Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 28: Ifi Ulucece Mose Lwapulukile

Icisimicisyo 28: Ifi Ulucece Mose Lwapulukile

BONA ulucece lulukulila, kabili lwaikatilila ne munwe wakwe moye. Uyu ni Mose. Kani ulimwisi uyu moye umulombe? Mwana wa mfumu ya Ijipiti, mwana umwanakasi wakwe Falo.

Umwano’mwanakasi uwakwe Falo asangana Mose

Banyina Mose balimufisile umwana wabo ukufika ili ali ne myensi itatu, pakuti tabafwailepo ati bakamwipaye ku baIjipiti. Pano balisibile ati Mose pambi bangamubona, popele ifi efi bacitile pa kumupulusya.

Balipintile ica museke ne kuciposa bwino pa kucilikila amenda ukwingila mukati. Eli bamubikilemo Mose, ne kubika ica museke mu fyani ifitali mu mpelo ya Nika ya Nayili. Milyami, inkasi yakwe Mose, balimwebele ukwimakana apepi ne kubona ifyali ne kucitika.

Mu mpindi inini umwana umwanakasi uwakwe Falo alisile ku nika mu kusamba. Ukwakubula ukucetekela abona ica museke mu fyani ifitali. Kaita umo umusyakasi wakwe: ‘Koya undetele ica museke.’ Ili umwana wa mfumu aiswile ica museke, ifi ulucece lwali uluweme! Ulucece Mose lwalukulila, kabili umwana wa mfumu kaalubele’nkumbu. Talukufwaya ati balwipaye.

Eli Milyami aisile. Koti wamubona mu cikope. Milyami alipwisye umwana umwanakasi uwakwe Falo ati: ‘Kani nje nkamwitileni umuIsilaeli umulelesi ati alukumuleleleniko umwano’yu?’

Umwana wa mfumu alilabile ati: ‘Koya.’

Lomba Milyami alibutukile ukuya mukweba banyina. Ili banyina Mose baisile ku mwana wa mfumu, umwana wa mfumu alilabile ati: ‘Pinta umwano’yu kabili ulukundelelako, nkakulambula.

Popele banyina Mose balimulelele umwana wabo. Mukupita kwa mpindi ili Mose akulile, balimutwite ku mwana umwanakasi uwakwe Falo, uwamulelele koti mwana wakwe. Fyefyo efi Mose akuliile mu ŋanda yakwe Falo.

Ifyakufuma 2:1-10.



Ifyakwipusya

  • Kani ulucece ululi mu cikope ninani, kabili kani lulikete ku munwe wakwe nani?
  • Kani banyina Mose balicitile syani pakweba’ti bamupulusye ku kwipaiwa?
  • Kani moye umwanice uuli mu cikope ninani, kabili nifindo acitile?
  • Ili umwana umwanakasi uwakwe Falo asangile ulucece, kani Milyami nifindo apingwilepo?
  • Mba nifindo umwana wa mfumu umwanakasi alabile kuli banyina Mose?

Ifyakwipusya na fimbi

  • Pendeni Ifyakufuma 2:1-10.

    Kani niisa impindi banyina Mose bakwete iya kumufunda ne kumusambisya Mose ili aali umwanice, kabili ici nicisa icakubwenako cipela ku bafyasi muli bulelo? (Fum. 2:9, 10; Ndute. 6:6-9; Ifisi. 22:6; Efes. 6:4; 2 Tim. 3:15)