Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 13: Ablaamu—Icibusa ca BaLesa

Icisimicisyo 13: Ablaamu—Icibusa ca BaLesa

UMO umupunda uku abantu baile mu kwikala ili ubulobe bwa menda bwasilile walukwitwa ati umusi wa Ule. Walibele musi uucindeme umwali ne maŋanda amo aaweme. Pano abantu abali mulya balukutembela tulesa twa bufi. Efi balukucita na mu Babeli. Abantu abali mu musi wa Ule na Babeli tabali koti ni Noa ne mwana wakwe Syemi, abatwalilile ukupyungila baYehoba.

Mukupelako, palipitile imyaka 350 ili Ubulobe bwa menda bwasilile, Noa umuntu wa bucetekelo alifwile. Palipitile lukoso imyaka yobilo ne mwalalume ulukubona mu cikope alifyelwe. Aali muntu uwalibelele kuli baLesa. Isina lyakwe lyali ni Ablaamu. Alukwikala ne lupwa lwakwe mu musi wa Ule.

Ablaamu alukutamba utubangabanga

Kambi kasuba baYehoba balyebele Ablaamu ati: ‘Ufumeko ku Ule na ku bakwanu, ne kuya ku calo ico ici nkakulangisya.’ Kani Ablaamu alyumfwilile baLesa ne kusya fyonse ifya kusangalasya ifyali mu musi wa Ule? Inya, alyumfwilile. Kabili nipakuti Ablaamu lyonse alukumfwila baLesa eci aisibikilwe ati cibusa ca baLesa.

Bambi abakwabo Ablaamu balile naye ili afumineko ku Ule. Bawisi Ablaamu ba Tela balile naye. Loti umwipwa wakwe naye alile. Kabili Sala umukasi wakwe Ablaamu naye alile. Mukupita kwa mpindi bonse balifikile ku musi uwalukwitwa ati Kalani, eko Tela afwilile. Baali ukutali na ku musi wa Ule.

Ili papitile mpindi Ablaamu ne ba mu ŋanda yakwe balifumineko ku Kalani ne kwisa ku musi uwalukwitwa ati Kanani. Kulya eko baYehoba balabile ati: ‘Ici e calo nkapela ku bana bobe.’ Ablaamu alikele mu Kanani mu masema.

BaLesa balitatikile ukofwa Ablaamu icakweba’ti alikwete amatanga ambelele ne nama simbi ne myanda ya bapyunjisi. Pano ye na Sala tabakwetepo neli mwana uwakulifyalila.

Ili Ablaamu ali ne myaka 99, baYehoba balilabile ati: ‘Nakulaya ati ukalukuli niwe wisibo ifikoto fya bantu ifingi.’ Kani ici cali ne kucitikako syani, pakuti Ablaamu na Sala baalicekwile ukwakuti bafyale umwana?

Ifyakutaŋga 11:27-32; 12:1-7; 17:1-8, 15-17; 18:9-19.



Ifyakwipusya

  • Kani abantu abaikele mu musi wa Ule baali syani?
  • Kani umwalalume uuli mu cikope ninani, nilwisa afyelwe, kabili alukwikala pi?
  • Mba nifindo baLesa babulile Ablaamu ukucita?
  • Mba nindo Ablaamu alukwitilwa ati icibusa ca baLesa?
  • Mba nibani abaile na Ablaamu ili afumine ku Ule?
  • Kani nifindo baLesa babulile Ablaamu ili afikile ku calo ca Kanani?
  • Mba nifindo baLesa balaile Ablaamu ili aali ne myaka ya kufyalwa 99?

Ifyakwipusya na fimbi

  • Pendeni Ifyakutaŋga 11:27-32.

    Kani Ablaamu aali naye syani Loti? (Taŋ. 11:27)

    Nangaba’ti Tela e waisibikilwe ati alikuusisye ulupwa lwakwe ukulola ku Kanani, kani tulisibile syani ati ni Ablaamu e wababulile ati bakuuke, kabili nindo acitile’fyo? (Taŋ. 11:31; Cit 7:2-4)

  • Pendeni Ifyakutaŋga 12:1-7

    Mba nifindo baLesa balundileko ku kulayana kwabo na Ablaamu ili afikile ku calo ca Kanani? (Taŋ. 12:7)

  • Pendeni Ifyakutaŋga 17:1-8, 15-17.

    Kani nilisa isina bamupeele Ablama ili aali ne myaka ya kufyalwa 99, kabili nindo? (Taŋ. 17:5)

    Kani nifindo baLesa balaile ukusyukisya Sala kuntangile? (Taŋ. 17:15, 16)

  • Pendeni Ifyakutaŋga18:9-19.

    Ifyakutaŋga 18:19, kani filalabila pali isa’milimo iya bafyasi abalalume? (Ndute. 6:6, 7; Efes. 6:4)

    Kani nifindo fyacitikile kuli Sala ifilangisya ati tekuti tufisepo icili conse kuli baYehoba? (Taŋ. 18:12, 15; Amasa. 44:21)