Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 63: Solomoni Imfumu ya Mano

Icisimicisyo 63: Solomoni Imfumu ya Mano

SOLOMONI musankwa ili aba imfumu. Alitemenwe baYehoba, kabili alonda ukupanda amano ukuweme uku Dafidi wisi amupele. BaYehoba basangalala pali Solomoni, popele bumbi busiku balabila kuli ye mu muloto ati: ‘Solomoni, mba nindo ungatemwa ati nebo nkupele?’

Pali cici Solomoni aasuka ati: ‘BaYehoba mwe baLesa wanji, nebo ndi mwanice lukoso kabili nsiisipo ifya kuteka. Kansi lomba mpeleni amano akuteka abantu benu mu nsila iilungeme.’

BaYehoba basangalala pafi Solomoni alomba. Popele balabila ati: ‘Pakuti walomba amano ne kubulo’kulomba umweo uutali neli amaboni, nakukupela amano aengi ukucila ne uli onse uwaikeleko akale. Pano nakukupela nafyefyo ifi tolombele, amaboni ne buleme.’

Ili papita lukoso akapindi akanini abanakasi bobilo baisa kuli Solomoni ne kukatasya ukukosele. Umo umwanakasi pali bo alondolola ati: ‘Uyu mwanakasi na nebo tulekala mu ŋanda intu imo. Kamfyala umwano’mwalalume, kabili panuma ya nsiku sibili uyu mwanakasi naye alifyele umwano’mwalalume. Eli bumbi busiku umwana wakwe alifwile. Pano ili nali ncilele, alisile ne kubika umwana wakwe umufwile apepi na nebo kabili ne kupinta umwana wanji. Lomba ili nabukile ne kulolesya pa mwana umufwile, kambona’ti taalipo wanji.’

Pali cici umwanakasi uyo umbi alabila ati: ‘Tau! Umulabi mwana wanji, kabili umufwile mwana wobe!’ Umwanakasi wa kutanga aasuka ati: ‘Koku! Umufwile mwana wobe, kabili umulabi mwana wanji!’ Ifi efi aba banakasi bapikisyanya. Mba findo Solomoni akucita?

Atuma abakuleta impoko, kabili, ili yaletwa, alabila ati: ‘Pinika umwana umulabi pakati, kabili upele ku banakasi afu afu.’

Nyina wa cinenene alila ati: ‘Koku! Ndukumukombeteleni ati mwimwipaya umwana. Mumupele kuli ye!’ Pano umwanakasi uyo umbi alabila ati: ‘Mwimupela kuuli onse pali fwebo; pitilisyeni ne kumupinika pakati.’

Imfumu Solomoni ilukupikulula ukukatasha ukukosele

Mukupelako Solomoni alabila ati: ‘Mwimwipaya umwana. Mupeleni ku mwanakasi wa kutanga. Enyina wa cinenene.’ Solomoni aisibe’ci nipakuti nyina wa cinenene alimutemenwe umwana ukwakuti icakweba’ti asumina ukumupela ku mwanakasi uyo umbi pakweba ati umwana bemwipaya. Ili abantu baumfwa ifi Solomoni apikulwile ukukatasya, basangalala pa kukwata imfumu ya mano koti ni yeyo.

Mu mpindi ya kuteka kwakwe Solomoni, baYehoba basyukisya abantu ili balenga umusili ukumesya tiligu iingi na ba bali, ifisepo fya mifaina, imikuyu na fimbi lukoso ifyakulya. Abantu bafwala ifyakufwala ifiweme kabili baikala na mu maŋanda ayaweme. Kuli fintu ifingi ifiweme ukucila ne fingalinga umuntu uuli onse.

1 Imfumu 3:3-28; 4:29-34.



Ifyakwipusya

  • Mba findo baYehoba bamwipusya Solomoni, kabili aasuka syani?
  • Pakuti basangalala pafi Solomoni alomba, findo baYehoba bamulaya ukumupela?
  • Kani nikwisa ukukatasya ukukosele abanakasi babili baleta kuli Solomoni?
  • Koti nifyefyo ulukubona mu cikope, Solomoni apwisya syani uko kukatasya?
  • Ukuteka kwakwe Solomoni kwa musango syani, kabili nipali wisa mulandu?

Ifyakwipusya na fimbi

  • Pendeni 1 Imfumu 3:3-28.

    Findo abalalume abapelwe ifyakupyunga mu kwansika ukwa baLesa muli bulelo bangasambililako ku kulabila kwakwe Solomoni ukwakufuma pa mutima ukulembelwe pa 1 Imfumu 3:7? (Amasa. 119:105; Ifisi. 3:5, 6)

    Kani ukulomba kwakwe Solomoni kwaba syani cakubwenako iciweme ica fintu ifi twelelwe ukutembelelapo? (1 Imf. 3:9, 11; Ifisi. 30:8, 9; 1 Yoa. 5:14)

    Nicisa cicetekelo tukwete mu kuteka kwa kuntangile ukwakwe Solomoni Umukulu, baYesu Klistu, kani twabona ifi Solomoni apwisisye ukukatasya ukwali pa banakasi babili? (1 Imf. 3:28; Yisa. 9:6, 7; 11:2-4)

  • Pendeni 1 Imfumu 4:29-34.

    Kani baYehoba balyasukile syani ukulomba kwakwe Solomoni ukwa kukwato’mutima uwa milangwe iiweme? (1 Imf. 4:29)

    Kani twaalakanya ukupyunga uku abantu bapyungile pakweba’ti bomfwe amano akwe Solomoni, tulyelelwe ukukubona syani ukusambilila Amasiwi abaLesa? (1 Imf. 4:29, 34; Yoa. 17:3; 2 Tim. 3:16)