Onywala i calo moro ame tye i Saxony, ame onwoŋo i kare-naca olwoŋo ni German Democratic Republic (GDR). Kwo me pacowa onwoŋo tye aber dok opoŋ i mar, dok onywalla opwonya kede kite me kwo opore. Gamente me GDR onwoŋo obedo gamente otedero, doŋ ituŋ baŋ pol a jo me Saxony, dini onwoŋo pire mom tek. Dok ituŋ baŋa, Obaŋa kom onwoŋo pe. Tam aryo apapat aye obedo tella i kwona cakere i tinona tuno naka i mwaka apar wie aboro: pe ye i kom tye Obaŋa kede cwakko Loc Alwak.

Piŋo Loc Alwak ogudo cunya tutwal? Pien onwoŋo amaro tam ni jo luŋ rom aroma. Meddo i kom mannono, onwoŋo daŋ aye ni jammi luŋ myero opok arom aroma aboŋo leŋere, pien man onwoŋo bino gikko bedo kede lonyo ame okato kare kede can ame okato kare. Doŋ ate luŋŋo wia i tic kede eryoŋet a jo ayot ame cwako Loc Alwak. I kare ame atye mwaka apar wie aŋwen, abedo tiyo tic atek me cokko karacel papara ame oket ata kan ame orumowa. Otela me boma me Aue cunygi obedo ayom eka ote miya gini mot pi tutena. Bed bala onwoŋo pwod ayot, acako ŋeyo owibye mogo adoŋo me GDR. Acako winyo ni onwoŋo doŋ aketo yik aber dok ni anyimma doŋ onwoŋo tye aler.

Eka genna te balle atura. I mwaka 1989, apama me Berlin ame onwoŋo poko tutuŋ kide kede tutuŋ to me Germany te rwaccere oko karacel kede gedo adwoŋ ame onwoŋo mampici me pati me Loc Alwak onwoŋo tye iye. Pekki te bedo timere atura tere tere. Cucut ate doŋ niaŋ ni ŋollo kop aleŋa onwoŋo doŋ onya atek tutwal i GDR. Me apor, jo ame onwoŋo pe cwako Loc Alwak onwoŋo doŋ oterogi bala jo ame rwomgi tye piny. Mannono onwoŋo twere niŋo? Wan jo ame onwoŋo cwako Loc Alwak pe onwoŋo oye ni jo luŋ rom aroma? En Loc Alwak-ki onwoŋo tye ka doŋ i nyiŋe keken bo? Par te cira oko.

Aloko nenona ate dwokko i wer kede goc. Kit ame onwoŋo atwero kwan i ka kwan ame onwoŋo opwonyo iye wer—kede neno me wot i univaciti-ni—acako bedo kede tam me bedo ago wer. Meddo i kom mannono, ate doŋ bollo teŋe kite me kwo opore ame onwoŋo apwonyo i kare ame pwod atidi. Gin a pire tek doŋ onwoŋo obedo bedo kede kwo aber kun aloloko anyira acalo apaina. Ento wer, goc, kede kwo ame itye agonya, pe odwoko parrana piny kadi acel. Kadi naka cale ame abedo goyo onwoŋo kella ka lworo keken. Anyim koŋ doŋ onwoŋo tye niŋo? Dok tyen kop me kwo onwoŋo obedo ŋo?

I kare ame anwoŋo agam pi apenyena, abedo kede wur tutwal. I nino moro acel i otyeno i ka kwan, abedo i kin otino moro ame onwoŋo tye a leyo kop i kom anyim. Mandy a onwoŋo obedo atin kwan dok ŋat acel i kin Ocaden a Jeova. Otyeno-naca en omia tam aber i kom yo me aluba. En okobba ni, “Andreas,” “ka imito nwoŋo agam pi apenyeni i kom kwo kede anyim, kwan Baibul i yore atut.”

Pe ayeŋ kede koppere dok onwoŋo amito ŋeyo jammi apol, ento miti me ŋeyo jammi apol aye te bedo adwoŋ i nino-naca. Mandy okobba ni akwan Danieri cura 2, dok gin ame akwano te wekka kede wur. Icwil man kobo i kom oteka apapat me wi lobo, gamente apapat ame onwoŋo bino guddo kwo a jo tuno naka i karewa-ni. Mandy onyutta icwil okene me Baibul ame kobo i kom anyimwa. I agikki mere ate doŋ cakko nwoŋŋo agam pi apenyena! Ento ŋagi ame ocoo icwil magi me kop odwarpiny? Dok ŋa ame onwoŋo twero gecco anyim i yore iyore dok kakare? Ce nyo twero bedoni Obaŋa kom daŋ tye?

Mandy okuba kede Horst kede cege Angelika, ame obedo gini Ocaden a Jeova, gin okonya me niaŋ kop Obaŋa aber akato. Oyotoyot ate niaŋ ni Ocaden a Jeova keken aye obedo eryoŋet me dini ame tio dok konyo jo me ŋeyo nyiŋ Obaŋa ikokome, Jeova. (Jabuli 83:18; Matayo 6:9) Apwonyo ni Obaŋa Jeova omio dano gen me kwo pi naka i lobo paradic. Jabuli 37:9 kobo ni: “Jo ame kuro Rwot bino leyo lobo.” Ogudo cunya tutwal me niaŋ ni dogola me kwo man tye oyabo pi jo luŋ ame tutte me kwo alubere kede rwom me kit atir Obaŋa kit ame okobo kede i Baibul.

Cite, obedo atekka me lokko kite me kwona wek bed ame rwatte kede cik me Baibul. Doŋona acalo awer kede agoc oweko adoko ŋat ame obedo awaka, doŋ onwoŋo mitte ni apwony kite me bedo ŋat amwol. Meddo i kom mannono, onwoŋo pe yotta me wekko kite kwo me caro caro. Yomo cunya nadi me ŋeyo ni Jeova diyo cunye, nyuto kica dok niaŋ i kom jo luŋ ame tutte me ketto i tic pwony me Baibul i kwogi!

Cwakko Loc Alwak kede pe ye i kom tye Obaŋa aye onwoŋo opoŋ i kwona pi mwakki apar wie aboro cakere i kare me tinona, ento Baibul obedo lokko kwona cakere i kare-naca. Jammi ame apwonyo odwoko piny parrana i kom anyim dok omia tyen kop me kwo. I mwaka 1993, anwoŋo batija acalo ŋat acel i kin Ocaden a Jeova, eka i mwaka 2000, ate nyommo Tabitha ame onwoŋo obedo arab amut a kome mit. Ocwalo cawa alac kit ame onwoŋo twere kede i konynyo jo okene me ŋeyo Baibul. Jo apol ame orwatte kedgi, kwogi onwoŋo tye bala mega acon, gin onwoŋo cwako Loc Alwak dok pe oye gini i kom tye Obaŋa. Awinyo twon yeŋo tutwal ka anyuttigi kite me ŋeyo Jeova.

I kare ame acako notte kede Ocaden a Jeova, onywalla obedo kede twon wur tutwal. Cite cakere i kare-naca, ocako nenno gini adwoggi aber ame notte karacel kede Ocaden a Jeova okelo i kwona. Me yomcuny ituŋ baŋa, gin tye a kwanno Baibul dok otye obedo i cokere Ocaden a Jeova.

Tabitha kede an otye onwoŋŋo mit a nyomere pien wan otemo i tekwa me lubbo tam ame Baibul mio baŋ jo ame onyomere. Me apor, lubbo tam ame Baibul mio i kom bedo agen i nyom tye amedde kede jiŋŋo nyomwa.—Jo Eburania 13:4.

Aman doŋ a pe kede lworo i kwo kede par i kom anyim. Awinyo ni atye i kin jo paco ame onotte i wi lobo ducu, paco ame kuc me ateteni kede notte tye iye. I paco man wan ducu obedo arom aroma. Mannono aye gin ame abedo ye iye dok onwoŋo atye i miti me nwoŋŋo i kwona.