Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 21: Josefi Bamufitilwa Abakwabo

Icisimicisyo 21: Josefi Bamufitilwa Abakwabo

BONA ifi umwanice abombomana kabili ali uwakubula icicetekelo. Uyu ni Josefi. Abakwabo bamusitisya ku balalume abalukuya ku Ijipiti. Kulya Josefi alukubo’musya. Kani pano nindo abakwabo bacitila icintu ica kubipe’fi? Nipakuti pa kumubela akaso Josefi.

Abakwabo Josefi balukumushitisha

Lomba ba wisibo balimutemenwe makosa Josefi. Pakuti pa kumutemwa balimupasilile umwinjila uutali uwa mincali. Ili abakulu bakwe 10 babwene ati wisibo Yakobi alukumutemwa Josefi ukucila bo, balitatikile ukumumfwila akaso ne kumufitilwa Josefi. Kabili kwali umulandu naumbi bamupatile.

Josefi alilotele imiloto yobilo. Mu miloto yakwe Josefi yonse abakwabo balukwinamisya pansi kuli ye. Ili Josefi ababulile abakwabo iyi miloto, balimupatile icikosele.

Pano kambi kasuba abakwabo Josefi ili baile mu kwembele’mbelele sya ba wisibo, Yakobi amutuma Josefi ukuya mu kubona kani abakwabo balukwikala bwino. Ili abakwabo bamubona alukwisa, bambi balabila ati: ‘Ngatumwipaye!’ Pano Lubeni, uulipo umukulu bantu, alabila ati: ‘Koku, tekwesyapo ukucite’fyo!’ Pano mulifyefyo bamwikata Josefi ne kumuposa na mu cilindi, ico calyumine, tamwali amenda. Eli baikala pansi ne kupingusyanya ifyakucita pali ye.

Pali yenkeyi’mpindi aba Isimeli balukupita. Popele Juda alabila ku bakwabo ati: ‘Twendeni tumusitisye ku ba Isimeli.’ Kabili fyenke’fyo efi bacita. Bamusitisya Josefi indalama amakumi abili. Mama mwebo ifi bacitile ukwakubule’nkumbu!

Kani pano abakwabo bakubeba syani bawisibo? Popele babula umwinjila wakwe Josefi ne kwipaya pepe, ne kuufwafwasyo’mwinjila mu milopa yakwe pepe. Popele bapinta umwinjilo’yo ku musi kuli ba Yakobi bawisibo ne kulabila ati: ‘Twabone’ci. Pano mwisibe kani mwinjila wakwe Josefi.’

Naye Yakobi awisiba ati ewenka. ‘Inama ya mu mpanga eya mwipaya Josefi,’ efi alukulila. Fyenke’fi efi balukufwaya abakwabo Josefi ati bawisibo balanguluke ati ni nama syamulya. Yakobi abombomana makosa. Amulila insiku isingi. Pano nangabe’fyo Josefi tafwilepo. Pano ngatubone ifyacitika kuli ye uku bamupinta.

Ifyakutaŋga 37:1-35.



Ifyakwipusya

  • Mba nindo abakwabo Josefi bamubelele ne kaso, kabili findo bacitile?
  • Findo abakwabo Josefi balukufwaya ukucita kuli ye, pano findo Lubeni alabila?
  • Cindo cacitika ili abasulwisi abaIsimeli baisa?
  • Findo abakwabo Josefi bacita pakuti bawisibo babone koti Josefi afwa?

Ifyakwipusya na fimbi

  • Pendeni Ifyakutaŋga 37:1-35.

    AbaKlistu koti batuntulula syani icakubwenako cakwe Josefi pa kufisulula ifyakubifya mwi kelesya? (Taŋ. 37:2; Lef. 5:1; 1 Kol. 1:11)

    Cindo calengele abakwabo Josefi ukucite cakubipe’fyo kuli ye? (Taŋ. 37:11, 18; Ifisi. 27:4; Jako. 3:14-16)

    Cindo Yakobi acitile icicitwe’lingi pa kuloosya? (Taŋ. 37:35)