Ыйык Китепте эмне деп айтылат?

Кудай кандайдыр бир оору менен күрөшүп жүргөн кызматчыларына жардам берет. Анткени Кудайга кызмат кылган бир киши тууралуу Ыйык Китепте: «Ал ооруп, төшөктө жатканда, Жахаба колдойт; ооруп жатканында, сен ага кам көрөсүң»,— деп айтылган (Забур 41:3). Эгер кайсы бир оорунун айынан кыйналып жүргөн болсоңуз, төмөндөгү үч кеңеш сизге пайдалуу болот:

  1. Күч сурап тилениңиз. Эгер Кудайга кайрылсаңыз, ал сизге «ар кандай ой-түшүнүктөрдөн жогору турган тынчтыгын» берет. Жүрөгүңүзгө орногон андай «тынчтык» ооруңуз менен күрөшкөнгө жардам бергенден тышкары, сары санаа боло берүүдөн да сактайт (Филипиликтер 4:6, 7).

  2. Оң маанайда болуңуз. Ыйык Китепте: «Шайыр жүрөк — дарыдай даба, ал эми жараланган рух сөөктү кургатат»,— деп жазылган (Накыл сөздөр 17:22). Чынында эле, тамашакөй болгонуңуз оор учурларда көңүлүңүздү көтөргөндөн сырткары, ден соолугуңузга да пайдалуу.

  3. Кудайдын убадасына үмүт артыңыз. Жакшылыкка болгон үмүт ооруңузга карабастан кубанычыңызды жоготпогонго жардам берет (Римдиктер 12:12). Ыйык Китепте жер тургундарынын бири да «ооруп жатам» дебей турган убак келери жазылган (Ышая 33:24). Кудай жакында адамзатты бүгүнкү күндө медицинанын күчү жетпеген өнөкөт оорулардын баарынан арылтат. Мисалы, Ыйык Китепте карылардын кайрадан кырчындай жаш кезегине кайтып келип, ден соолугу чың болору жөнүндө: «Анын денеси жаш кезиндегисинен да жаш болсун, ал жаштыктын күчүнө толуп турган күндөрүнө кайрылып келсин»,— деп айтылат (Аюп 33:25).

Эскертүү: Өнөкөт оору менен күрөшүш үчүн адам жардам издеп Кудайга кайрылгандан тышкары, доктурга да кайрылышы керек экенин Жахабанын Күбөлөрү жакшы түшүнүшөт (Марк 2:17). Бирок алар дарылануунун белгилүү бир ыкмасын сунушташпайт. Кантип дарыланарын ар ким өзү чечиши керек.