Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 9: Noa Aibaka Ubwato

Icisimicisyo 9: Noa Aibaka Ubwato
Abantu balukumuseka Noa

NOA alikwete umukasi ne bana abalalume batatu. Amasina abana aali ni Syemi, Yamu na Yafeti. Kabili cila muntu alikwete umukasi. Kansi kwali abantu basanu na batatu mu lupwa lwakwe Noa.

Pano baLesa balyebele Noa ukucite’cintu icensu. Balimwebele ukwibako’bwato ubukulu. Ubu bwato bwali bukulu, bwalukuboneka koti cibokosi icikulu kabili icitali. BaLesa balilabile ati: ‘Ukacipange icafitupa fitatu ukuya mwiulu, kabili ukabikemo ne fipinda.’ Ifi ifipinda fyali fyakwe Noa ne lupwa lwakwe, inama, kabili ne fyakulya fya bonse ifyalukufwaikwa.

Kabili baLesa balyebele Noa ukusingula ifinaŋana ku bwato pakweba’ti amenda tekuti engile. BaLesa balilabile ati: ‘Ndinekuleta ubulobe bwa menda ne konala conse’calo. Onse uyo uutakalukuli mu bwato akafwa.’

Noa ne bana bakwe balikutikile kuli baLesa kabili kabatatika ne kwibaka. Pano bambi abantu balukuseka lukoso. Balitwalilile ukubifya. Takwalipo neli umo uwacetekele Noa ili abebele ifi baLesa baali ne kucita.

Ulupwa lwakwe Noa lulukwingisha inama ne fyakulya mu bwato

Caliposele impindi iitali pa kwibako’bwato pakuti bwalikulisye. Mukupelako, panuma ya myake’ingi, bwalisilile. Eli baLesa baebele Noa ukuleta inama mu bwato. BaLesa balilabile ukwingisyamo sibili sibili inama sya mikoka imo ifi, iyalalume ne yanakasi. Pano imbi imikoka ya nama, baLesa balyebele Noa ukwingisyamo isili sisanu na sibili. Kabili baLesa balyebele Noa ukwingisyamo yonse imikoka ya fyuni. Noa alicitile koti nifyefyo baLesa bamubulile.

Panuma yafyefyo, Noa ne lupwa lwakwe nabo balingile mu bwato. Eli baLesa baiseleko iciibi. Mukati, Noa ne lupwa lwakwe baalukupembelela. Languluka lukoso ukweba’ti uli mu bwato nabo, mulukupembelela. Kani muli bucine kukaba ubulobe bwa menda koti nifyefyo baLesa balabile?

Ifyakutaŋga 6:9-22; 7:1-9.



Ifyakwipusya

  • Bali banga mu lupwa lwakwe Noa, kabili abana bakwe botatu balilicilwe ati nibani?
  • Mba nicisa icintu icensu baLesa babulile Noa ukucita, kabili nipali wisa mulandu?
  • Mba abantu balicitile’ndo ili Noa ababulileko pa bwato?
  • Mba findo baLesa bamubulile Noa ukucita ku nama?
  • Panuma ili baLesa baiseleko iciibi ku bwato, mba findo Noa ne lupwa lwakwe baali ne kucita?

Ifyakwipusya na fimbi

  • Pendeni Ifyakutaŋga 6:9-22.

    Mba nindo yalengele ati Noa abe umupempesi uulibelele uwa baLesa bacine? (Taŋ. 6:9, 22)

    BaYehoba balamubona syani umuntu uucita ubungwa, kabili ukwisibe’ci kungatofwa syani ukusalulula ifyangalo fyesu? (Taŋ. 6:11, 12; Amasa. 11:5)

    Kani tungatuntulula syani icakubwenako cakwe Noa ili twapokelela ukutungulula ukupitila mu kwansika ukwa baYehoba? (Taŋ. 6:22; 1 Yoa. 5:3)

  • Pendeni Ifyakutaŋga 7:1-9.

    Mba cingatukosya syani icine cakweba’ti baYehoba balibwene Noa umuntu uutalipo umuwaminine ukuba umulungeme? (Taŋ. 7:1; Ifisi. 10:16; Yisa. 26:7)