Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 36: Umwana wa Ŋombe uwe Golide

Icisimicisyo 36: Umwana wa Ŋombe uwe Golide

ELEE, mama! Mba pano nifindo abantu balukucita? Balukutembela ku mwana wa ŋombe uwe golide! Mba nindo balukucitile’ci?

Ili Mose aikala ku lupili pa mpindi iitali, abantu balabila ati: ‘Tatwisibilepo ifyacitika kuli Mose. Popele ngatubumbe kalesa akakututungulula ukufuma mu calo cino.’

Mose apoosa panshi amabwe abili

Aloni umukwabo Mose alabila ati: ‘Ciweme. Fuleni amasikiyo enu aye golide, muyalete kuli nebo.’ Ili abantu bacite’fi, Aloni afisungulula ne kubumba umwana wa ŋombe uwe golide. Kabili abantu balabila ati: ‘Aba e baLesa wesu, abatufumisye mu Ijipiti!’ Eli abaIsilaeli bakwato’kusefya ukukulu, ne kutembela umwana wa ŋombe uwe golide.

Ili baYehoba babone’ci, bakalipa makosa. Popele balabila kuli Mose ati: ‘Endesya ne kuya pansi. Abantu balukucite’fibipile makosa. Balubako ku mafunde anji kabili balukwinamisya pansi ku mwana wa ŋombe uwe golide.’

Abantu balukupempela umwana wa ŋombe uwe golide

Mose aendesyo’kuselukila pansi ya lupili. Kabili ili apalamina, ifi efi abona. Abantu balukwimba ne kulukusyana ukusinguluka umwana wa ŋombe uwe golide! Mose akalipa ukwakuti icakweba’ti aposa pansi amaseleti aebwe yobilo apali amafunde, kabili atobaika mu tuputusya utwingi. Eli abula umwana wa ŋombe uwe golide ne kuusungulula. Eli aupelesya ukuba koti bunga.

Abantu bacita icakubifya icikulu. Popele Mose abula bamo bamo abalalume ukupinte’mpoko syabo. Mose alabila ati: ‘Abantu bakubifya abatembele umwana wa ŋombe uwe golide nga bafwe.’ Kabili abalalume baipaya abantu 3,000! Kani ici tacilukulanga ati tulyelelwe ukulama ukupempela baYehoba benka, tesi tulesa utwa bufi tumbi?

Ifyakufuma 32:1-35.



Ifyakwipusya

  • Mu cikope, kani nifindo abantu balukucita, kabili nindo balukucitile’fyo?
  • Mba nindo baYehoba bakalipila, kabili nifindo Mose acita ili abona ifi abantu balukucita?
  • Kani Mose aeba bamo bamo abantu ukucite’ndo?
  • Kani nicindo tungasambililako kuli cici icisimicisyo?

Ifyakwipusya na fimbi

  • Pendeni Ifyakufuma 32:1-35.

    Kani ili lyasi lilalangisya syani ifi baYehoba babona ukusankanya ukupempela kwa bufi ne kwa cine? (Fum. 32:4-6, 10; 1 Kol. 10:7, 11)

    Kani abaKlistu balyelelwe syani ukucenjela pa kusala ifintu ifili koti ni inyimbo ne kusyana, ifya kubasangalasya? (Fum. 32:18, 19; Efes. 5:15, 16; 1 Yoa. 2:15-17)

    Kani icikoto ca baLefai cilatupela syani icakubwenako iciweme icakutwalilila ukuba abalungeme? (Fum. 32:25-28; Amasa. 18:25)