Skip to content

Skip to table of contents

 MUTU 15

Choni cho Mubaghiye Ukubukilila Pakumanyila?

Choni cho Mubaghiye Ukubukilila Pakumanyila?

1. Ka ukubukilila pakumanyila Ibayibolo kungabavwa buli-buli?

Tukumanya ukuti vyo mwamanyila mu Bayibolo vyaghomya ulughano lwinyu mwa Yehova. Tubaghiye ukubukilila pakumanyila ukuti ulughano lwitu lughome nkani. (1 Pitala 2.2) Ukuti mwize mwikale bwila na bwila, mubaghiye ukubukilila ukumanyila Amazyu agha Chala nu kupalamila kukwache.—Belenga Yohani 17.3; Yuda 21.

Po mukubukilila pakumumanya u Chala, ulwitiko lwinyu lukukula nkani. Ulwitiko lukwiza ukubavwa ukuti mumuhobosye u Chala. (Aba Hebeli 11.1, 6) Sona lukwiza pakubavwa ukuti mupinduke nu kusinta inkalo.—Belenga Imbombo 3.19.

2. Pakuti mwamanya ivya Chala, ka mungabavwa buli-buli abamwinyu?

Mungaba pabukamu ubukulu nkani nu Yehova

Numwe bulo mungababuzyako abamwinyu vyo mwamanyila. Twe bosi tukuhoboka ukubuzya abamwitu amazyu amiza. Po mukubukilila pakumanyila Ibayibolo, inti mumanye mo mungalibombezezya pakulongosola ulusubilo lwinyu mwa Yehova na mazyu amiza.—Belenga Aba Loma 10.13-15.

Abantu abinji bakwanda pakubuzya abamanyani na bakamu babo amazyu amiza. Loli mube bamahala. Mumalo mwakubabuzya ukuti vyo bakusubila vyabumyasi, mubaghiye ukubabuzya vyo u Chala alayizizye. Sona mubaghiye ukukumbuka ukuti cho chikuhobosya abantu, nkalo inyiza ukuchila na vyo munganena.—Belenga 2 Timoti 2.24, 25.

3. Nkimba mungaba pabukamu buli nu Chala?

Ukumanyila Amazyu agha Chala kungabavwa ukuti ubukamu bwinu nu Chala bughome. Pisinda pache, mungasala ukuba pabukamu ubukulu nkani nu Yehova. Sona mungaba mwana uwa mumbumba yache.—Belenga 2 Aba Kolinti 6.18.

 4. Ka mungamanya buli-buli ivyinji?

Tungamanyila mo tungabombezezya ifundo izya mu Bayibolo nanti tukubukilila ukumanyila Amazyu agha Chala. (Aba Hebeli 5.13, 14) Mungalaba u Kaboni wa Yehova ukuti mumanyilaghe Ibayibolo pakubombezya ibuku lyakuti Nkimba Ibayibolo Likutumanyisya Choni? Pala mukulimbikila ukumanyila Amazyu agha Chala, inti mwennye mo ivintu vikwendela akiza pabumi bwinyu.—Belenga 1 Timoti 4.15, 16; Aba Loma 12.2.

Mu Bayibolo muli “amazyu amiza aghakunena nizya buchindamu ubwa Chala uwakuhoboka.” (1 Timoti 1.11, nwt) Mungapalamila kwa Chala pala mukuba papipi na bantu bache. (Aba Hebeli 10.24, 25) Pala mukulimbikila ukumuhobosya u Yehova, mungize mwaghe ubumi ubwenecho, bo bumi bwa bwila na bwila. Nachimo-chimo cho chingatuhobosya ukuchila ukupalamila kwa Chala.—Belenga 1 Timoti 6.19.