Skip to content

Skip to table of contents

 MUTU 12

Ka Mungapalamila Buli-Buli kwa Chala?

Ka Mungapalamila Buli-Buli kwa Chala?

1. Ka u Chala akwivwa inyiputo zyosi?

U Chala akulonda abantu bosi bapalamilaye kukwache ukwizila mu lwiputo. (1 Yohani 5.14) Loli atakwivwa inyiputo zyosi. Inyiputo zimo zyo atakwivwa zya bantu bo bakubayivya abachi babo. (1 Pitala 3.7) Po Aba Izilayeli bakabombagha ivintu ivibibi, u Chala akakana ukwivwa inyiputo zyabo. Ichi chikulangizya ukuti lusako pakwiputa kwa Yehova. Loli, u Chala akwivwa inyiputo izya bantu bo balapa imbibi zyabo.—Belenga Yesaya 1.15; Imbombo 3.19.

2. Ka tungiputa buli-buli?

Ulwiputo chigaba ichakumwiputa u Chala, polelo tubaghiye ukumwiputa u Yehova weka, yo Mupeli witu. (Matayi 4.10; 6.9) Sona pakuti te swe bakufikapo, twiputaye ukwendela mwa Yesu chifukwa akafwila imbibi zyitu. (Yohani 14.6) U Yehova atakulonda inyiputo izyakusungila bulo pamo izyakulemba. Loli akulonda twiputaye ukufumila pasi pamoyo witu.—Belenga Matayi 6.7; Aba Filipi 4.6, 7.

Umupeli witu akwivwa inyiputo na zyo tungiputa umwachimyamya. (1 Samueli 1.12, 13) Akulonda twiputaye pakabalilo kalikosi, pangaba pandabindabi, pachamabwila, pachakulya, sona na pala twakumana ni ntamyo.—Belenga Salimo 55.22; Matayi 15.36.

3. Choni cho Abakilisitu bakukomana poka?

Te chipepe ukupalamila kwa Chala chifukwa tukwikala na bantu bo bate nu lusubilo mwa Chala, sona bakususya vyo u Chala atulayizizye ukuti tukwiza pakwikala mu mutende pa chisu. (2 Timoti 3.1, 4; 2 Pitala 3.3, 13) Polelo, tubaghiye tukazannyanje na Bakilisitu abamwitu.—Belenga Aba Hebeli 10.24, 25.

 Nanti tukukolelana na bantu bo bamughanite u Chala, vikutwavwa ukuti tupalamile kwa Chala. Inkomano izya Bakaboni ba Yehova zikutupa ulusako ulwati tukazannyanje mu lwitiko.—Belenga Aba Loma 1.11, 12.

4. Ka mungapalamila buli-buli kwa Chala?

Mungapalamila kwa Yehova nanti mukwinong’onelapo pa vyo mukumanyila mu Mazyu ghache. Munginong’onelapo imbombo zyache, ubulongozyi bwache, sona na vyo atulayizizye. Nanti tukumwiputa u Chala nu kwinong’onelapo, vingatwavwa ukuti tumanye ulughano lwache sona na mahala ghache.—Belenga 1 Timoti 4.15, 16.

Mungapalamila kwa Chala peka nanti mukumusubila—pala muli nu lwitiko mumwache. Ulwitiko luli ngati chintu chabumi cho chikulondiwa ukuchilyesya. Mungalulyesya ulwitiko lwinyu pala mukwinong’onela ichifukwa cho mukusubila vyo mukumanyila.—Belenga Matayi 4.4; Aba Hebeli 11.1, 6.

5. Ukupalamila kwa Chala kungabavwa buli-buli?

U Yehova akubapasikizya bo bamughanite. Angabafighilila ku chilichosi cho chingavulungannya ulwitiko lwabo sona nu lusako ulwakuti bize bikale bwila na bwila. (Salimo 91.1, 2, 7-10) Akutuchenjezya ku vintu vyo vingananga ubumi bwitu sona ukuti tutakabe bakuhoboka. U Yehova akutumanyisya mo tungikalila akiza.—Belenga Yakobo 1.25; 4.4, 8.