Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 4: Ici Balufiisye Umusi Wabo

Icisimicisyo 4: Ici Balufiisye Umusi Wabo

BONA pano icilukucitika. Adama na Efa balukubatamfya mwi bala iliweme ilya Edeni. Kani waisiba icalenga?

Adama na Efa balukubatamfyamo mwi bala lya Edeni

Nipakuti balicitile icakubifya icikulu. BaYehoba balibapanikile. Kani ungacisiba icakubifya Adama na Efa bacitile?

Balicitile icintu ici baLesa babakenye. BaLesa balibabulile ukweba’ti koti balya ku fisepo fyonse ifyali mwi bala. Pano ku citi cimo lukoso baLesa balibabulile ati tesi ukulyako, pakuti kani balyako bangesa kufwa. Cilye’citi baLesa balicilamine ati cabo. Kabili tulisi ukweba’ti cibipile ukupinte’cintu icitacili cesu, kani tatwisi? Pano cindo cacitikile?

Kambi kasuba ili Efa aali enka mwi bala, insoka kailabila kuli ye. Languluka pali cici! Yalibulile Efa ukulya ku citi baLesa babakenye ukulyako. Pano, ili baYehoba balengele insoka tabasilengele ukweba’ti silukulabila. Ici cilukulangilila ati kwali umo uwalukulenge’nsoka ukulabila. Mba ali ninani uyo?

Taalipo ni Adama. Aali muntu uyo baYehoba balengele akale makosa ili tabangalenga ne calo. Abo abantu ni nkalamba, kabili tekuti tubabonepo. Iyi inkalamba yalibele ne kulilemya makosa. Yalitatikile ne kulanguluka ukweba’ti nayo ingalukuteka koti ni baLesa. Yalukufwaya abantunsi ukulukuyumfwila yo tesi ukumfwila baYehoba. Yali e nkalamba yalengele insoka ukulabila.

Iyi inkalamba yalitumpaikile Efa. Ili yaebele Efa ukweba’ti akaba koti ni baLesa kani alya ku cisepo, naye alyumfwilile. Naye alilile, naye Adama kalyako. Adama na Efa tabaumfwilile baLesa, eci balufiisye ne musi uweme uwali mupunda wabo uwa kwikalamo.

Kambi kasuba baLesa bakabono’kweba’ti icalo caba koti nifyenka filya ibala lya Edeni lyali. Kuntangile tukasambilila ifi tungapyungako pakuti icalo cikabe koti nifyefyo. Pano, lekeni tubone icacitikile kuli Adama na Efa.

Ifyakutaŋga 2:16, 17; 3:1-13, 24; Ukufisulula 12:9.



Ifyakwipusya

  • Mu cikope, kani cindo cilukucitika kuli Adama na Efa?
  • Mba nindo baYehoba babapanikile?
  • Mba findo insoka yabulile Efa?
  • Mba ninani uwalengele insoka ukulabila kuli Efa?
  • Mba nindo Adama na Efa balufiisye umusi wabo uwa Paladaiso?

Ifyakwipusya na fimbi

  • Pendeni Ifyakutaŋga 2:16, 17 na 3:1-13, 24.

    Mbe cakwipusya kuli Efa calilengele syani baYehoba ukuboneka koti ba bufi? (Taŋ. 3:1-5; 1 Yoa. 5:3)

    Kani icacitikiile Efa cingaba syani icakutucenjesya nafwebo? (Filip. 4:8; Jako. 1:14, 15; 1 Yoa. 2:16)

    Mba nimuli yisa’nsila Adama na Efa bafililwe ukusumina umulandu bacitile? (Taŋ. 3:12, 13)

    Kani bakelubi abaali ku mutulesuba we bala lya Edeni balyofweleko syani amakosa abaYehoba aakuteka? (Taŋ. 3:24)

  • Pendeni Ukufisulula 12:9.

    Kani Satana alifumisye syani abantunsi ku kuteka kwa baLesa? (1 Yoa. 5:19)