Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 84: Inkalamba Yafakasya Kuli Maliya

Icisimicisyo 84: Inkalamba Yafakasya Kuli Maliya

UYU mwanakasi umulombe ni Maliya. MuIsilaeli, uwikala mu musi wa Nasaleti. BaLesa balisi ati muntu umuweme. Emulandu batumina Gabiliyeli inkalamba yabo ukulabila kuli ye. Kani waisiba ici Gabiliyeli aisa mu kubula Maliya? Leka tubone.

Gabiliyeli alabila kuli ye ati: ‘Mutende, webo we mucindeme. BaYehoba bali na webo.’ Maliya tangamubonapo uyu muntu. Abombomana, nipakuti tesibilepo umualosya. Pano penka’po Gabiliyeli amufumyamo umwenso.

Maliya

Alabila ati: ‘Witina, Maliya. BaYehoba balisangalele makosa pali webo. Emulandu bakacitile’ciweme kuli webo. Bukumo ukakwata umwana. Kabili ukamwilika ati ni Yesu.’

Gabiliyeli atwalilila ukulondolola ati: ‘Uyu umwana akaba umucindeme, kabili aketwa ati Mwana wa baLesa Abacilile. BaYehoba bakamwikalika pa bufumu, koti nififilya Dafidi aali. Pano Yesu akaba ni mfumu ya muyayaya, ne bufumu bwakwe tabukasilapo!’

Maliya aipusya ati: ‘Mbe’fi fyonse fingaba syani? Pakuti nsingopwa. Nsingekalapo ne mwalalume, pano ningakwata syani umwana?’

Gabiliyeli aasuka ati: ‘Amakosa abaLesa akesa pali webo. Popele umwana aketwa ati Umwana wa baLesa.’ Eli aeba Maliya ati: ‘Anuka umukwanu Elisabeti. Abantu baalilabile ati alicekwile uwa kukwata abana. Pano bukumo akakwata umwana. Popele wabona ati takulipo icibakanga baLesa ukucita.’

Penka’po Maliya alabila ati: ‘Ene musyakasi wa baYehoba! Ngaficitwe kuli nebo koti masiwi enu.’ Eli inkalamba yakumbuluka.

Maliya aendesya ukuya mu kufakasya kuli Elisabeti. Ili Elisabeti aumfwa isiwi lyakwe Maliya, umwana mwi pafu lyakwe Elisabeti acilauka pa kusangalala. Elisabeti aisulamo ne mupasi wa baLesa, kabili alabila kuli Maliya ati: ‘Ulicililepo ukusyuka pa banakasi bonse.’ Maliya aikala na Elisabeti apepi ne myensi itatu, kabili abwelelamo kwabo ku Nasaleti.

Maliya ali apepi ne kuupwa ku mwalalume uwe sina lya Josefi. Pano ili Josefi aisiba ati Maliya ali ne kukwata umwana, talangulukilepo ati alyelelwe ukumuupa. Eli inkalamba ya baLesa yalabila kuli ye ati: ‘Witina ukupinta Maliya ukuba umukasi wobe. Pakuti ni baLesa e bamupela umwana.’ Popele Maliya na Josefi baupana, kabili balukupembelela Yesu ukufyalwa.

Luku 1:26-56; Matayo 1:18-25.



Ifyakwipusya

  • Kani umwanakasi uuli mu cikope ninani?
  • Mba nifindo Gabiliyeli abula Maliya?
  • Kani Gabiliyeli alondolola syani kuli Maliya ati akakwato’mwana nangaba’ti taikelepo ne mwalalume?
  • Mba nifindo fyacitika ili Maliya afakasya kuli Elisabeti umukwabo?
  • Mba nifindo Josefi alanguluka ili aisiba ati Maliya akakwato’mwana, pano nindo aalwila ilangulusi lyakwe?

Ifyakwipusya na fimbi

  • Pendeni Luku 1:26-56.

    Kani Luku 1:35 ilalabila syani pa kubifya kwakwe Adama ukwali mu bufyasi bwakwe Maliya ili umweo wa Mwana wa baLesa baukuusisye ukufuma ku bwikasi bwa kwiulu? (Agayi 2:11-13; Yoa. 6:69; Ebeya. 7:26; 10:5)

    Kani Yesu alipokelele syani ubuleme ili tangafyalwa? (Luku 1:41-43)

    Kani abaKlistu muli bulelo bangatuntulula syani icakubwenako cakwe Maliya iciweme ili babapela imilimo iilibelele? (Luku 1:38, 46-49; 17:10; Ifisi.11:2)

  • Pendeni Matayo 1:18-25.

    Nangaba’ti Yesu tabamwilikile ati Imanweli, kani imilimo apyungile mu buntunsi yalyelelwe syani ifi lyenke’li isina lyalula? (Mat. 1:22, 23; Yoa. 14:8-10; Ebeya. 1:1-3)