Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 46: Ifibumba fya Jeliko

Icisimicisyo 46: Ifibumba fya Jeliko

MBA nindo ilukulenga ifibumba fya Jeliko ukuwa? Cilukuboneka koti libomba ilikulu e lyaponenapo. Pano mu nsiku isyo tabakwetepo amabomba; tabakwetepo neli ni mfuti. Cili cimpelampela na cimbi ica baYehoba! Leka tusambilile ifi cacitikile.

Ifibumba fya Jeliko filukuwa

Kutika kufi baYehoba babula Josyua: ‘Webo ne balalume bobe abankondo muli ne kusinguluka umusi. Mukausinguluke umuku umo cila busiku pa nsiku sisanu na bumo. Mukapinte ne mbokosi ya kulayana uku mukalukuli. Abapapatilisi basanu na babili balyelelwe ukwendela pantangile yaiko kabili balukulisya impenga syabo.

‘Pa busiku bwa busisanu na sibili mulyelelwe ukusinguluka umusi imiku isanu na ibili. Eli mukalisye impenga pa mpindi itali, kabili abantu bonse bakawele ne ngwelele ikulu iya nkondo. Kabili ne fibumba fikawa lukoso pansi!’

Josyua ne bantu bacita koti ni fyopele’fyo baYehoba bababula. Ili balukusinguluka, uuli onse ali celele. Tapalipo neli umo ulukulabila isiwi. Ifilukumfwika lukoso congo ca mpenga ne makasa aalukusinguluka. Abapate ba bantu ba baLesa mu Jeliko bafwile baali ne mwenso. Kani waubona ulya umwando wa butonge ubukasikile ulukupeela pa windo? Mba liwindo lyakwe nani lilya? Inya, Lakabi acita filya fyenka abacetesi bobilo bamubulile ukucita. Ulupwa lwakwe lonse luli mukati lulukutamba pamo naye.

Josyua

Mukupelako, pa busiku bwa busisanu na sibili, panuma yakusinguluka umusi imiku isanu na ibili, impenga syalila, ne balalume ba nkondo bawela, ne fibumba fyawa. Eli Josyua alabila ati: ‘Ipayeni onse uuli mu musi kabili muwoce. Moce fyonse lukoso. Mupulusyeko lukoso isilifa, igolide, ulubemba ne mfitwe, kabili mufipele mu mupawo wa mwi sema lya baYehoba.’

Ku bacetesi bobilo, Josyua alabila ati: ‘Ingileni mu ŋanda yakwe Lakabi, kabili mu mufumye ye ne lupwa lwakwe lonse.’ Lakabi ne lupwa lwakwe bapuluka, koti ni fyopele’fyo abacetesi bamulaile.

Josyua 6:1-25.



Ifyakwipusya

  • Mba nifindo baYehoba babula abalalume ba nkondo ne bapapatilisi ukucita pa nsiku sisanu na bumo?
  • Findo abalalume bali ne kucita pa busiku bwa busisanu na sibili?
  • Koti nifyefyo ulukubona mu cikope, findo filukucitika ku fibumba fya Jeliko?
  • Mba nindo pabelele umwando wa butonge ubukasikile pa windo uulukupelela?
  • Mba nifindo Josyua abula abalalume ba nkondo ukucita ku bantu ne musi, nga pano lomba kwi silifa, igolide, ulubemba, ne mfitwe?
  • Mba findo abacetesi bobilo bababula ukucita?

Ifyakwipusya na fimbi

  • Pendeni Josyua 6:1-25.

    Kani ukusinguluka kwa baIsilaeli ukwa Jeliko pa busiku bwa busisanu na sibili kulipalene syani ne milimo ya kutulisya iya Bamboni sya baYehoba muli sino insiku sya kupelako? (Jos. 6:15, 16; Yisa. 60:22; Mat. 24:14; 1 Kol. 9:16)

    Kani ukusimika ukulembelwe pali Josyua 6:26 kwalifikilisiwepo syani panuma ya myaka cipale 500, kabili ici cilatusambisye’ndo pe siwi lya baYehoba? (1 Imf. 16:34; Yisa. 55:11)