Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 30: Icinsokela Cilukwaka

Icisimicisyo 30: Icinsokela Cilukwaka

MOSE alisile ku lupili lwa Olebi ku kufwaya icani ca mbelele syakwe. Kuno kwenka, penka alibwene icinsokela cilukwako’mulilo, sombi tacalukupyapo koku!

Mose pa cinsokela icilukwaka

Naye Mose ne kulanguluka ati: ‘Ici nsingacibonapo. Tange inje, mpalamine apepi, nkabone.’ Ili alukwisa mu kupalamina, isiwi lyalifumine mu cinsokela ati: ‘Wipalaminapo kuno. Ufuule insapato syobe, pakuti apo apo wimakene pali ubuleme.’ Baali ni baLesa abalukulabilila mu nkalamba, penka Mose kafimba na pa menso pakwe.

Penka baLesa kabalabila’ti: ‘Nabona ukupenga kwa bantu banji abali mu calo ca Ijipiti. Lomba ndukubapulusya, kabili ni webo ndetuma ukufumya abantu banji mu Ijipiti.’ BaYehoba baali ne kuleta abantu babo mu calo iciweme ica Kanani.

Penka Mose kalabila kuli baLesa ati: ‘Mba nebo nine nani. Kani ningacita syani’fi? Nangaba’ti naya. AbaIsilaeli bakalabila kuli nebo, “Mba nibani bakutuma?” Nkalabila syani kuli bo?’

‘Ifi efi ukalabile,’ efi baLesa baasukile. ‘“BAYEHOBA (neli, baYawe) Lesa wakwe Ablaamu, e baLesa wakwe Isaci kabili baLesa wakwe Yakobi e bantumine kuli mwebo.”’ Eli baLesa bakonkenyepo ati: ‘Ili e sina lyanji umuyayaya.’

Mose eli angasuka’ti: ‘Nga pano kani tabasumine ili nkalabila ati nimwe mwantuma.’

BaLesa kabamwipusya ati: ‘Cindo ico ici uli naco mu minwe?’

Mose kaasuka ati: ‘Ninkoli ndi nayo.’

Kumfwa baLesa ati: ‘Ipose pansi.’ Lomba ili Mose aiposele pansi, inkoli yalyalukile ni nsoka. BaYehoba balilangile Mose icimpelampela nacimbi. Kabalabila ati: ‘Pano ingisyo’kuboko kobe mwi laya pa ntibi.’ Naye Mose efi acitile, popele, pa kukufumya, kubono’kuboko kwatuba koti candwa! Ne kuboko kakuboneka koti kwali ne bulwasi ububipile ububeta ati amanata neli ifilonda. Mukukonkapo baYehoba balipele Mose amakosa akucita icimpelampela ca butatu. Mukupelako baLesa kabalabila ati: ‘Ili ukacita ifi fimpelampela lomba abaIsilaeli bakakucetekela ati Nine nakutumine.’

Panuma yafyefyo Mose alile ku ŋanda ne kulabila kuli Yitilo ati: ‘Ndukumukombeteleni ati munsumine nje nkabwelele ku bakwasu abali mu calo ca Ijipiti nkabone ifi bali.’ Popele Yitilo alilabile kuli Mose ati koya ukafikepo umutende, kabili Mose efi atatikileko ulwendo lwa kubwelela ku Ijipiti.

Ifyakufuma 3:1-22; 4:1-20.



Ifyakwipusya

  • Isina lya lupili mu cikope balalwita ati syani?
  • Bulisisya icimpelampela Mose abwene ili aile ku lupili ne mbelele syakwe.
  • Findo isiwi lyalabile ukufuma mu cinsokela, kabili lyali lisiwi lya bani?
  • Mose alyasukile syani ili bamubulile ati akafumya abantu ba baLesa mu Ijipiti?
  • Findo baLesa babulile Mose ukulabila ku bantu kani bakamwipusye ati nibani bamutumine?
  • Mose aali ne kucite’ndo pakuti abantu basininwe ati ni baLesa bamutumine?

Ifyakwipusya na fimbi

  • Pendeni Ifyakufuma 3:1-22.

    Ifi Mose apitilemo filatupela syani ubucetekelo bwakweba’ti nangaba tulukumfwa ati tatufikilepo ukupyunga imilimo ya buLesa, baYehoba bakatofwa? (Fum. 3:11, 13; 2 Kol. 3:5, 6)

  • Pendeni Ifyakufuma 4:1-20.

    Mba Mose alisile mu kwaluka syani ili afikile imyaka 40 iyi aikele ku Midiani, kabili nicisa cakutuntulula kuli babo abatinamine’milimo mwi kelesya bangasambililako? (Fum. 2:11, 12; 4:10, 13; Mika 6:8; 1 Tim. 3:1, 6, 10)

    Nangaba’ti baYehoba e batufunda ukupitila mu kwansika kwabo, nibwisa bucetekelo icakubwenako cakwe Mose citupela? (Fum. 4:12-14; Amasa. 103:14; Ebeya. 12:4-11)