Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 42: Imbongolo Yalabila

Icisimicisyo 42: Imbongolo Yalabila

KANI ulyumfwilepo imbongolo ilukulabila? Pambi ungalabila ati: ‘Koku. Inama tasilabilapo.’ Pano Baibolo ilalabila pa mbongolo iyalabile. Ngatubone ifi cacitikile.

Inkalamba

AbaIsilaeli bali apepi ne kwingila mu calo ca Kanani. Balaci, imfumu ya Moabi, alukubatina abaIsilaeli. Popele atuma abakwita umwalalume umucenjele uwe sina lya Balami ukwisa mu kufinga abaIsilaeli. Balaci alaya ukupela Balami indalama isingi, popele Balami aninsa pa mbongolo yakwe ne kutatikako ulwendo lwakwe ukuya mu kubona Balaci.

BaYehoba tabalukufwaya Balami ukufinga abantu Babo. Popele batuma inkalamba ne mpoko iitali ukuya mu kwimakana mu nsila ne kwimakanika Balami. Balami taleibona inkalamba, sombi imbongolo yakwe yaibona. Popele imbongolo ilukwesyaesya ukupasukako ku nkalamba, na mukupelako yalala pansi mu nsila. Balami akalipa makosa, kabili apama imbongolo yakwe ku nkoli.

Eli baYehoba balenga Balami ukukutika ku mbongolo yakwe ukulabila kuli ye. Imbongolo ya mwipusya ati: ‘Mba findo nacita kuli mwebo pakuti mumpame?’

Balami pa mbongolo

Balami alabila ati: ‘Wanenga ukuboneka koti mutumpile. Nga nacikwata impoko nga nakwipaya!’

Imbongolo yaipusya ati: ‘Kani nalimucitileni ifyakube’fi ne kale?’

Balami aasuka ati: ‘Koku.’

Eli baYehoba bamulenga Balami ukubona inkalamba ne mpoko ilimakene mu nsila. Inkalamba yalabila ati: ‘Mba nindo waipamina imbongolo yobe? Naisa mu kukusinkile’nsila, pakuti webo tawelelwe ukuya mu kufinga Isilaeli. Kani imbongolo yobe tayacipasukako kuli nebo, nga nacikwipaya, pano imbongolo yobe nga naciipulusya.’

Balami alabila ati: ‘Nabifya. Nsyacisiba ati mwacimakana mu nsila.’ Inkalamba yamuleka Balami ati alukuya, kabili Balami atwalilila ukuya mu kubona Balaci. Acili alukwesyaesya ukufinga Isilaeli, pano, mu mupunda wa ceco, baYehoba bamulenga ukusyucisya Isilaeli imiku syotatu.

Ifyakupenda 21:21-35; 22:1-40; 23:1-30; 24:1-25.



Ifyakwipusya

  • Kani Balaci ninani, kabili nindo atumina abakwita Balami?
  • Mba nindo imbongolo yakwe Balami yalalila pansi pa musebo?
  • Kani nifindo Balami aumfwa imbongolo ilukulabila?
  • Kani nifindo inkalamba yalabila kuli Balami?
  • Mba nifindo fyacitika ili Balami aesya ukufinga Isilaeli?

Ifyakwipusya na fimbi

  • Pendeni Ifyakupenda 21:21-35.

    Mba nindo Isilaeli acimfisye Imfumu Sikoni iya baAmoli ne Mfumu Ogo iya ku Basyani? (Pen. 21:21, 23, 33, 34)

  • Pendeni Ifyakupenda 22:1-40.

    Kani nicindo icali ukufwaya kwakwe Balami pa kwesya ukufinga Isilaeli, kabili nifindo tungasambililako kuli cici? (Pen. 22:16, 17; Ifisi. 6:16, 18; 2 Pet. 2:15; Juda 11)

  • Pendeni Ifyakupenda 23:1-30.

    Nangaba’ti Balami alukulabila koti alukupempela baYehoba, kani ifi alukucita fyalilangisye syani ati talukupempela baYehoba? (Pen. 23:3, 11-14; 1 Sam. 15:22)

  • Pendeni Ifyakupenda 24:1-25.

    Kani ici cisimicisyo ca mu Baibolo cilakosya syani bucicetekelo bwesu ati baYehoba balapyunga koti kufwaya kwabo? (Pen. 24:10; Yisa. 54:17)