Skip to content

Skip to table of contents

 MUTU 18

Ka Tukubatula Buli-buli Abakamu Bitu Bo Bali Muntamyo?

Ka Tukubatula Buli-buli Abakamu Bitu Bo Bali Muntamyo?

Dominican Republic

Japan

Haiti

Abakaboni ba Yehova bakwavwa abamwabo umwalubilo nanti bakomana ni ntamyo. Ivi vikulangizya ukuti tuli nulughano ulwenecho ku bakamu bitu. (Yohani 13.34, 35; 1 Yohani 3.17, 18) Tukubavwa muzila buli?

Tukutuma indalama. Akabalilo ko izala yikawa ku Yudeya, Abakilisitu aba ku Antiyokiya bakabatumila ubutuli ubwa ndalama Abakilisitu abamwabo. (Imbombo 11.27-30) Umwakuyana bulo, nanti twivwa ukuti Abakilisitu abamwitu bakomana ni ntamyo tukubatumila ubutuli ukwendela mu chipanga.—2 Aba Kolinti 8.13-15.

Tukubomba chilichosi cho chingabavwa. Abasongo bo bali ko kwabombiwa umukosi bakwenelezya ukuti aliwesi alipo sona ali akiza. Pakuba ikomiti yo yikwenelezya vyosi. Yikugaba ichakulya, amizi aghakung’wa, imyenda, amalo aghakughona sona nu butuli ubwa milembo. Abakaboni bo bamenye imbombo bakwendela indalama zyabo ukuya pakwavwa abamwabo. Bamo bakwavwa pakuyannya inyumba izyabamwabo ni zya Bumwene zyo zyakomanika. Swe ligulu ilyakukolelana sona tukubombela imbombo poka, cho chifukwa nanti kwabombiwa umukosi, tutakukaba ukubwagha ubutuli na bantu bo bangavwapo. Ichabwandilo, tukwavwa “abitiki” abamwitu, loli tukwavwa sona na bavipanga ivyamwabo.—Aba Galatiya 6.10.

Tukubasangalusya na Mazyu agha Chala. Abantu bo bakomana nu mukosi, cho bakulondiwa nkani, kusangalusyiwa. Pakabalilo ngati aka, umuntu akulondiwa ukwagha amaka kwa Yehova, yo ‘mwenecho uwa busangulusu bosi.’ (2 Aba Kolinti 1.3, 4) Tukuhoboka ukubabuzyako bo bali muntamyo vyo Ibayibolo lilayizizye. Ibayibolo likuti Ubumwene ubwa Chala bukwiza ukupyelapo intamyo zyosi zyo zikupangisya ububavu nu kutamiwa.—Ubuvumbuli 21.4.

  • Choni cho tutakukaba ukubwagha ubutuli sona na bantu bo bangavwapo nanti kwabombiwa umukosi?

  • Nkimba tungabasangalusya ni fundo buli izya mu Bayibolo?