Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Amalyashi ya mu Baibolo

Icisimicisyo 3: Umwalalume wa Kutanga ne Mwanakasi

Icisimicisyo 3: Umwalalume wa Kutanga ne Mwanakasi

MBA cindo capusanako muli cici icikope? Inya, bantu abo abalimo. Bali mwalalume wa kutanga ne mwanakasi. Mba ninani uwabalengele? Ni baLesa. Kani ulilisi isina lyabo? Ni baYehoba. Kabili umwalalume ne mwanakasi balilicilwe ati Adama na Efa.

Adama na Efa mwi bala lya Edeni

Ifi efi baYehoba Lesa balengele Adama. Balibulile ifukutu ukufuma kwi loba kabili kuli lyelyo eko balengele umubili uwaminine, umubili wa mwalalume. Eli bapeemenemo mu myona ya mwalalume, naye Adama alibele mweo.

BaYehoba Lesa balimukwatile’milimo Adama. Balyebele Adama ukusiilika amasina syonse inama isipusenepusene. Adama pambi alukusitambe’nama pa mpindi iitali namulifyefyo alukusala amasina aaweme aakusiilika syonse. Ili Adama alukwilike’nama alitatikile ukubona cimbi. Mba wacisibe’co?

Inama syonse syalikwete isibyakwe. Kwali insofu isyalalume ne nsofu isyanakasi, kabili kwali inkalamu isyalalume ne nkalamu isyanakasi. Pano Adama takwetepo uwakuba umubyakwe. Namulifyefyo baYehoba balilengele Adama ukuponena mutulo utulemene, eli bangabulako ulubafu ukufuma kuli ye. Kuli lwenko’lu lubafu, baYehoba balilengele umwanakasi wakwe Adama, naye alibele mukasi wakwe.

Mama Adama ifi asangalele! Kabili languluka ifi Efa asangalele pa kumubika mwi bale’lyo iliweme ukulukwikalamo! Pano koti bafyala abana ne kwikala pamo abasangalele.

BaYehoba balukufwaya Adama na Efa ukwikala umuyayaya. Balukufwaya ati abo bobilo balenge’calo conse ukulukuboneka bwino koti libala lya Edeni. Ifi Adama na Efa basangalele ili balangulukile pakucite’fi! Kani na webo nga walitemenwe ukukwatako akabeya ka kulenge’calo ukuba libala iliweme? Pano ukusangalala kwakwe Adama na Efa takwatwalililepo. Lekeni tubone icalengele.

Amasamo 83:18; Ifyakutaŋga 1:26-31; 2:7-25.



Ifyakwipusya

  • Icikope icili mu Cisimicisyo 3 capusanako syani ne cikope icili mu Cisimicisyo 2?
  • Mba ninani uwalengele umwalalume wa kutanga, kabili uyo mwalalume isina lyakwe aali ninani?
  • Mba niisa imilimo baLesa bapele Adama ukupyunga?
  • Mba nindo baLesa balengeele Adama ukuponena mutulo utulemene?
  • Kani Adama na Efa baali nekuba ne mweo ukufika lwisa, kabili niise’milimo baYehoba bafwaile ati bapyunge?

Ifyakwipusya na fimbi

  • Pendeni Amasamo 83:18.

    Mba baLesa nibani isina, kabili nibwisa ubukulu ubulibelele bakwete pa calo? (Jele. 16:21; Dan. 4:17)

  • Pendeni Ifyakutaŋga 1:26-31.

    Mba findo baLesa bapelekesyeko ukulenga pa busiku bwa busisanu na bumo, kabili ubu bulengesi bwalipuseneko syani ku nama? (Taŋ. 1:26)

    Mba niyesa mapekanyo baLesa baansikiile umuntu ne nama? (Taŋ. 1:30)

  • Pendeni Ifyakutaŋga 2:7-25.

    Mba cindo icasansisyemo mu mulimo wakwe Adama uwakwilike’nama? (Taŋ. 2:19)

    Kani Ifyakutaŋga 2:24 filatofwa syani ukumfwikisya ifi baYehoba babona icupo, ukupaatukana, ne kulekana? (Mat. 19:4-6, 9)