Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 26: Jobo wa Bucetekelo Kuli BaLesa

Icisimicisyo 26: Jobo wa Bucetekelo Kuli BaLesa

KANI wamumfwile’nkumbu uyu mwalalume umulwasi? Isina lyakwe ni Jobo, ne mwanakasi mukasi wakwe. Kani waisiba ici alukulabila kuli Jobo? ‘Bakaneni baLesa, mufwe.’ Leka tubone umulandu angalabilila icintu koti niceco, ne mulandu Jobo apengeele ukwakuti.

Jobo ne fipute

Jobo aali muntu wa bucetekelo uwalukumfwila baYehoba. Alukwikala mu calo ca Use, tacalipo apatali na Kanani. BaYehoba balimutemenwe Jobo ukwakuti, pano kwali umo uwamufitilwe. Kani ulimwisi uyo?

Aali ni Satana Umusensesi. Anuka ukweba’ti Satana ni nkalamba imbifi uufitilwa baYehoba. Alitungulukile ukulenga Adama na Efa ukukano’kumfwila baYehoba, kabili alilangulukile ukweba’ti angalenga uuli onse lukoso naye ukukano’kumfwila baYehoba. Pano kani alitungulukile? Koku. Languluka lukoso pa balalume ne banakasi abengi aba bucetekelo abo twasambililapo. Kani ni banga ungasimbulapo?

Panuma Yakobi na Josefi bafwile mu Ijipiti, Jobo e wali umuntu wa bucetekelo makosa kuli baYehoba ponse pa calo. BaYehoba balukufwaya Satana ukwisiba ati tekuti alenge uuli onse ukube’mbifi, popele balilabile ati: ‘Mulolesye Jobo. Bona ifi ancetekele.’

Satana alipikisye ati: ‘Wa bucetekelo, nipakuti mulamusyukisya kabili alikwete’fintu ifiweme ifingi. Pano kani ifi mufipokolole, akamukaneni.’

Popele baYehoba balilabile ati: ‘Cita koti nifyopele’fyo. Fipokolole. Ucite fyonse ifibipile ifi ulukufwaya kuli Jobo. Tukabona kani akankana. Pano ubone ukweba’ti ye taumwipeye.’

Icakutanga, Satana alilengele abalalume ukwiba iŋombe ne ngamela syakwe Jobo, kabili imbelele syakwe balisipeye. Eli aipeye abana bakwe abalalume ne banakasi 10 ku cipuupu. Mukukonkapo, Satana kalwalika Jobo ne bulwasi ububipisye makosa. Jobo aalipengele makosa. Ici e calengele umukasi wakwe Jobo ukumubula ati: ‘Bakaneni baLesa, mufwe.’ Pano Jobo tekuti acite’fyo. Nakabili, ababyakwe ababufi botatu balisile ne kumubula ati aalikele ubwikasi bwa bumbifi. Nangabe’fyo Jobo alitwalilile ukuba uwa bucetekelo.

Ici calilegele baYehoba ukusangalala ukwakuti, kabili panuma yafyefyo balimusyukisye Jobo, koti nififi ulukubona pa cikope. Balimuposesye ku bulwasi bwakwe. Jobo alikwete na bambi abana abalombe 10, kabili iŋombe, imbelele ne ngamela syalifulile pabili ukucila ne fisyali pa kutanga.

Kani ukalukuli lyonse uwa bucetekelo kuli baYehoba koti ni Jobo? Kani uli koti nifyopele’fyo, baLesa bakakusyukisya na webo. Ukekala umuyayaya ili icalo conse cikalulwa iciweme lukoso koti libala lya Edeni.

Jobo 1:1-22; 2:1-13; 42:10-17.

Jobo ne lupwa lwakwe


Ifyakwipusya

  • Kani Jobo aali ninani?
  • Mba nifindo Satana aesesye ukucita, kani pano alitungulukile?
  • Mba nifindo baYehoba bamusuminisye Satana ukucita, kabili nipali wisa mulandu?
  • Mba nindo umukasi wakwe Jobo amubulile ati ‘abakane baLesa ne kufwa’? (Bona pa cikope.)
  • Koti nifyefyo ungabona pa cikope ca bubili, mba baLesa balimusyukisye syani Jobo, kabili nipali wisa mulandu?
  • Kani nafwebo, ukupalakanya kuli Jobo, tuli ababucetekelo kuli baYehoba, niesa amasyuko tukapoka?

Ifyakwipusya na fimbi

  • Pendeni Jobo 1:1-22.

    Kani abaKlistu muli bulelo bangatuntulula syani icakubwenako cakwe Jobo? (Jobo 1:1; Filip. 2:15; 2 Pet. 3:14)

  • Pendeni Jobo 2:1-13.

    Kani ifi Jobo acitile nefi umukasi wakwe acitile ili Satana alukubakululusya fyapusana muli sisa’nsila syobilo? (Jobo 2:9, 10; Ifisi. 19:3; Mika 7:7; Mal. 3:14)

  • Pendeni Jobo 42:10-17.

    Kani amasyuko Jobo apokele apalana syani ne masyuko baYesu bapokele pa kuba ababucetekelo mu mweo wabo? (Jobo 42:12; Filip. 2:9-11)

    Kani alatukosya syani amasyuko Jobo apokele pakuti alitwalilile ukubo’mulungeme kuli baLesa? (Jobo 42:10, 12; Ebeya. 6:10; Jako. 1:2-4, 12; 5: 11)