Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 8: Abalalume Abamakosa mu Calo

Icisimicisyo 8: Abalalume Abamakosa mu Calo

KANI umo umutali ukufika na mu mutenge wa ŋanda yenu akusinkamana, nicindo ungalanguluka? Uyo umuntu angaba uwamakosa! Pa mpindi imo kwali abamakosa mu calo. Baibolo ilalabila ati bawisibo bali ni nkalamba isyafumine kwiulu. Pano cingaba syani koti nifyefyo?

Abalalume bamakosa abalukansa

Anuka ukweba’ti, inkalamba imbifi Satana aalukupyungisya ukucita ifibipile. Aalukwesya ne kubifya inkalamba sya baLesa. Mukupita kwa mpindi, isi inkalamba simbi syalitatikile ukukutika kuli Satana. Syalilekele ukupyunga imilimo basipele baLesa mwiulu. Kabili syalisile pa calo ca pansi ne kulipangile’mibili ya buntunsi. Mba ungesiba icalengele?

Baibolo ilalabila ati nipakuti aba abana ba baLesa balibwene abanakasi babulombe mu calo kabili balifwaile ukwikala nabo. Popele balisile pa calo ne kuupa aba banakasi. Baibolo ilalabila ati ici calibipile, nipakuti baLesa balilengele inkalamba ati silukwikala kwiulu.

Ili inkalamba ne bakasi babo bakwete abana, abana bali abapuseneko. Pa kutanga pambi tababonekele ukupusanako makosa. Pano balukuya lukoso ili bakula ne kukoselako, mpaka kababa abapamfi kabili abamakosa.

Aba balalume bamakosa bali ni mbifi. Kabili pakuti bali abapamfi kabili abamakosa, balukusomesya abantu. Balukwesya ukupatikisya uuli onse ukuba imbifi koti nibo.

Enoci alifwile, pano kwali umuntu umbi umuweme pa calo. Isina lya uyu muntu lyali ni Noa. Impindi yonse alukucita ifi baLesa balukufwaya ati acite.

Kambi kasuba baLesa balibulile Noa ati impindi yafika iyakweba’ti bonale imbifi syonse. Pano baLesa baali ne kupulusya Noa, ulupwa lwakwe ne nama isingi. Ngatubone ifi baLesa bacitile’fi.

Ifyakutaŋga 6:1-8; Juda 6.



Ifyakwipusya

  • Mba nifindo fyacitikile ili inkalamba simo simo isya baLesa syaumfwilile Satana?
  • Mba nindo inkalamba simo simo syalekele imilimo yasiko kwiulu ne kwisa pa calo ca pansi?
  • Mba nindo cabelele icibipile pakuti inkalamba syalisile pa calo ca pansi ne kulipangile’mibili ya buntunsi?
  • Mba nindo yapuseneko ku bana ba nkalamba ne bana bambi?
  • Koti nifyefyo ulukubona mu cikope, kani nifindo abana ba nkalamba bacitile ili babele ne makosa?
  • Panuma yakwe Enoci, kani ninani umwalalume umuweme uwaikeleko pa calo, kabili nindo baLesa bamutemenwe?

Ifyakwipusya na fimbi

  • Pendeni Ifyakutaŋga 6:1-8.

    Kani nifindo Ifyakutaŋga 6:6 fifisulula pafi imibelo yesu ingalenga baYehoba ukumfwa? (Ama. 78:40, 41; Ifisi. 27:11)

  • Pendeni Juda 6.

    Kani inkalamba syesyo ‘isitasyalamine imipunda yasiko iya kutanga’ mu nsiku syakwe Noa silatwanusyako indo muli bulelo? (1 Kol. 3:5-9; 2 Pet. 2:4, 9, 10)