kabili nifindo balabila kuli bo?
  • Kani Ubufumu bwa baLesa nicindo, kabili ubwikasi bukaba syani pa calo ili baYesu bakateka koti ni Mfumu pa myaka imyanda ikumi?
  • Kani baYesu babonekela imiku inga ku basambile babo, pano nimpindi yabo iyakucite’ndo?
  • Ili tabangabasya abasambile babo, mba nifindo baYesu bababula ukucita?
  • Mba nifindo ifilukucitika mu cikope, kabili baYesu baleka syani ukuboneka?

Ifyakwipusya na fimbi

  • Pendeni 1 AbaKolinto 15:3-8.

    Mba nindo yalengele intangisi Paulu ukulabila mu kusipa palwa kubuuka kwa baYesu, kabili nipali findo abaKlistu muli bulelo bangalabila mu kusipa? (1 Kol. 15:4, 7, 8; Yisa. 2:2, 3; Mat. 24:14; 2 Tim. 3:1-5)

  • Pendeni Ifyacitilwe 1:1-11.

    Kani umulimo wakutulisya walifikile pi, koti nifyefyo Ifyacitilwe 1:8 fisimika? (Cit. 6:7; 9:31; 11:19-21; Kolo. 1:23)