Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 47: Silumfundi mu Isilaeli

Icisimicisyo 47: Silumfundi mu Isilaeli
Akani alukufisa ifi aibile

LOLESYA ifi uyu mwalalume alukusika mwi tente lyakwe! Umwingila uwakuti ubune, ne cela ce golide, ne tupimfwa twe silifa. Alifibulile mu musi wa Jeliko. Pano cindo cali ne kucitwa ku fintu fya mu Jeliko? Kani unganuka?

Fyalyelelwe ukonalwa, kabili igolide ne silifa fyali ne kupelwa mu ci balukusungilamo amaboni mwi sema lya baYehoba. Abantu tabomfwililepo baLesa. Baiba ifya baLesa. Isina lya mwalalume ni Akani, ne bali nakwe ba mu lupwa lwakwe. Ngatubone icacitika.

Ili Akani aiba ifi fintu, Josyua atuma abalalume abakuya mu kulwa ku musi wa Ayi. Pano babapama mu nkondo. Bambi babepaya, eli bambi babundumuka. Josyua abombomana makosa. Alala pansi ubwifuneme ne kutembela kuli baYehoba ati: ‘Mba nindo mwalekele’ci ukutucitikila?’

BaYehoba baasuka ati: ‘Buka! AbaIsilaeli babifya. Babula fimo ifyali ne konalwa neli ifyali ne kupelwa kwi sema lya baYehoba. Baiba umwingila uwakuti ubune ne kuufisa. Tekuti musyukisyeni mpaka mukafyonale, kumo na woyo uwabule’fyo fintu.’ BaYehoba balabila’ti bakamulanga Josyua uyo mwalalume imbifi.

Josyua abunganya abantu bonse pamo, kabili baYehoba basobolapo umwalalume Akani imbifi. Akani alabila’ti: ‘Nabifya. Nalibwene umwingila uwakuti ubune, ne cela ce golide ne tupimfwa twe silifa. Eli ningafikumbwa makosa ne kufibula. Mwakufisangana filisikilwe mukati mwi sema lyanji.’

Ili ifi fintu bafisangana ne kufileta kuli Josyua, alabila kuli Akani ati: ‘Mba nindo watuletela ifyakukatasya ifyakube’fi? Pano kansi baYehoba bakuleta ifyakukatasya pali webo!’ Penka abantu bonse kabamwipaya Akani ku mabwe ne ba mu ŋanda yakwe. Kani ici tacilukutubula ati tatwelelwe ukupinta ifi tafilipo fyesu?

Panuma ya fyefyo abaIsilaeli kabaya mu kulwa ne baAyi. Ino mpindi baYehoba baofwa abantu babo, kabili bacimfya mu nkondo.

Josyua 7:1-26; 8:1-29.



Ifyakwipusya

  • Mu cikope umwalalume alukusika amaboni yafumine mu Jeliko ninani, kabili abalukumofwa nibani?
  • Mba nindo ici acitile Akani ne lupwa lwakwe cabipile ukwakuti?
  • Kani findo baYehoba balabila ili Josyua aipusya icalenga abaIsilaeli ukubacimfya mu nkondo ku Ayi?
  • Ili Akani ne lupwa lwakwe babaletele kuli Josyua, findo fyacitikile kuli bo?
  • Ukusolololwa ukwacitikile kuli Akani kulatusambisye’ndo?

Ifyakwipusya na fimbi

  • Pendeni Josyua 7:1-26.

    Findo itembelo lyakwe Josyua lifisulula pali bucibusa bwakwe ne Balengesi bakwe? (Jos. 7:7-9; Amasa. 119:145; 1 Yoa. 5:14)

    Ici acitile Akani ne fyafuminemo filalange’ndo, kabili cindo tusambililako? (Jos. 7:11, 14, 15; Ifisi. 15:3; 1 Tim. 5:24; Ebeya. 4:13)

  • Pendeni Josyua 8:1-29.

    Cindo twelelwe ukulukucita mwi kelesya lya buKlistu muli bulelo? (Jos. 7:13; Lef. 5:1; Ifisi. 28:13)