Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 39: Inkonto Yakwe Aloni Yasonsa Amaluba

Icisimicisyo 39: Inkonto Yakwe Aloni Yasonsa Amaluba

BONA amaluba na basyakedi abapile basonsa ku nkonto iyi neli ku nkoli. Iyi ni nkonto yakwe Aloni. Aya maluba ne fisepo ifipile fyasonsa ku nkonto yakwe Aloni mu busiku bumo lukoso! Ngatubone icalengele.

Mose alukupeela Aloni inkonto iyasonsa amaluba

AbaIsilaeli balukwendaenda mu mpanta pa mpindi iitali. Bambi abantu tabalukulanguluka ati Mose alyelelwe ukube’ntangisi, neli ati Aloni alyelelwe ukuba umukulu pa bapapatilisi. Kola ni umo pali babo abalukulanguluke’fi, pamo na Datani, Abilami ne ntangisi sya bantu 250. Aba bonse baisa kuli Mose ne kulabila ati: ‘Mba nindo mulisuntwila peulu pali fwebo fwense?’

Mose abula Kola ne bakwe ati: ‘Mailo ulucelo mukabule ifyakutekapo umulilo mukabikemo ne finunkiile. Eli mukese kwi sema lya baYehoba. Tukamubona woyo baYehoba bakasalulula.’

Akasuba akakonkapo Kola ne bakwe 250 baisa kwi sema. Na bambi abengi baisa mu kofwa aba balalume. BaYehoba bakalipa ukwakuti. Mose alabila ati: ‘Fumenimo mu matente abantu aba abakubifya. Mwikumako kuli conse icabo.’ Abantu bakutika, kabili bafumamo mu matente akwe Kola, Datani na Abilami.

Eli Mose alabila ati: ‘Kuli cici mwakwisiba woyo baYehoba basalulula. Umusili wakucenama ne kubamina aba bantu bakubifya.’

Penka palya Mose alukusila ukulabila, umusili wacenama. Itente lyakwe Kola ne fyakwe, Datani na Abilami pamo ne babo baponena pansi, ne musili wabesalila. Ili abantu baumfwa ukulila kwa babo abaponena pansi, babilikisya ati: ‘Bundumukeni! Umusili ungatumina nafwebo!’

Kola ne bakwe 250 bacili apepi ne sema. Popele baYehoba batuma umulilo, na bonse baboca. Eli baYehoba babula Eliasa umwana wakwe Aloni ukupinte’fyakutekapo umulilo ifya baba abantu abafwa ne kupanga icakufimbapo pa conto. Ici cakufimbapo pa conto kesibilo kakucenjesya abaIsilaeli ati takulipo naumbi sombi Aloni ne bana bakwe ebelelwe ukuba abapapatilisi ba baYehoba.

Pano baYehoba balukufwaya abantu bomfwisye ati ni Aloni ne bana bakwe ebo basalulwile ukuba abapapatilisi. Popele babula Mose ati: ‘Ubule intangisi sya pa fikoto fya baIsilaeli imo imo ukuleta inkonto syabo. Mu cikoto ca baLefai, ubule Aloni ukuleta inkonto yakwe. Eli usibike imo imo mwi sema apasinkamene ne mbokosi yakulayana. Inkonto ya woyo muntu nasalulula ukuba umupapatilisi ikansonsa amaluba.’

Ulucelo lwakonkapo ili Mose alolesya, boneni, inkonto yakwe Aloni yakwata amaluba na basyakedi abapile basonsa kuli yo! Popele, kani wabona umulandu baYehoba balengele ati inkonto yakwe Aloni isonse amaluba?

Ifyakupenda 16:1-49; 17:1-11; 26:10.



Ifyakwipusya

  • Mba nibani abaalukila ukutungulula kwakwe Mose na Aloni, kabili nifindo balabila kuli Mose?
  • Mba nifindo Mose abula Kola ne bakwe 250 ukucita?
  • Mba nifindo Mose alabila ku bantu, kabili nifindo fyacitika penka palya asila ukulabila?
  • Kani nifindo fyacitika kuli Kola ne bakwe 250?
  • Mba nifindo Eliasa, umwana wakwe Aloni, acita ku fyakutekapo mulilo ifya balalume abafwa, kabili nindo acitile’fyo?
  • Mba nindo baYehoba balengela inkonto yakwe Aloni ukusonsa amaluba? (Bona pa cikope.)

Ifyakwipusya na fimbi

  • Pendeni Ifyakupenda 16:1-49.

    Kani Kola ne bakwe balicitile’ndo, kabili ifibacitile fyalibele syani kwalukila baYehoba? (Pen. 16:9, 10, 18; Lef. 10:1, 2; Ifisi. 11:2)

    Kani Kola ‘ne fileme ifya pebumba’ ifyali 250 balitatikile syani ukuba ne kulanguluka ukubipile? (Pen. 16:1-3; Ifisi. 15:33; Yisa. 49:7)

  • Pendeni Ifyakupenda 17:1-11 na 26:10.

    Kani ukusonsa kwa nkonto yakwe Aloni kwalilangisye’ndo, kabili nindo baYehoba bakomekele ati isungilwe mu mbokosi? (Pen. 17:5, 8, 10)

    Kani nifindo ificindeme ifi tungasambililako kuli fyefyo inkonto yakwe Aloni yalangilile? (Pen. 17:10; Cit. 20:28; Filip. 2:14; Ebeya. 13:17)