Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 17: Bampundu Abaali Abapusene

Icisimicisyo 17: Bampundu Abaali Abapusene
Eso

ABASANKWA bobilo abali apa bapusene ukwakuti, tali e fyenka? Kani ulisi amasina abo? Umupalu ni Eso, kabili umusankwa uulukulame’mbelele ni Yakobi.

Eso na Yakobi baali ni bampundu bakwe Isaci na Libeka. Isaci wisibo alitemenwe Eso ukwakuti, pakuti ali mupalu umucenjele kabili alukuleta ku ŋanda ifyakulya pakweba’ti ulupwa lungalya. Pano Libeka alitemenwe Yakobi ukwakuti, pakuti ali musankwa umukutumene, kabili uwa mutende.

Bambuya wabo ba Ablaamu bali bacili ne mweo, kabili tungalanguluka lukoso ifi Yakobi atemenwe ukukutika kuli bo ili balukulabila pali baYehoba. Ili bampundu baali ne myaka 15, mukupelako Ablaamu alifwile ili aali ne myaka 175.

Ili Eso aali ne myaka 40 alyupile abanakasi bobilo aba mu calo ca Kanani. Ici calilengele Isaci na Libeka ukubombomana ukwakuti, pakuti aba banakasi tabalukupempelapo baYehoba.

Eli kambi kasuba kwacitikile’cintu cimo icalengele Eso ukufitilwa Yakobi umukwabo. Impindi yalifikile ili Isaci ali ne kusyucisya mpundu mukulu. Pakuti Eso aali mukulu pali Yakobi, Eso alicetekele ati ewo balukusyucisya. Pano ku mpindi ya kunuma Eso aalisitisye ububeli kuli Yakobi ubwakupoke’syuko. Kabili, ili abasankwa bobilo bafyelwe baLesa balilabile ati Yakobi eukapoke’syuko. Kabili’fi e fyacitikile. Isaci alipele’syuko kuli Yakobi umwana wakwe.

Yakobi

Panuma yafyefyo, ili Eso aisibile pali cici alifitilwe Yakobi. Alikalipile icakuti alukufwaya ne kwipaya Yakobi. Ili Libeka aumfwile’ci alibombomene ukwakuti. Namulifyefyo alyebele Isaci umulume wakwe ati: ‘Cikaba icibipile ukwakuti kani Yakobi akoope umo uwa baba abanakasi ba mu Kanani.’

Popele apo Isaci alimwitile Yakobi umwana wakwe ne kumweba’ti: ‘Tesi ukoope umwanakasi wa mu Kanani. Mu mupunda wa fyefyo koya ku ŋanda ya bambuya wobe ba Betweli ku Kalani. Ukoope umwana umwanakasi uwa bamwinsyo wobe ba Labani.’

Yakobi alikutikile kuli bawisi, kabili popele apo alitatikile ne lwendo lwakwe ulutali ukuya uko ukwalukwikala abakwabo ku Kalani.

Ifyakutaŋga 25:5-11, 20-34; 26:34, 35; 27:1-46; 28:1-5; AbaEbeya 12:16, 17.



Ifyakwipusya

  • Eso na Yakobi baali nibani, kabili baalipusene syani?
  • Eso na Yakobi baali ne myaka inga ili Ablaamu mbuya wabo afwile?
  • Mba cindo Eso acitile icalengele banyina na bawisi ukubombomana?
  • Mba nindo Eso afitilwe makosa Yakobi umukwabo?
  • Nilisa ifunde Isaci afundile Yakobi umwana wakwe umwalalume?

Ifyakwipusya na fimbi

  • Pendeni Ifyakutaŋga 25:5-11, 20-34.

    Mba nifindo baYehoba basimikile ifya kuntangiile pa bana abalalume bobilo abakwe Libeka? (Taŋ. 25:23)

    Mba nibwisa bupusano bwalipo pafi Yakobi na Eso balukububona ubupyani bwa bubele? (Taŋ. 25:31-34)

  • Pendeni Ifyakutaŋga 26:34, 35; 27:1-46; na 28:1-5.

    Mba Eso alilangisye syani umupufyo wakwe ku fintu fya baLesa? (Taŋ. 26:34, 35; 27:46)

    Kani Yakobi aali ne kupoke’syuko lya baLesa, findo Isaci amubulile Yakobi ukucita? (Taŋ. 28:1-4)

  • Pendeni AbaEbeya 12:16, 17.

    Mba nifindo icakubwenako cakwe Eso cilangisya ifingacitika kuli babo abapufya ifintu ificindeme?