Жөндөө мүмкүнчүлүгү

Тилди тандаңыз

Кошумча менюну көрсөтүү

Мазмунун тизмесин көрсөтүү

Мазмунун көрсөтүү

Жахабанын Күбөлөрү

кыргыз

Онлайн Ыйык Китеп

ЫЙЫК КИТЕПТИН «ЖАҢЫ ДҮЙНӨ КОТОРМОСУ»

Лука 2:1—52

2  Ошол күндөрү цезарь* Август бүт элди каттоодон өткөрүү* жөнүндө буйрук чыгарды+.  Ал Кирений Сирияны башкарып турган убакта жүргүзүлгөн биринчи эл каттоо эле.  Ошондо каттоодон өтүү үчүн+ ар ким өз шаарына жөнөдү.  Жусуп да Галилеядагы Назарет шаарынан чыгып, Жүйүт жерине, Дөөтүнүн шаары Бетлехемге+ жол тартты, анткени Дөөтүнүн тукумунан эле+.  Ал ай-күнүнө жетип калган+ аялы+ Мариям+ менен бирге каттоодон өтмөкчү болду.  Ошол жактан Мариямдын төрөр маалы келип,  тун уулун төрөдү+. Ал баланы ороп, акырга жаткырды+, анткени конок үйүндө орун жок эле.  Ошол аймакта талаада жашап, түнкүсүн малын күзөткөн койчулар бар эле.  Бир убакта Жахабанын периштеси+ пайда болуп, алардын айланасы Жахабанын даңкынан+ жаркырай түштү. Ошондо баарын коркунуч басты. 10  Бирок периште аларга: «Коркпогула. Мен силерге элдин баарына чоң кубаныч тартуулай турган жакшы кабар жарыялаганы келдим+. 11  Бүгүн Дөөтүнүн шаарында+ Куткаруучуңар+, Мырзаңар Машаяк+ төрөлдү. 12  Ымыркайды жалаякка оролуп, акырда жаткан жеринен табасыңар. Аны ушундан билесиңер»,— деди. 13  Анан капысынан периштенин жанына көп сандаган асман аскерлери+ пайда болуп, Кудайды: 14  «Эң жогорудагы Кудай даңкталсын!+ Жер үстүндө, анын ырайымына ээ болгондордун+ арасында тынчтык болсун!»+ — деп даңктай башташты+. 15  Периштелер асманга көтөрүлүп кеткенде, койчулар бири-бирине: «Жүргүлө, батыраак Бетлехемге баралы. Жахабанын бизге айтканы боюнча, ал жерде эмне болгонун көрөлү»,— дешти+. 16  Анан дароо ошол жакка барып, Мариямды, Жусупту жана акырда жаткан баланы көрүштү. 17  Ошондо койчулар бала жөнүндө уккандарын айтып беришти. 18  Уккандардын баары таң калып жатышты. 19  Мариям болсо айтылгандар жөнүндө ойлонуп, бардыгын көкүрөгүнө түйүп алды+. 20  Анан койчулар уккан-көргөндөрүнүн баары өзүлөрүнө айтылгандай болуп чыкканы үчүн Кудайды даңктап-мактап, артка жол тартышты. 21  Сегиз күндөн кийин+, баланы сүннөткө отургузар маал келгенде+, атын Иса коюшту+. Периште ага ушундай ат коюуну энесинин боюна бүтө электе эле айткан болчу+. 22  Мусанын мыйзамы боюнча өздөрүнүн тазалануу убагы+ бүткөндө, ата-энеси баланы Иерусалимге Жахабанын алдына алып келди. 23  Анткени Жахабанын мыйзамында: «Тун уулдардын ар бири Жахабага арналышы керек»,— деп жазылган эле+. 24  Ошондой эле алар Жахабанын мыйзамындагы: «Эки бактек же эки жаш көгүчкөн алып келсин»,— деген сөздөргө ылайык курмандык чалышты+. 25  Иерусалимде адил, Кудайдан корккон, ыйык рухтун жетеги менен жашаган Шымон аттуу бир киши бар эле. Ал ысрайыл элинин сооронор мезгилин+ күтүп жүргөн. 26  Ага Жахаба жиберген Машаякты+ көргөнгө чейин өлбөй турганы жөнүндө ыйык рух аркылуу аян берилген болчу. 27  Рухтун жетеги менен+ ал ибадатканага келди. Ымыркай Исаны ата-энеси мыйзамдын талабын аткаруу үчүн ибадатканага алып келгенде+, 28  Шымон аны колуна алып, Кудайды даңктап: 29  «Эгедер Теңир, өз сөзүң боюнча эми кулуң тынч өлө берсе болот+. 30  Анткени сен караштырган куткарууну+, 31  бүт элдердин көз алдында даярдаган куткарууңду, көрдүм+. 32  Бул — элдерди+ каптап турган караңгылыкты жок кылуучу+ жарык+, ысрайыл элиңдин даңкы»,— деди. 33  Исанын ата-энеси баласы жөнүндө айтылган бул сөздөргө таң калып жатты. 34  Шымон аларга батасын берип, баланын энеси Мариямга: «Бул бала Ысрайылда көптөрдүн кулашына+, көптөрдүн кайра турушуна себепкер болот+, жек көрүндү болот+. 35  Мунун аркасында көп адамдардын жүрөгүндөгү ойлору ачыкка чыгат+. Сенин жүрөгүңө* болсо чоң кылыч сайылат»,— деди+. 36  Ал жерде Ашыр уруусунан чыккан Пануелдин кызы Анна деген улгайган пайгамбар аял да бар болчу. Ал турмушка чыгып, күйөөсү менен жети жыл жашагандан кийин 37  жесир калган эле+. Сексен төрттөгү ошол пайгамбар аял орозо кармап, Кудайга жалынып, күнү-түнү ыйык кызмат кылып+, дайыма ибадатканада жүрчү. 38  Ал да Мариям менен Жусуптун жанына келип, Кудайга ыраазычылык билдирди да, Иерусалимдин куткарылуусун күтүп жүргөндөрдүн баарына бала жөнүндө айта баштады+. 39  Ошентип, Жахабанын мыйзамында талап кылынгандын баарын аткаргандан кийин+ алар Галилеяга, өздөрүнүн Назарет шаарына+ кайтып келишти. 40  Бала өсүп, күчкө+, акылга толуп, Кудайдын ырайымына ээ боло берди+. 41  Анын ата-энеси жыл сайын+ Иерусалимге пасах майрамына барчу. 42  Иса он эки жашка чыкканда, алар адаттагыдай эле майрамга барышты+. 43  Майрам аяктагандан кийин кайра жолго чыгышты, Иса болсо Иерусалимде калып калды. Муну ата-энеси байкаган жок. 44  Алар аны башкалар менен келатат деп ойлошту. Бирок бир күн жол жүргөндөн кийин+, аны туугандары менен тааныштарынын арасынан издей башташты. 45  Таппаган соң кайра Иерусалимге барып, ал жактан да аябай издешти. 46  Акыры үч күндөн кийин аны ибадатканадан табышты+. Ал окутуучулардын айткандарын угуп, аларга суроо берип отурган экен. 47  Угуп жаткандардын баары анын акылына, берген жоопторуна абдан таң калып жатышты+. 48  Баласын көрүп, ата-энеси аң-таң болду. Анан энеси: «Балам, бул эмне кылганың? Атаң экөөбүз сени издеп, сарсанаа болуп бүттүк»,— деди. 49  Ал болсо: «Мени эмнеге издедиңер? Атамдын үйүндө болушум керектигин билген эмес белеңер?» — деп жооп берди+. 50  Бирок алар анын айткандарынын маанисин түшүнүшкөн жок+. 51  Иса алар менен Назаретке кайтып келди. Ал ата-энесине баш ийип, дайыма тил алчаак болду+. Энеси болсо ушулардын баарын көкүрөгүнө түйүп жүрдү+. 52  Иса өсүп-жетилип, барган сайын акылмандыгы артып+, Кудайдын да, адамдардын да жактыруусуна ээ боло берди+.

Шилтемелер

Же: «император».
Сөзмө-сөз: «эл отурукташкан бүт жерде каттоо жүргүзүү».
Сөзмө-сөз: «жаныңа».