Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 44: Lakabi Afisa Abacetesi

Icisimicisyo 44: Lakabi Afisa Abacetesi

ABA abalalume bali mu kukatasiwa. Balyelelwe ukuya, pambi bangesa kubepaya. Bacetesi ba baIsilaeli, kabili umwanakasi alukubofwa ni Lakabi. Lakabi alekala mu ŋanda iili kumpelo ye linga lya musi wa Jeliko. Pano ngatubone icalenga aba balalume ukuba mu kukatasiwa.

AbaIsilaeli baliteyanya ukwabuka Inika ya Jodeni pakuti bengile mu calo ca Kanani. Pano ili tabangacite’co, Josyua atuma abacetesi bobilo. Ababula ati: ‘Kamuya mukacencente pa calo, na pa musi wa Jeliko.’

Lakabi ne baceteshi babili

Ili abacetesi bafika mu Jeliko, baya ku ŋanda yakwe Lakabi. Pano umuntu umo ifi abula imfumu ya Jeliko ati: ‘Buno busiku palinjiile muno abalalume ba baIsilaeli mu kuciceta icalo.’ Ili yaumfwe’fi, imfumu yatuma abalalume kuli Lakabi, bakomeka kuli ye ati: ‘Fumya abalalume abaisa kuli webo, abainjila mu ŋanda yobe!’ Pano Lakabi abafisa mu mutenge wakwe. Eli alabila ati: ‘Pacisa abalalume kuli nebo, sombi nebo nsisibilepo uko bafuma. Baciya ili paciya ili pafita, ili imilyango ya musi taingesalwa. Kamubalondesya, mwakubasanga!’ Kabili aba balalume baya ili babalonda panuma.

Ili baya, bwangubwangu Lakabi anina pa mutenge. Ababula abacetesi ati: ‘Ndisi ati baYehoba bakamupeleni cino icalo. Twalyumfwile ifi baYehoba baumisye amenda amu Cisiba Icikasikile ili mwafumine mu calo ca Ijipiti, nafyefyo ifi Sikoni na Ogo imfumu mwasipeye. Pakuti namucitileni uluse, ndayeni, ndukumukombeteleni, mukancitile uluse. Mupulusye batata na bamama, kabili ne ndume ne nkasi syanji.’

Abacetesi balaya ati efi bakacita, pano Lakabi alyelelwe ukucita icintu cimo. Abacetesi balabila ati: ‘Ukakake uyu mwando wa butonge ubukasikile pa windo, kabili ukenjisye kuli webo bonse abakwanu mu ŋanda yobe. Ili bonse tukabwela mu konala Jeliko, tukabona uyu mwando ukasikile uwa butonge pa windo kabili tatwakepayepo neli umo mu ŋanda yobe.’ Ili abacetesi babwelela kuli Josyua, bamubula fyonse ifi fyabele ifintu.

Josyua 2:1-24; AbaEbeya 11:31.



Ifyakwipusya

  • Kani Lakabi alekala pi?
  • Mba aba balalume bali mu cikope nibani, kabili nindo baila ku Jeliko?
  • Findo imfumu ya Jeliko yakomeka abalalume abaya kuli Lakabi ukucita, kabili abasuka syani?
  • Lakabi abofwa syani abalalume bobilo, kabili cindo abalomba ukumucitila?
  • Findo bamulaya Lakabi aba bacetesi bobilo?

Ifyakwipusya na fimbi

  • Pendeni Josyua 2:1-24.

    Ukulaya ukulembelwe pa Ifyakufuma 23:28 kwalifisiwepo syani ili abaIsilaeli baingilile Jeliko? (Jos. 2:9-11)

  • Pendeni AbaEbeya 11:31.

    Icakubwenako cakwe Lakabi cilalanga syani ifi icicetekelo cicindeme? (Loma. 1:17; Ebeya. 10:39; Jako. 2:25)