Жөндөө мүмкүнчүлүгү

Тилди тандаңыз

Кошумча менюну көрсөтүү

Мазмунун көрсөтүү

Жахабанын Күбөлөрү

кыргыз

Африкадагы көзү көрбөгөн адамдарга жардам берүү

Африкадагы көзү көрбөгөн адамдарга жардам берүү

Өнүгүп келаткан кээ бир өлкөлөрдөгү көзү көрбөгөн адамдарда башка өлкөлөрдөгү ошондой адамдар ээ болгон мүмкүнчүлүктөр жок. Алардын коом тарабынан четке кагылып калган учурлары да кездешет. Ошондой эле аларга көзү көргөн адамдарга боло жүргөн нерсеге айланган, ал эми алар үчүн кыйынга турган иштерди кылууда жардам көрсөтүлбөйт. Мисалы, азиздерге дүкөнгө барып тамак-аш сатып алуу, автобус менен бир жакка баруу жана төлөмдөрдү төлөө кыйынга турат. Андан сырткары, алардын көпчүлүгү сабатсыз келет. Алардын баары эле Брайл арибин окуганды билбейт. Окуй алган күндө да, Брайл арибиндеги адабияттарды табуу оңой эмес.

100 жылдан ашуун убакыттан бери Жахабанын Күбөлөрү азиздер үчүн Ыйык Китепке негизделген адабияттарды чыгарып келет. Брайл арибиндеги китеп-журналдар Малавидеги чичева тилинде да чыгышы үчүн, Жахабанын Күбөлөрү жакында эле Нидерландиядан Малавиге Брайл арибиндеги адабияттарды басып чыгара турган жана мукабалай турган жабдыкты жөнөтүшкөн.

Брайл арибиндеги адабияттарды чыгаруу жагынан тажрыйбасы бар Лео Жахабанын Күбөлөрүнүн Бразилиядагы филиалынан Малавиге жөнөтүлгөн. Ал ошол жактагы беш кишиден турган топко жабдыкты колдонууну үйрөнүүгө жана Жахабанын Күбөлөрү иштеп чыккан, текстти Брайл арибине өзгөрткөн компьютердик программаны өздөштүрүүгө жардам берген. Ал программа текстти чичева тилиндеги Брайл арибине өзгөртө алышы үчүн, компьютерге кадимки тексттин символдорун да, Брайл арибиндеги символдорду да камтыган атайын таблица орнотулат. Программа текстти Брайл арибине өзгөртүп, көзү көрбөгөн кишилер оңой окуй ала тургандай кылып форматтайт. Келгиле анда, Малавиде жашаган кээ бир азиз адамдардын Брайл арибинде чыккан адабияттар жөнүндө эмне дегенин карап көрөлү.

Муниярадзи деген көзү көрбөгөн бир жаш келиндин радиостанцияда өзү алып барган жеке программасы бар. Ал ошол жерде жарым күндүк жумушта иштейт. Ошондой эле башкаларга Ыйык Китептен билим алууга жардам берүүгө айына 70 саат жумшайт. Ал мындай деп ой бөлүшөт: «Мен буга чейин Брайл арибиндеги адабияттарды англис тилинде окучумун. Бирок адабияттарды өзүмдүн эне тилимде окуй баштаганда жүрөгүм кадимкидей козголду. Ишенимдештеримдин Брайл арибиндеги адабияттарды чыгарыш үчүн көп күч-аракет жана каражат жумшап жатканына аябай ыраазымын. Ушундан улам мен өзүмдү керектүү сезем».

Фрэнсис деген Жахабанын Күбөсү Түндүк Малавиде жашайт. Көзү көрбөгөндүктөн, мурун ал башкалардан ага окуп беришин суранчу. Бирок биринчи жолу Брайл арибиндеги адабияттарды өз эне тилинде, чичева тилинде, алганда: «Түш көргөндөй эле болуп жатам. Бул өзүнчө эле керемет!» — деп сүйүнгөн.

Лоис көзү көрбөгөнүнө карабай толук убакыттагы кызматты аркалап келет. Ал 52 кишиге жашоосун жакшы жакка өзгөрткөнгө жардам бере алган. Кантип? Ал Жахабанын Күбөлөрү тарабынан чыгарылган Брайл арибиндеги адабияттарды колдонуп, адамдарды окутат. Ал эми аны менен Ыйык Китепти изилдегендер кагазга чыгарылган кадимки адабияттарды колдонушат.

Лоис ыйык китептик изилдөө өткөрүп жатат

Жогоруда сөз кылынган Лео деген бразилиялык Жахабанын Күбөсү мындай дейт: «Адамдардын Ыйык Китепке негизделген Брайл арибиндеги адабияттарды өз эне тилинде алып, сүйүнүп жатканын көргөндө аябай кубанам. Алардын көпчүлүгү жыйналышка өз алдынча даярданууга, кабар айтуу ишине өз алдынча катышууга жардам берген адабияттардын чыгарылып жатканына төбөсү көккө жете сүйүнүп, Жахаба Кудайга абдан ыраазы болушат. Эми алардын өздүк изилдөөcү, башкалардан көз каранды болбой, чынында эле өздүк изилдөө болуп калды. Алар үйүндөгүлөрүнө да рухий жактан өсүүгө жакшы жардам бере алышат. Ушул адабияттар аларга Жахабага жакындоого да жардам берүүдө».

КӨБҮРӨӨК БИЛИШ ҮЧҮН

Кудайдын ысмынын суахили тилинде белгилүү болушу

Кудайдын ысмы суахили тилиндеги Ыйык Китепке кандайча жазылып калганын окуп көргүлө.

Көрүнбөс Кудайды көрүү мүмкүнбү?

Канткенде Кудайды «жүрөгүңөрдүн көзү» менен көрө аласыңар?