Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 99: Mu Cipinda ca Peulu

Icisimicisyo 99: Mu Cipinda ca Peulu

NI PA Cinai ubusiku pano, papite’nsiku sibili. BaYesu ne ntangisi syabo 12 baisa mu cipinda ici cikulu ica peulu mu kulya icakulya ca Muciluko. Umwalalume wabona uulukuya ni Juda Isikaliote. Alukuya mu kubula abapapatilisi ifi bangekata baYesu.

Icakulya ca cingulo ica baShikulu

Akasuba kafumako lukoso, Juda aalile kuli bo ne kubepusya ati: ‘Mba mwankumpele’ndo kani namofweni ukwikata baYesu?’ Kabalabila ati: ‘Isye silifa amakumi atatu.’ Popele Juda alukuya mu kucinsya aba balalume pakweba’ti abatungulule kuli baYesu. Mbe’ci tacilipo cibipile?

Icakulya ca Muciluko casila. Pano baYesu batatika nacimbi icakulya icilibelele. Batambike’ntangisi syabo sinkwa ne kulabila ati: ‘Lyeni, pakuti ici cilukupilibula umubili wanji uuli ne kupelwa pakuti pali mwebo.’ Eli babatambika inkomeki ya mfaina ne kulabila ati: ‘Nweni, pakuti ici cilukupilibula umulopa wanji, uuli ne kupokomokela pakuti pali mwebo.’ Baibolo ilete’ci ati ‘icakulya ca cingulo ica baSikulu,’ neli ‘umulalilo wa baSikulu.’

AbaIsilaeli baalukulya ica Muciluko ku kubanusyako ili inkalamba ya baLesa ‘yacilukile’ amaŋanda abo mu Ijipiti, pano kaipaya ababele mu maŋanda abaIjipiti. Pano lomba baYesu balukufwaya abasambile babo ukulukubanuka, kabili ne fibapele umweo wabo pali bo. Kabili uyo e mulandu bababulila ukulukusefya ici cakulya icilibelele cila mwaka.

Panuma yakulya Icakulya ca Cingulo ica baSikulu, baYesu babula intangisi syabo ukuba abasipile kabili abakosele muli bucicetekelo. Mukupelako, baimba inyimbo kuli baLesa kabili eli baya. Pano bwaila makosa, cipale ukucila pakati ka busiku. Leka tubone uku baya.

Matayo 26:14-30; Luku 22:1-39; Yoane ifyapitala 13 ukufika ku 17; 1 AbaKolinto 11:20.



Ifyakwipusya

  • Koti nifyefyo tulukubona mu cikope, kani nindo baYesu ne ntangisi syabo 12 babelele mu cipinda ca peulu?
  • Kani umwalalume uulukuya ninani, kabili alukuya mukucite’ndo?
  • Kani baYesu batatika ciisa icakulya icilibelele panuma ya kusila icakulya ca Muciluko?
  • Ica Muciluko calukubanusye’ndo abaIsilaeli, kabili’ci cakulya icilibelele cilabanusye’ndo abasambile ba baYesu?
  • Panuma ya Cakulya ca baSikulu ica Cingulo, mba nifindo baYesu babula abasambile babo, kabili nifindo bacita?

Ifyakwipusya na fimbi

  • Pendeni Matayo 26:14-30.

    Kani Matayo 26:15 ilalangisya syani ati filya Juda acitile ili alobele baYesu fyalyansikilwe?

    Kani niisa imilimo yobilo umulopa wa baYesu uwapokomokele upyunga? (Mat. 26:27, 28; Jele. 31:31-33; Efes. 1:7; Ebeya. 9:19, 20)

  • Pendeni Luku 22:1-39.

    Kani Satana alingile syani muli Juda? (Luku 22:3; Yoa. 13:2; Cit. 1:24, 25)

  • Pendeni Yoane 13:1-20.

    Koti nifyefyo ifilembelwe pali Yoane 13:2, kani tungalabila ati Juda alibifisye pa fiacitile, kabili nifindo abapyungisi ba baLesa bangasambililako kuli cici? (Taŋ. 4:7; 2 Kol. 2:11; Gal. 6:1; Jako. 1:13, 14)

    Mba nifindo baYesu basambisye mu fibacitile? (Yoa. 13:15; Mat. 23:11; 1 Pet. 2:21)

  • Pendeni Yoane 17:1-26.

    Ili baYesu batembele ati abasambile babo “bakalukwikele bamo” kani balipilibwile’ndo? (Yoa. 17:11, 21-23; Loma. 13:8; 14:19; Kolo. 3:14)