Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 16: Isaci Asangana Umukasi Umuweme

Icisimicisyo 16: Isaci Asangana Umukasi Umuweme

KANI ulimwisi uyu mwanakasi uuli pali cici cikope? Isina lyakwe ni Libeka. Ne mwalalume alukwisa mu kumukumanya ni Isaci. Alukuba umukasi wakwe. Kani ici calicitikile syani?

Ablaamu wisi wakwe Isaci alukufwaya ukusangana umukasi wa mwana wakwe umuweme. Taalukufwayapo ati Isaci opile mu Kanani, pakuti abantu mulya baalukupempela tulesa twa bufi. Popele Ablaamu alitile umupyungisi wakwe ne kulabila ati: ‘Uye ku bakwasu abekala ku Kalani ne kumusalulwila Isaci umwana wanji umukasi.’

Penka’po umupyungisi wakwe Ablaamu alipintile ingamela ikumi kabili ne kuya ulwendo ulutali. Ili afikile apepi ne mupunda apalukwikala abakwabo Ablaamu, alimakene pa mukalo. Cali cingulo, impindi ili abanakasi ba mu musi balukwisa mukutapa amenda ku mukalo. Popele umupyungisi wakwe Ablaamu alitembele kuli baYehoba: ‘Musumine ati moye uukanwensya amenda nebo ne ngamela akalukuli ni woyo uumwamusalulwila ukuba umukasi wakwe Isaci.’

Libeka alukukumanya Isaci

Mu mpindi iinini Libeka alisile mu kutapa amenda. Ili umupyungisi amulombele amenda, alimupele. Eli aile kasitapila amenda ingamela syonse isyali ne cilaka. Wali mulimo uukosele pakuti ingamela silanwa amenda aengi ukwakuti.

Ili Libeka asilile ukucite’fi, umupyungisi wakwe Ablaamu alimwipwisye isina lya bawisi. Kabili alimulombele ukwikalako ubusiku bumo kwabo ku ŋanda. Alilabile ati: ‘Nebo ene mwana waba Betweli, ne mwakwikala mwebo tulikwete.’ Umupyungisi wakwe Ablaamu alisibile ati Betweli ali mwana wakwe Nako umukwabo Ablaamu. Popele alinamisye pansi ne kutota baYehoba pa kumutangilila ne kumufisya ku bakwabo Ablaamu.

Bulya busiku umupyungisi wakwe Ablaamu alyebele Betweli ne ndume yakwe Libeka, Labani, umulandu aisiile. Bonse balisuminisye ati Libeka angaya naye ne kuupwa kuli Isaci. Mba findo Libeka alabile ili bamwipwisye? Alilabile ati, ‘Inya,’ aalukufwayo’kuya. Popele ubusiku ubwakonkelepo balininsile pa ngamela ne kutatikako ulwendo ulutali ukubwelela ku Kanani.

Ili bafikile, cali cingulo busiku. Libeka alibwene umwalalume alukwenda mwi bala. Aali ni Isaci. Alisangalele pa kubona Libeka. Palipitile lukoso imyaka itatu ili ba Sala banyina bafwile, kabili aali acili umubombomene. Pano Isaci alimutemenwe makosa Libeka, ne kuba umusangalele nakabili.

Ifyakutaŋga 24:1-67.



Ifyakwipusya

  • Kani umwanakasi ne mwalalume abali mu cikope nibani?
  • Kani Ablaamu alicitile syani pa kusangano’mukasi wa mwana wakwe, kabili nindo acitile’fyo?
  • Kani itembelo lya mupyungisi wakwe Ablaamu lya lyasukilwe syani?
  • Mba Libeka alyasukile syani ili bamwipwisye ati kani aalukufwaya ukuupwa kuli Isaci?
  • Mba nindo yalengele ati Isaci asangalale nakabili?

Ifyakwipusya na fimbi

  • Pendeni Ifyakutaŋga 24:1-67.

    Mba niisa imibelo iiweme iyi alangisye Libeka ili akumene ne mupyungisi wakwe Ablaamu pa mukalo? (Taŋ. 24:17-20; Ifisi. 31:17, 31)

    Ifi Ablaamu ateyanisisye Isaci umukasi kani filasambisye’ndo abaKlistu muli bulelo? (Taŋ. 24:37, 38; 1 Kol. 7:39; 2 Kol. 6:14)

    Mba nindo twelelwe ukulukusangile’mpindi ya kwalakanya, koti nifyefyo ifyacitile Isaci? (Taŋ. 24:63; Amasa. 77:12; Filip. 4:8)