Skip to content

Skip to table of contents

 MUTU 19

Mubukilile Ukuba Pabumanyani nu Yehova

Mubukilile Ukuba Pabumanyani nu Yehova

1, 2. Ka tungabwagha kwiyi ubutuli amasiku ghano?

TUFWANIKIZYE ukuti mukwenda pamusebo, mukwennya ukuti amabingu ghafisya, kuli ichimpepo ichikulu, utumesya tukumwetuka sona ivula yikugilima. Ukusita ukukaba ivula yikwanda ukuwa. Polelo munganda ukulonda amalo aghakuti muvwamepo. Ka mungiyivwa buli-buli nanti mwaghagha amalo amiza sona aghakumila?

2 Nuswe bulo tuli mukabalilo akakuyana bulo, ko muchisu ivintu vikubipila-bipila. Mungilalusya ukuti, ‘Ka ningabwagha kwiyi ubutuli?’ Umusimbi yumo uwa buku iIya Masalimo akati: “Intinene kwa Yehova: ‘Umwe mwe mupoki wane, sona na malo aghakufisamamo, u Chala wane yo nkumusubila.’” (Masalimo 91.2) U Yehova angatwavwa ukuti tujimbe ku ntamyo zyo tuli nazyo sona atupile ulusubilo ulwa ivintu ivyiza ivya muntazi.

3. Ka tungabomba ichoni ukuti u Yehova abe mupoki witu?

3 Ka u Yehova akutufighilila buli-buli? Akutwavwa ukuti tumalane ni ntamyo zyosi zyo tuli nazyo, sona ali na maka nkani ukuchila umuntu aliwesi yo angalonda ukutuvulazya. Napo tungakomana ni vintu ivibibi, tuli nu lusubilo ukuti u Yehova akwiza pakuyannya vyosi vyo vingakomanika. Ibayibolo likutughomya ukuti: “Mwikalaye mulughano ulwa Chala.” (Yuda 21) Tubaghiye ukubukilila ukuba pabumanyani nu Yehova ukuti atwavwange nanti twakomana ni ntamyo. Ka tungabomba buli- buli vinivi?

TUPALIZYANJE ULUGHANO ULWA CHALA

4, 5. Ka u Yehova akutulangizya buli-buli ulughano?

4 Chakulondiwa nkani ukumanya ukuti u Yehova atughanite ukuti tubukilile ukuba pabumanyani nawe. Inong’onela ivintu  vyo u Yehova ababombela pa bumi bwinu. Atupile ichisu ichiza ichakwikalamo cho chili nivya kumela sona ni vinyamana. Atupile sona ivyakulya na mizi. U Yehova atumanyisya izina lyache sona ni nkalo zyache ukwendela mu Bayibolo. Ukuchila pavyosi alangizizye sona ulughano pakututumila u Mwana wache, u Yesu pachisu ichapasi ukuti ize atufwile. (Yohani 3.16) Ichifukwa cha kusatuliwa tuli nu lusubilo ulwiza ulwa muntazi.

5 U Yehova amupile u Yesu Ubumwene pamo iboma lyo lili kumwanya, lyo lunulu likwiza pakumazya intamyo zyosi. Ubumwene ubu bukwiza ukupanga ichisu ichapasi ukuba we paladayiso, mo aliwesi pakwiza pakwikala umwamutende sona umwakuhoboka bwila na bwila. (Masalimo 37.29) Izila iyamwabo yo u Yehova ukulangizizya ulughano yakuti akutumanyisya mo tungikalila akiza akabalilo aka. Akulonda ukuti tulabaye kukwache sona akabalilo kosi akwivwa inyiputo zyitu. Ivi vikulangizya ukuti u Yehova amughanite umuntu aliwesi.

6. Ka mungalangizya buli-buli ukuti mukupalizya ulughano ulwa Yehova?

6 Ka mungalangizya buli- buli ukuti mukupalizya ulughano ulwa Yehova? Langizya ukuti mukupalizya pa vyosi vyo ababombeye. Chachitima ukuti abantu abinji amasiku ghano batakupaliza. Momo vikabela po u Yesu akaba pachisu ichapasi. Pakabalilo kamo u Yesu akapozya abamabombo 10, loli weka weyo akanyokela nukumupalizya u Yesu. (Luka 17.12-17) Nuswe bulo tukulonda ukuba ngati we mwanavuli yo akamupalizya u Yesu. Tukulonda ukumupalizya u Yehova akabalilo kosi.

7. Ka tungamughana buli-buli u Yehova nu moyo witu ghosi?

7 Nuswe bulo tukulonda ukulangizya ulughano lwitu kwa Yehova. U Yesu akababuzya abamanyili bache ukuti bamughanaye u Yehova nu moyo wabo ghosi, nu bumi bwabo bosi sona ni nyinong’ono zyabo zyosi. (Belenga Matayi 22.37.) Ka ichi chikunganamula ichoni?

8, 9. Ka tungalangizya buli-buli ukuti tumughanite u Yehova?

 8 Te chakukwana ukunena bulo ukuti tumughanite u Yehova. Tungalangizya ukuti tumughanite u Yehova nu moyo witu ghosi nu bumi bwitu bosi sona ni nyinong’ono zyitu zyosi, ukwendela mu vya kubomba vyitu. (Matayi 7.16-20) Ibayibolo likumanyisya ukuti waghe tukumughana u Yehova tukwiza ukuvwila amalamulo ghache. Ka ichi chipala? Awe, chifukwa “amalamulo ghache ghate nkafu kukwitu.”​—Belenga 1 Yohani 5.3.

9 Nanti tukumwivwila u Yehova, tukuba swe bakuhoboka sona tukuba nu bumi ubwiza. (Yesaya 48.17, 18) Loli choni cho chingatwavwa ukuti tubukilile ukuba bamanyani ba Yehova? Za twennye.

MUBUKILILE UKUPALAMILA KWA YEHOVA

10. Ka choni cho mubaghiye ukubukilila ukumanyila ivya Yehova?

10 Ka mukanda buli-buli ukuba mumanyani wa Yehova? Ukumanyila Ibayibolo kukabavwa ukuti mumumanye akiza u Yehova sona ukuti mukuzye ubumanyani bwinu. Ubumanyani buli ngati umoto gho mungalonda ukuti ghubukiliye ukwaka. Ngati mo umoto ghukulondela inkwi ukuti ghubukilile pakwaka, numwe bulo mubaghiye ukubukilila ukumanyila ivya Yehova ukuti ubumanyani bwinu bughome.​—Isya Mbupingamu 2.1-5.

Ngati umoto, mubukilile ukumanyila ivya Yehova ukuti ulughano lwinu lubukilile

11. Ka vyo Ibayibolo likumanyisya vingabavwa buli-buli?

11 Po mukubukilila ukumanyila Ibayibolo, mukwiza pakumanyila ifundo zyo zikwiza pakubavwa pa bumi bwinu. Ennya mo abamanyili aba Yesu babili bakayivwila po u Yesu akabalongosolelagha amabuchimi agha mu Bayibolo. Bakati: ‘Nkimba chitakayana bulo nu moto uwakwaka mumwitu, bo akunena nuswe muzila mula-mula nukutulingannya Amasimbo?’​—Luka 24.32.

12, 13. (a) Choni cho chingabombiwa nu lughano lwinu kwa Chala? (b) Ka tungabomba ichoni ukuti ulughano lwitu kwa Yehova lubukilile?

12 Ngati mo abamanyili aba Yesu bakakwafyiwa bo bivwisya  amasimbo, numwe bulo vikabakwafya bo mwanda ukwivwisya Ibayibolo. Ivi vikabavwa ukuti mumumanye akiza u Yehova sona nu kwanda ukumughana. Mutakalondaye ukuti ulughano lwinu lukatale.​—Matayi 24.12.

13 Nanti mwaba mumanyani wa Chala, mubikaghepo umoyo ukuti ubumanyani bwinu bughome. Mubaghiye ukubukilila ukumumanya u Chala poka nu Yesu sona nukwinong’onelapo pa vyo mwamanyila namo mungavibombezezya pabumi bwinu. (Yohani 17.3) Nanti mukubelenga pamo ukumanyila Ibayibolo mwilalusyange ukuti: ‘Ka inkani iyi yikumanyisya ichoni ivya Yehova? Ka ningamughana buli-buli u Yehova nu moyo wane ghosi sona nu bumi bwane bosi?’​—1 Timoti 4.15.

14. Ka ulwiputo lungatwavwa buli-buli ukuti ulughano lwitu kwa Yehova lughome?

14 Nanti muli pabumanyani nu muntu yumo sona mukunenezannya nawe papipi-papipi, ivi vikwavwa ukuti ubumanyani bwinu bughome. Umwakuyana bulo, nanti tunenezannya nu Yehova mu lwiputo papipi-papipi, vikutwavwa ukuti  ulughano lwitu lubukilile ukughoma. (Belenga 1 Aba Tesalonika 5.17.) Ulwiputo chabupi icha pamwanya nkani ichakufuma kwa Baba witu kumwanya. Akabalilo kosi tubaghiye ukunenezannya nawe ukufumila pasi pa moyo. (Masalimo 62.8) Pakwiputa tutakanenaye amazyu gho tusungiye bulo, loli tubaghiye ukunena naloli vyo vili mumoyo witu. Ubwanaloli bwakuti nanti tukubukilila ukumanyila Ibayibolo sona ukwiputa ukufumila pasi pa moyo, ulughano lwitu kwa Yehova lukwiza pakughoma.

UKUBABUZYAKO ABAMWITU IVYAKUKWAFYANNYA NU YEHOVA

15, 16. Ka mukuyennya buli–buli imbombo iya kulumbilila?

15 Nanti mukulonda ukubukilila ukuba pabumanyani nu Yehova mubaghiye ukubabuzyako aba mwinyu vyo mukusubila. Ukunenezannya na bamwinyu ivya Yehova chintu chakulondiwa nkani. (Luka 1.74) Iyi mbombo yakulondiwa nkani yo u Yesu akabapa aba Kilisitu aba bwanaloli. Swebosi tubaghiye ukulumbilila amazyu amiza agha Bumwene ubwa Chala. Ka mwanditeko kale ukubomba imbombo iyi?—Matayi 24.14; 28.19, 20.

16 Umutumiwa u Pabuli akennyanga ukuti imbombo iya kulumbilila yakulondiwa nkani. Akayitambula ukuti “ubukabi.” (2 Aba Kolinti 4.7) Ukubabuzyako abamwinyu ivya Yehova nu bwighane bwache yoyo mbombo yakulondiwa nkani yo mubaghiye ukubomba. Iyi zila yoka iyakuti mumubombele u Yehova, sona akwennya ukuti vyo mukubomba vya kulondiwa. (Aba Hebeli 6.10) Imbombo iya kulumbilila yingabavwa umwe sona nabo mukubamanyisya, chifukwa yikubavwa umwe na bamwinyu ukuti mube pabumanyani nu Yehova sona mukwiza pakwagha ubumi ubwa bwila na bwila. (Belenga 1 Aba Kolinti 15.58.) Ka yilipo yimo imbombo yo yingabapangisya ukuba bakuhoboka ukuchila imbombo iyakulumbilila?

17. Choni cho imbombo iyakulumbilila yibaghiye ukubombiwa mwalubilo?

 17 Imbombo iyakulumbilila yibaghiye ukubombiwa mwalubilo. Ibayibolo likutukazya ukuti “ulumbililaye amazyu” sona “ubasoke nukubachemela.” (2 Timoti 4.2) Chakulondiwa ukuti abantu bivwe ivya Bumwene ubwa Chala. Ibayibolo likunena ukuti: “Isiku ilikulu ilya Yehova lili papipi. Lili papipi sona likwiza mwalubilo.” Ubumalilo “butakuchedwa.” (Zefaniya 1.14; Habakuku 2.3) Ubwanaloli bwakuti, lunulu, u Yehova akwiza pakuchinangannya ichisu icha Satana ichi. Po ivi vichili vitabombiwe, chakulondiwa ukuti abantu basokiwe, ukuti basale bene ukumubombela u Yehova.

18. Choni cho tubaghiye ukumwiputa u Yehova poka na Bakilisitu abamwitu ababwanaloli?

18 U Yehova akulonda ukuti tumwiputaye poka na Bakilisitu abamwitu ababwanaloli. Ibayibolo likunena ukuti: ‘Zagha twinong’onelanaye namumo tungakazanizannya, pakughanana sona pakubombelana ubwiza. Tutakanyokaye-nyokaye ku nkomano zyitu ukuyana namumo abantu bamo bakizubilila, loli uswe tukazannyanje, nkani-nkani bo tukwennya ukuti isiku ilyakwiza ukwa Mwene lili papipi.’ (Aba Hebeli 10.24, 25) Tubaghiye ukubomba chilichosi cho tungakwanisya ukuti twayiwangepo pa nkomano zyosi. Inkomano zikutupa ulusako ulwakuti tukazannyanje na bamwitu.

19. Choni cho chingatwavwa ukubaghana aba Kilisitu abamwitu abakamu na bayemba?

19 Nanti mukwayiwapo pa nkomano, mukwiza pakwagha abamanyani abiza bo bakwiza pakubavwa ukuti mubukilile pa kumwiputa u Yehova. Mukwiza pakwagha abakamu na bayemba bo bakughanite nkani sona bakumwiputa u Yehova. Bope bakwananga sona bakupuvya ngati mo numwe mubeleye. Waghe babanangila mube mwe bakwisengannya ukubahobokela. (Belenga Aba Kolosi 3.13.) Akabalilo kosi mwennyanje ivyiza vyo aba Kilisitu abamwinyu, abakamu na bayemba bakubomba. Nanti mukubomba bunubu vikwiza pakubavwa ukuti  mubaghane sona ukuti mubukilile ukuba pabumanyani nu Yehova.

UBUMI UBWENECHO

20, 21. Ka “ubumi ubwenecho” cho choni?

20 U Yehova akulonda abamanyani bache bosi babanje nu bumi ubwiza. Ibayibolo likutumanyisya ukuti ubumi bo tukwiza ukuba nabo muntazi, bukwiza pakuba ubwakupambana nkani nabo tuli nabo amasiku ghano.

U Yehova akulonda ukuti muhobokaye “nu bumi ubwenenecho.” Ka mungahoboka?

21 Muntazi tutakwiza pakwikala imyaka 70 pamo 80 loli tukwiza pakwikala bwila na bwila. Tukwiza pakuhoboka nu “bumi ubwa bwila na bwila,” abasita imbibi, aba mutende sona nu kuhoboka mu paladayiso uwakuyemba. Cho chifukwa Ibayibolo likubwitizya ukuti “ubumi ubwenecho.” U Yehova atulayizizye ukutupa ubumi ubwenecho, loli tubaghiye ukubombapo zimo ukuti “tubulemasye” ubumi ubwenecho.​—1 Timoti 6.12, 19, NWT.

22. (a) Ka “tungalemasya buli-buli ubumi ubwenecho”? (b) Choni cho chingatwavwa ukuti twize tubwaghe ubumi ubwa bwila na bwila?

22 Ka “tungabulemasya buli-buli ubumi ubwenecho”? Tubaghiye “ukubomba imbombo inyiza” sona “nukuba bakabi mumbombo inyiza.” (1 Timoti 6.18) Ichi chikung’anamula ukuti tubaghiye ukuvibombezya vyo twamanyila mu Bayibolo. Ubumi ubwa bwila na bwila tutangabwagha waghe tukusubalila amaka ghitu. Ubumi ubwa bwila na bwila chabupi ichakufuma kwa Yehova cho abasenganizizye ababombi bache abasubaliwa, cho chikwiza chifukwa icha “chisa ichikulu nkani.” (Aba Loma 5.15) Ubaba witu uwa kumwanya akulonda hee ukubapa ababombi bache abasubaliwa ichabupi ichi.

23. Choni cho mubaghiye ukusala akiza akabalilo kano?

23 Mwilalusye ukuti, ‘Ka nkumwiputa u Chala muzila yo akulonda?’ Nanti mwamanya ukuti pali ivintu vimo vyo mukulonda ukusinta, mutakakabe ukusinta. Nanti tukumusubalila u Yehova sona nukumwivwila, u Yehova akwiza pakuba mupoki witu. Akwiza pakubafighilila ababombi bache  abasubaliwa mumasiku aghabumalilo agha chisu icha Satana ichi. Po u Yehova akwiza pakwenelezya ukuti twikala bwila na bwila mu Paladayiso, ngati mo akalondelagha pa bwandilo. Waghe mungasala akiza pakabalilo kano, mukwiza pakwagha ubumi ubwenecho.