Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 61: Dafidi Bamubika pa Bufumu

Icisimicisyo 61: Dafidi Bamubika pa Bufumu

SAULU aesya ukwikata Dafidi nakabili. Apinta ifita 3,000 ukuya ili amufwaya. Ili Dafidi aisibe’ci, atuma abacetesi pakuti besibe uku Saulu ne balalume bakwe bapangile’cisasa ubusiku. Eli Dafidi aipusya abalalume bakwe bobilo ati: ‘Nani uwakuya na nebo kuli Saulu ku cisasa?’

Dafidi alukwita Imfumu Saulu

Naye Abisyai ati: ‘Nakuya na mwebo.’ Abisyai mwano’mwalalume uwakwe Syeluya inkasi yakwe Dafidi. Ili Saulu ne balalume bakwe balele, Dafidi na Abisyai baya celele mu cisasa. Babule’fumo lyakwe Saulu ne nkomeci ya menda, ifyali pansi ku mitwi yakwe Saulu. Tapalipo uwababona neli ukubomfwa pakuti bonse baali mutulo utulemene.

Bona Dafidi na Abisyai pano. Bafumako, bali umutende peulu lya lupili. Dafidi abilikisya ku mukulu wa fita ati: ‘Abineli, mba nindo lomba taulukulamina imfumu, sikulu wobe? Bona! Nikwisa kuli ifumo lyakwe ne nkomeci ya menda?’

Saulu abuka. Alisibe’siwi lyakwe Dafidi, kabili aipusya ati: ‘Kani niwebo, Dafidi?’ Kani wababona Saulu na Abineli pansi apa?

Naye Dafidi eli angamwasuka Saulu ati: ‘Inya, mwe basikulu banji.’ Dafidi aipusya ati: ‘Mba nindo mulukufwaila ukunjikatila? Mba nicindo icakubifya nacita? Boneni ifumo, mwe mfumu. Lomba tumeni umo pa balalume benu ese alipoke.’

Imfumu Saulu na Abineli

Kumfwa Saulu ati: ‘Nabifya. Bona natumpa.’ Fyopele’fyo Dafidi akumbuluka, naye Saulu abwelelamo kwabo. Pano Dafidi alabila mu mutima wakwe ati: ‘Kambi kasuba nkafwa ku minwe yakwe Saulu. Cilyelelwe nebo ukufyukila ku calo ca baFilisiti.’ Kabili fyenke’fyo efi acita. Dafidi atumpaika abaFilisiti bo ne kubona ati ali kuli bo.

Impindi imbi abaFilisiti baya mu kulwa ne baIsilaeli. Mu nkondo Saulu na Jonafani baipaiwa. Ici calenga Dafidi ukubombomana makosa, alemba ne lwimbo uluweme, ulo aimba ati: ‘Ndukubombomana pali webo, we mukwasu Jonafani. Wewatemwicilwe kuli nebo ukwakuti!’

Panuma ya fifi Dafidi abwelela ku Isilaeli ku musi wa Ebiloni. Lomba pabe’nkondo pakati ka balalume abaikalikile Isibosyeti umwana wakwe Saulu pa bufumu ne balalume bambi abalukufwaya Dafidi ukuba imfumu. Mukupelako abalalume bakwe Dafidi bacimfya. Dafidi ali ne myaka ya kufyalwa 30 ili aba imfumu. Pa myaka isanu na ibili na afu efi ateka mu Ebiloni. Bamo abana abalalume abafyelwe kuli ye mu Ebiloni amasina abo ni Aminoni, Abisalomi na Adonija.

Impindi yafika ili Dafidi ne balalume bakwe baya mu kupoka umusi uuweme uwa Jelusalemi. Yoabi umwana na umbi uwakwe Syeluya inkasi yakwe Dafidi, abatangilila ku kulwa. Pano naye Dafidi amwikalika Yoabi ati cilolo ce bumba lya fita. Pano Dafidi atatika ukuteka mu musi wa Jelusalemi.

1 Samweli 26:1-25; 27:1-7; 31:1-6; 2 Samweli 1:26; 3:1-21; 5:1-10; 1 Ifyebo 11:1-9.



Ifyakwipusya

  • Findo Dafidi na Abisyai bacita ili Saulu alele mu cisasa?
  • Fisa fyakwipusya Dafidi aipusya Saulu?
  • Ili bamusya Saulu, nipi Dafidi aya?
  • Cindo calenga Dafidi ukubombomana, icakweba’ti alemba ne lwimbo ulwakuti ubune?
  • Ali ne myaka inga Dafidi ili bamubika pa bufumu mu Ebiloni, kabili mba masina abana bakwe abalalume nibani?
  • Nipi Dafidi mukupelako ateka pa bufumu?

Ifyakwipusya na fimbi

  • Pendeni 1 Samweli 26:1-25.

    Amasiwi akwe Dafidi aali pali 1 Samweli 26:11 alafisulula syani ifi ifintu fiteyanisiwe mu kwansika kwa buLesa? (Amasa. 37:7; Loma. 13:2)

    Ili twapyungisya ukulango’luse pano nangaba’ti abantu tabalukutotapo ifitulukupyunga, amasiwi akwe Dafidi aatusangana pali 1 Samweli 26:23 koti atofwa syani ukulukwimakene bwino mu fitulukubone’fintu? (1 Imf. 8:32; Amasa. 18:20)

  • Pendeni 2 Samweli 1:26.

    Kani abaKlistu koti batuntulula syani “ukutemwansyanya” ku babyabo koti ni kulya ukwaliko pali Dafidi na Jonafani? (1 Pet. 4:8; Kol. 3:14; 1 Yoa. 4:12)

  • Pendeni 2 Samweli 5:1-10.

    Myaka inga Dafidi atekele pa bufumu, kabili iyi mpindi yalyabanisiwe syani? (2 Sam. 5:4, 5)

    Nipi ukucindama kwakwe Dafidi kwelelwe ukuya, kabili ici cintu cilatulenga ukulukwanuke’ndo muli bulelo? (2 Sam. 5:10; 1 Sam. 16:13; 1 Kol. 1:31; FiIip. 4:13)