Skip to content

Skip to table of contents

 MUTU 11

Ka Ifundo Izya mu Bayibolo Zikutwavwa Buli-buli?

Ka Ifundo Izya mu Bayibolo Zikutwavwa Buli-buli?

1. Choni cho tukulondiwa ubulongozi?

Ifundo izya mu Bayibolo zingatufighilila buli-buli ku ngozi?—SALIMO 36.9.

Umupeli witu wamahala nkani ukuchila uswe. Pakuba we Baba uwalughano, akutupasikizya. Atakatupela ukuti twendelaye bulo inyinong’ono zyitu. (Yeremiya 10.23) Ngati we mwana umunandi yo akulondiwa ubulongozi ukufuma ku bapapi, nuswe bulo tukulondiwa ubulongozi ukufuma kwa Chala. (Yesaya 48.17, 18) Ifundo zyo zili mu Baibolo zili ngati chabupi ichakufuma kwa Chala.—Belenga 2 Timoti 3.16.

Indaghilo ni fundo izya Yehova zikutumanyisya mo tungikalila akiza sona namo tungize twaghile ubumi ubwa bwila na bwila muntazi. Pakuti u Chala we yuyo akatupela, we yo abaghiye ukutupa ubulongozi.—Belenga Salimo 19.7, 11; Ubuvumbuli 4.11.

2. Nkimba ifundo izya mu Bayibolo cho choni?

Ifundo izya mu Bayibolo bo bwanaloli bo bukutulongozya pa vintu ivinji. Loli indaghilo zikutulongozya pa chintu choka. (Imbombo 15.29) Tubaghiye ukwinong’onelapo ukuti tumanye mo ifundo izya mu Bayibolo zingatwavwizya. (Isya Mbupingamu 2.10-12) Ibayibolo likutumanyisya ukuti ubumi chabupi ichakufuma kwa Chala. Ifundo iyi yingatulongozya po tuli kumbombo, panyumba, sona napo tukwenda. Yikutwavwa ukuti manyi tubombaye vyo vingabika ubumi bwitu nu ubwabamwitu pangozi.—Belenga Imbombo 17.28.

3. Ka fundo buli zibili izyakulondiwa nkani?

U Yesu akanena ifundo zibili izyakulondiwa nkani. Iyabwandilo yikuvumbula ichifukwa cho u Chala akapelela abantu. Akabapela ukuti bamumanye u Chala, bamughane, sona bamubombelaghe akabalilo kosi. Ifundo iyi  tubaghiye tuyikonkaye pa vyosi vyo tukulonda ukubomba. (Isya Mbupingamu 3.6) Bo bakukonka ifundo iyi nu moyo wosi bakuba bamanyani aba Chala, bakuba bakuhoboka nkani, sona bakwiza pakwikala bwila na bwila.—Belenga Matayi 22.36-38.

Ifundo iyabubili yikutulongozya ukuti tubanje pamutende na bamwitu. (1 Aba Kolinti 13.4-7) Tungakonka akiza ifundo iyi nanti tukwennya mo u Chala akubombela na bantu.—Belenga Matayi 7.12; 22.39, 40.

4. Ka ifundo izya mu Bayibolo zikutwavwa buli-buli?

Ifundo izya mu Bayibolo zikumanyisya abantu mo bangabela bakukolelana mumbumba zyabo. (Aba Kolosi 3.12-14) Mu Mazyu agha Chala muli ifundo iyamwabo yo yikufighilila imbumba. Yikuti isendwa yitakamalaye.—Belenga Maliko 10.7-9.

Pala tukukonka ifundo izya mu Baibolo, tukwifighilila ku bupina sona tukuba pamutende. Bo bakulemba abantu imbombo bakulonda umuntu umusubaliwa sona yo akulimbikila imbombo. Ifundo izi zyozyo Ibayibolo likumanyisya. (Isya Mbupingamu 10.4, 26; Aba Hebeli 13.18) Amazyu agha Chala ghakutumanyisya ifundo iyamwabo. Ifundo iyi yakuti twikutisiwanje na vyo tuli navyo sona nu kuba pabukamu nu Chala ukuchila chilichosi.—Belenga Matayi 6.24, 25, 33; 1 Timoti 6.8-10.

Ifundo izya mu Bayibolo zingatwavwa ukuti tube nu bumi ubwiza. (Isya Mbupingamu 14.30; 22.24, 25) Zingatwavwa buli-buli? Nanti tukukonka ilamulo ilya Chala ilyakuti manyi tukolwanje, tukupona ku mbina na ku ngozi. (Isya Mbupingamu 23.20) U Yehova akutwitikizya ukung’wa panandi. (Salimo 104.15; 1 Aba Kolinti 6.10) Ifundo izya Chala zikutufighilila mu vyakubombiwa sona nukuti twinong’onaye akiza. (Salimo 119.97-100) Abakilisitu ababwanaloli batazighanite bulo ifundo izya Chala chifukwa chakuti zikubavwa, loli bakulonda ukumuchindika u Yehova.—Belenga Matayi 5.14-16.