Skip to content

Skip to table of contents

 MUTU 9

Ka Ubumalilo Ubwa Chisu Buli Papipi?

Ka Ubumalilo Ubwa Chisu Buli Papipi?

1. Ka tungamanyila kwiyi ivyakukwafyannya na muntazi?

KA MWENIZYEPO lumo inkani pa TV nu kwilalusya ukuti, ‘Ka ichisu chikuya kwiyi nkani-nkani?’ Pakubombiwa ivintu ivya chitima sona ni vyankaza vyo vikupangisya ukuti abantu bamo basubilaye ukuti ichisu chili kubumalilo. Ka ivi vyabwanaloli? Ka pali izila yimo yo tungamanyila vyo inti vibombiwe muntazi? Eee yilipo. Abantu batangamanya vyo inti vibombiwe muntazi, loli u Yehova u Chala akumanya. U Yehova akutubuzya ukwendela mu Bayibolo ivyakukwafyannya na muntazi mwitu sona namo ichisu chikwiza pakubela.​—Yesaya 46.10; Yakobo 4.14.

2, 3. Nkimba abamanyili aba Yesu bakalondagha ukumanya ichoni? Ka u Yesu akabamula ukuti ichoni?

2 Nanti tukubelenga mu Bayibolo ivyakukwafyannya nu bumalilo ubwa chisu, chitakung’anamula ukumala ukwa Chisu ichapasi awe, loli kukung’anamula ukumala ukwa abantu ababibi. U Yesu akamanyisyanga abantu ukuti Ubumwene ubwa Chala bukwiza ukulaghila ichisu ichapasi. (Luka 4.43) Abamanyili aba Yesu bakalondagha ukumanya akabalilo ko Ubumwene ubwa Chala bukwiza ukukwizila, po bakamulalusya u Yesu ukuti: “Nkimba ivintu vyosi ivi vikwiza pakuboneka liyi? Nkimba choni chicho chikwiza pakuboneka ukulanjizya ukuti aka ko kabalilo kakwizila kwako nu bumalilo ubwa chisu ichapasi?” (Matayi 24.3) U Yesu atakababuzya isiku ilyenecho, loli akababuzya ivintu vyo vikwiza pakuboneka ukulangizya ukuti ubumalilo ubwa chisu buli papipi. Vyo vikubombiwa akabalilo aka vyovyo u Yesu akanena.

3 Mu mutu ughu inti tunenezyannye ubukaboni ubwa kulangizya ukuti tuli mumasiku aghabumalilo. Ichabwandilo  inti tumanyile ivyakukwafyannya ni nkondo yo yikabako kumwanya ukuti twivwisye akiza ichifukwa cho pachisu pakubombiwa ivintu ivibibi.

KUKABA INKONDO KUMWANYA

4, 5. (a) Choni cho chikabombiwa kumwanya bo u Yesu aba we Mwene? (b) Ukuyana nu Ubuvumbuli 12.12, choni cho chikabombiwa bo u Satana bamusumbila pachisu ichapasi?

4 Mu Mutu 8 tukamanyila ukuti u Yesu akaba we Mwene kumwanya mu 1914. (Danieli 7.13, 14) Ibuku ilya Ubuvumbuli likutubuzya vyo vikabombiwa likuti: ‘Po inkondo yikanda kumwanya, u Mikayeli [ukung’anamula u Yesu] na bantumi bache pakulwana ni njoka [u Satana]. Yope injoka yila na bantumi bache pakulwana nu Mikayeli.’ * U Satana na bantumi bache bakaluza inkondo po bakabasumbila pachisu ichapasi. Inong’onela bulo mo abantumi kumwanya bakahobokela. Ngapo abantu pachisu ichapasi vikaba buli-buli? Ibayibolo likunena ukuti kakaba kabalilo ka ntamyo ku bantu. Chifukwa choni? Chifukwa u Satana izuye nu bukali nkani, “ichifukwa azimenye ukuti asyala na kabalilo akanandi bulo.”​—Ubuvumbuli 12.7, 9, 12.

5 Umubibi akupangisya intamyo pachisu chosi ichapasi. Akalalite nkani ichifukwa chakuti akumanya ukuti asyala nakabalilo akanandi bulo ukuti u Chala amwefyepo. Zatwennye vyo u Yesu akanena ukuti vikwiza pakubombiwa mumasiku aghabumalilo.​—Ennya Ivya Kubumalilo 23.

AMASIKU AGHABUMALILO

6, 7. Ka tunganenapo ichoni ivyakukwafyannya ni nkondo sona ni zala?

6 Inkondo. U Yesu akati: “Ichisu chikwiza pakulwana ni chinji, ubumwene bukwiza pakulwana nu bunji.” (Matayi 24.7) Pakabalilo aka abantu abinji bakufwa pa nkondo ukuchila kwisinda kosi. Ilipoti ilyakufuma ku Worldwatch  likalangizya ukuti abantu abakupululila 100 miliyoni bafwa ukufuma mu 1914. Abantu abinji bafwa chifukwa cha nkondo pa myaka 100 ukufuma 1900 mupaka icha muma 2000 ukuchila abantu bo bakafwa imyaka 1,900 kwisinda. Inong’onela bulo ivitima nu bubavu vyo abantu amamiliyoni aghinji bakomana navyo ichifukwa icha nkondo.

7 Izala. U Yesu akati: “Kukwiza pakuba izala.” (Matayi 24.7) Pakabalilo aka nangabuli ichakulya chikwayiwako ukuchila kwisinda, loli abantu abinji bate ni chakulya ichakukwanila. Choni cho vili bunubu? Ichifukwa chakuti bate ni ndalama izya kukwanila izyakuti bangaghulila ichakulya sona bamo bate namalo aghakukwana aghakulima. Abantu abakupululila 1 biliyoni bakwagha indalama iyinandi bulo iyakughulila ichakulya ichisiku lyoka. Ibungwe limo likati abana amamiliyoni aghinji bakufwa umwaka ghulighosi ichifukwi chakuti bate ni chakulya ichakukwanira.​—World Health Organization.

8, 9. Choni cho chikulangizya ukuti vyo u Yesu akanenala zila ivyakukwafyannya nu tusenyenta sona ni mbina vikukwanilisiwa?

8 Utusenyenta. U Yesu akanenela zila ukuti: “Kukwiza pakuba utusenyenta  utwakoghofya.” (Luka 21.11) Umwaka ghulighosi kukubombiwa utusenyenta utwakoghofya. Ukwanda bulo muma 1900, abantu abakupululila 2 miliyoni bafwa chifukwa icha tusenyenta. Nangabuli itekinologe yikwavya abantu ukuti bamanyaghe zila ko inti kubombiwe utusenyenta, loli pope bulo abantu bakufwa.

9 Imbina. U Yesu akanenala zila ukuti kukwiza pakuba “ububine posi na posi.” Amatenda aghakoghofya ghakwiza pakwambukila umwalubilo nu kughogha abantu abinji. (Luka 21.11) Napo aba dokotala bamanyiye mo bangapozezya amatenda aghakupambana-pambana, loli pachili pali amatenda gho bakupotwa ukupozya. Ilipoti limo likalongosola ukuti umwaka ghulighosi abantu amamiliyoni aghinji bakufwa na matenda ngati ichikoso icha TB, umaleliya sona nukolela. Abadokotala baghagha sona amatenda aghamwabo aghakukwana 30, ghamo ghate ni milembo.

INKALO ZYO ABANTU BALI NAZYO MUMASIKU AGHABUMALILO

10. Ka amazyu gho ghali pa 2 Timoti 3.1-5 ghakukwanilisiwa buli-buli amasiku ghano?

10 Pa 2 Timoti 3.1-5, pakunena  ukuti: “Mumasiku aghabumalilo kukwiza pakuba utubalilo utupala-pala nkani.” Umutumiwa u Pabuli akanena inkalo zyo abantu bakwiza pakuba nazyo mumasiku aghabumalilo. Akanena mo abantu bakwiza pakubela

  • bakwiza pakuba bakwighana bene

  • abaghana ndalama

  • abasita ukwivwila abapapi babo

  • batakwiza pakuba basubaliwa

  • basita ulughano mu mbumba yawo

  • abasita ukwikola

  • abavyongo na bakoghofya

  • abakughana ivyakwihobosya, mubuyo ubwa kumughana u Chala

  • bakuboneka ngati po bakumwiputa u Chala, loli bakughakana amaka ghache

11. Ukuyana ni simbo ilya Masalimo 92.7, choni cho chikwiza pakubombiwa ku bantu ababibi?

11 Nkimba ko mukwikala abantu bali ni nkalo zinizi? Pachisu chosi ichapasi abantu abinji bali ni nkalo izyangati zinizi. Loli lunulu u Chala akwiza pakubombapo zimo. Akulayizya ukuti: “Nanti ababibi bakumela ngati lisote sona ababomba mbibi  bope bakulemba ngati maluba. Bakwiza pakubapyelapo ukwa bwila na bwila.”​—Masalimo 92.7.

AMAZYU AMIZA MUMASIKU AGHABUMALILO

12, 13. Nkimba u Yehova atumanyisya ichoni mumasiku aghabumalilo agha?

12 Ibayibolo likanenela zila ukuti mumasiku aghabumalilo ichisu chikwiza ukwizula nu bubavu sona nu kutamiwa. Loli Ibayibolo likunena sona ivintu ivyiza vyo vikwiza pakubombiwa.

“Amazyu amiza agha Bumwene ghakwiza pakulumbililiwa pachisu chosi ichapasi.”​—Matayi 24.14

13 Ukulivwisya akiza Ibayibolo. Inchimi u Daniyeli akasimba ivintu ivyakukwafyannya na masiku aghabumalilo. Akanena ukuti: “Amahala agha bwanaloli ghakwiza pakumanyikwa paliposi.” (Danieli 12.4) Pakabalilo aka u Chala abapa abantu ulusako ulwa kwivwisya akiza Ibayibolo ukuchila kwisinda kosi. U Yehova abomba vinivi ukwanda mu 1914. Umwakufwanikizya, u Yehova atumanyisya ukulondiwa ukwa izina lyache sona nu bwighane bwache kuchisu ichapasi, ubwanaloli pa nkani iya kusatuliwa, cho chikubombiwa nanti umuntu afwa sona na pa nkani iyakuti abafwe bakwiza pakuzyusyiwa. Twamanyila ukuti Ubumwene ubwa Chala bobo bungamazya intamyo zyitu. Twamanyila sona vyo tungabomba ukuti tube bakuhoboka sona namo tungalangizizya ukuti tukumuhobosya u Chala. Nkimba ababombi aba Chala bakubomba buli-buli navyo bamanyila? Ubuchimi bumo bukwamula.​—Ennya Ivya Kubumalilo 20 nu 24.

14. Ka imbombo iyakulumbilila amazyu amiza agha Bumwene yikubombiwa kwiyi? Sona bo bawenu bo bakuyibomba imbombo iyi?

14 Imbombo iyakulumbilila pachisu chosi. Pakunena izya masiku aghabumalilo u Yesu akanena ukuti: “Po Amazyu Amiza agha Bumwene ghakwiza pakulumbililiwa pachisu chosi ichapasi.” (Matayi 24.3, 14) Amazyu Amiza agha Bumwene ghakulumbililiwa muvyisu ivyakupululila 230 sona muvinenelo ivyakupululila 700. Abakaboni ba Yehova “aba muchisu chosi na maluko ghosi” bakwavwa abantu  ukubumanya akiza Ubumwene ubwa Chala sona navyo bukwiza pakubabombela abantu. (Ubuvumbuli 7.9) Loli bakubomba imbombo iyi ukusita ukulipiliwa. Napo babengiwe sona bakughoghiwa, loli pate nachimo cho chingalesya imbombo iyakulumbilila, vili bunubu ngati mo u Yesu akanenela.​—Luka 21.17.

KA INTI MUBOMBE ICHONI?

15. (a) Nkimba mukusubila ukuti tukwikala mumasiku aghabumalilo? Chifukwa buli? (b) Ka choni cho chikwiza pakubombiwa ku bantu bo bakumwivwila u Yehova na bo batakumwivwila?

15 Nkimba mukusubila ukuti tukwikala mumasiku aghabumalilo? Amabuchimi aghinji mu Bayibolo aghakunena izya masiku aghabumalilo ghakukwanilisiwa. Lunulu u Yehova inti alesye imbombo iyakulumbilila amazyu amiza po “ubumalilo” bukwiza pakwiza. (Matayi 24.14) Nkimba ubumalilo cho choni? Ubumalilo, kabalilo ko u Yehova akwiza pakufumyapo ivibibi vyosi pa nkondo iya Alamagedoni. U Yehova akwiza pakubombezya u Yesu na bantumi bache aba maka pakubapyuta bosi bo bakukana ukumwivwira u Yehova poka nu Mwana wache. (2 Aba Tesalonika 1.6-9) Ukufuma apo, u Satana poka ni mizimu imibibi batakwiza pakubazimbula sona abantu. Sona abantu bosi bo bakulonda ukumwivwira u Chala nukuba kuchigaba icha Bumwene bwache bakwiza ukwennya ukuti ivintu vyosi vyo u Chala alayizizye vikukwanilisiwa.​—Ubuvumbuli 20.1-3; 21.3-5.

16. Pakuti ubumalilo buli papipi, nkimba tubaghiye ukubomba ichoni?

16 Ichisu chosi chikulaghiliwa nu Satana, chili papipi pakumala. Chakulondiwa nkani ukwilalusya ukuti, ‘Nkimba ningabomba ichoni?’ U Yehova akulonda ukuti mubombe chosi cho mungakwanisya pakumanyila Ibayibolo. Tubaghiye ukubikapo umoyo pakumanyila Ibayibolo. (Yohani 17.3) Usabata aliwesi Abakaboni ba Yehova bakuba ni nkomano zyo zikubavwa abantu ukulivwisya akiza Ibayibolo. Mungayezya ukwayiwapo pa nkomano izi akabalilo kosi.  (Belenga Aba Hebeli 10.24, 25.) Nanti mwamanyila ukuti mubaghiye ukusinta, mutakakabe ukusinta. Nanti mwabomba bunubu ubumannyani bwinu nu Yehova bukwiza pakughoma.​—Yakobo 4.8.

17. Choni cho abantu abinji bakwiza pakuswigha nanti ubumalilo bukwiza?

17 Umutumiwa u Pabuli akalongosola ukuti ubumalilo ubwa vintu ivibibi bukwiza ukwiza umwakuchenusya, “ukuyana na mumo umwiba akwizila pabusiku,” pakabalilo ko abantu abinji batakwinong’onelako. (1 Aba Tesalonika 5.2) U Yesu akanenela zila ukuti abantu abanji bakwiza pakukana ichimanyisyilo ichakuti tukwikala mumasiku aghabumalilo. U Yesu akati: ‘Ukwiza ukwa Mwana uwa muntu kukwiza pakuyana bulo na mumo vikabela pakabalilo aka Nowa. Mumasiku ghala-ghala bo amizi ghatizuye, abantu bakalyanga nu kung’wela, bakasendanagha mupaka pisiku lilyo u Nowa akinjila mungalaba. Loli batakamanyagha chicho chikabombiwanga mupaka amizi ghakiza nukupyela bosi. Momo kukwiza pakubela bo u Mwana uwa muntu akwiza.’​—Matayi 24.37-39.

18. Nkimba u Yesu akatusoka ichoni?

18 U Yesu akatusoka ukuti tuchebaye ukuti amoyo ghitu “ghatakikolezyannyanje nu kulya, nu kukolwa, sona nu kupasya nizya bumi ubu.” Akanena ukuti ubumalilo bukwiza pakwiza umwakuchenusya “ngati cho chipingo.” Akanena sona ukuti bukwiza “pakubawila abantu bosi babo bakwikala muchisu ichapasi.” Akonjelezya sona ukuti: “Mubanje maso nukwiputa akabalilo kosi ukuti mubanje na maka aghakwipokela mwebene muvintu vyosi vivyo vikwiza pakuboneka, sona nukuti mungimilila pamaso pa Mwana uwa Muntu.” (Luka 21.34-36) Choni cho chakulondiwa ukwivwila vyo u Yesu akatusoka? Chifukwa lunulu ichisu ichibibi icha Satana chikwiza pa kupyutiwa. Abantu bo bakumwivwila u Yehova nu Yesu bobo bakwiza pakupona sona nu kwikala bwila na bwila mu chisu ichipya.​—Yohani 3.16; 2 Pitala 3.13.

^ indime 4 Mikayeli lizina ilyamwabo ilya Yesu Kilisitu. Ukuti mumanye ivinji, ennya Ivya Kubumalilo 22.