Жөндөө мүмкүнчүлүгү

Тилди тандаңыз

Кошумча менюну көрсөтүү

Мазмунун тизмесин көрсөтүү

Мазмунун көрсөтүү

Жахабанын Күбөлөрү

кыргыз

КҮЗӨТ МУНАРАСЫ (ИЗИЛДӨӨГӨ АРНАЛГАН ЧЫГАРЫЛЫШЫ) МАРТ 2015

«Сенин эркиң ушундай болчу»

«Сенин эркиң ушундай болчу»

«Буларды даанышмандар менен акылдуулардан жашырып, наристелерге ачып бердиң» (ЛК. 10:21).

1. Иса Машаяк эмнеден улам «ыйык рухка толуп, кубанган»? (Макаланын башындагы сүрөттү кара.)

ИСА МАШАЯКТЫН «ыйык рухка толуп, кубанып» турганын элестетсең. Балким, көз алдыңа анын жылуу жылмайып, көздөрүнөн нур чачырап турганы тартылгандыр. Иса эмнеден улам ошончолук кубанган? Ал жакында эле 70 шакиртин Кудайдын Падышалыгы жөнүндөгү кабарды жарыялоого жөнөткөн болчу. Ал шакирттеринин тапшырылган ишти кантип аткарарына абдан кызыкдар болгон. Анткени көптөгөн таасирдүү душмандар, алардын ичинде жогорку билимдүү китепчилер менен фарисейлер жакшы кабардын таралышына бут тосушкан. Алардын таасиринен улам көптөр Исаны жөнөкөй эле жыгач уста, ал эми анын жолдоочуларын «билими жок карапайым кишилер» катары көрүшчү (Элч. 4:13; Мр. 6:3). Анткен менен шакирттер кабар айтуу ишинен кубанычтуу кайтып келишкен. Себеби алар башкалардын, атүгүл жиндердин каршылыгына карабай, жакшы кабарды ийгиликтүү жарыялай алышкан. Аларга кайраттуу болуп, кубанычтуу кызмат кылууга эмне жардам берген? (Оку: Лука 10:1, 17—21.)

2. а) Исанын шакирттери кандай мааниде наристелерге окшош болушкан? б) Шакирттер эмнеден улам Кудайдын Сөзүндөгү маанилүү чындыктарды түшүнө алышкан?

2 Көңүлгө аларлык нерсе, Иса Жахабага кайрылып: «Ата, асман-жердин Жаратканы, сени эл алдында даңктайм, анткени буларды даанышмандар менен акылдуулардан жашырып, наристелерге ачып бердиң. Ооба, Ата, сенин эркиң ушундай  болчу»,— деген (Мт. 11:25, 26). Албетте, шакирттер сөздүн түз маанисинде наристелер эмес болчу. Иса алардын өздөрүн акылдуу эсептеген жогорку билимдүү кишилерге салыштырмалуу кичинекей балдардай экенин айткан. Андан да маанилүүсү, ал жолдоочуларын балдар сыяктуу үйрөнүүгө дилгир, момун бойдон калууга үндөгөн (Мт. 18:1—4). Момун болуунун аркасында алар кандай пайда алышкан? Жахаба ыйык руху аркылуу аларга өзүнүн Сөзүндөгү маанилүү чындыктарды түшүнүүгө жардам берген. Ал эми билимине чиренип, шакирттерди басынткандар өздөрүнүн текебердигинин жана Шайтандын айынан көкүрөгү сокур бойдон калышкан.

3. Бул макалада эмне талкууланат?

3 Исанын аябай кубанганы жөндүү болчу. Ал Жахабанын терең чындыктарды билим деңгээли ар кандай момун адамдарга кантип ачып бергенин көрүп сүйүнгөн. Ага Атасынын аларды жөнөкөй жол менен окутуп-үйрөткөнү абдан жаккан. Жахаба андан бери өзгөрдүбү? Анын адамдарды дагы деле ошондой жол менен окутуп-үйрөтүп жатканы эмнеден көрүнүп турат? Бул суроолордун жообун карап чыгуунун аркасында биздин да Исадай болуп кубанарыбыз шексиз.

МААНИСИ ТЕРЕҢ ЧЫНДЫКТАРДЫН БАРДЫК АДАМДАРГА ТҮШҮНҮКТҮҮ БОЛУШУ

4. «Күзөт мунарасынын» жөнөкөйлөтүлгөн чыгарылышынан көптөр кандай пайда алууда?

4 Акыркы жылдары Жахабанын уюмунда Ыйык Китепте жазылгандарды мурункудан да жөнөкөй жана айкын-так түшүндүрүүгө басым жасалып келет. Бул анын элинин кубанычына кубаныч кошууда. Буга байланыштуу үч нерсени карап көрөлү. Биринчиси — изилдөөгө арналган «Күзөт мунарасынын» жөнөкөйлөтүлгөн чыгарылышы *. Бул чыгарылыш тилди жакшы түшүнбөгөндөр менен жакшы окуй албагандар үчүн сонун белек болду десек жаңылышпайбыз. «Күзөт мунарасы» Кудайдын элин өз убагында рухий тамак менен камсыз кылууда негизги курал болуп эсептелет. Көп ата-энелер азыр балдарынын ал журналды изилдөөгө жигердүү катыша баштаганын байкашкан. Ошондой эле көптөр журналдын жөнөкөйлөтүлгөн чыгарылышы үчүн Жетектөөчү Кеңешке ыраазычылык билдирип, жүрөк козгоорлук каттарды жазышкан. Алсак, бир ишенимдешибиз мурун жыйналыштан «Күзөт мунарасы» изилденгенде жооп бергенден тартынып жүргөнүн, ал эми жөнөкөйлөтүлгөн чыгарылышын колдоно баштагандан тартып жагдайы өзгөргөнүн жазган. Ал: «Азыр мен бир нече жолу жооп берем. Коркпой да калдым. Жахабага жана силерге чоң рахмат»,— деп кубанычы менен бөлүшкөн.

5. «Жаңы дүйнө котормосунун» кайра каралган басылышынын айрым өзгөчөлүктөрү кайсылар?

5 Экинчиси — англис тилиндеги Ыйык Китептин «Жаңы дүйнө котормосунун» кайра каралган басылышы. Анын жарык көргөнү тууралуу 2013-жылы 5-октябрда өткөрүлгөн жылдык жолугушууда кулактандырылган *. Андагы көптөгөн аяттардын сөздөрү кыскартылган. Бирок алардын мааниси эч өзгөргөн эмес, атүгүл мурдагыдан да айкыныраак болуп калган. Айталы, мурун Аюп 10:1де 27 сөз болсо, азыр 19 сөз, ал эми Накыл сөздөр 8:6да 20 сөз болсо, азыр 13 сөз болуп калды. Эки аят тең жаңы басылышта түшүнүктүүрөөк берилген. Жахабага ондогон жылдардан бери ишенимдүү кызмат кылып келаткан бир майланган байке: «Мен жаңы эле Аюп китебин окуп чыктым. Аны өмүрүмдө биринчи жолу түшүнгөндөй болуп жатам»,— деген. Көптөгөн окурмандарыбыз жаңы Ыйык Китеп жөнүндө ушу сыяктуу ой-пикирлерин билдиришкен.

6. Матай 24:45—47-аяттарда жазылгандар жаңыча түшүндүрүлгөндө, кандай сезимде болгонсуң?

 6 Үчүнчүсү — Ыйык Китептеги айрым аяттардын жаңыча ачылып берилиши. Алсак, «Күзөт мунарасынын» 2013-жылдын 15-июлундагы санында «ишенимдүү жана акылдуу кулдун» ким экени жаңыча түшүндүрүлгөндө, жүрөгүбүз толкубай койгон жок (Мт. 24:45—47). Анда ишенимдүү кулдун Жетектөөчү Кеңешти билдирери, ал эми «үйүндөгүлөрүнө» рухий жактан азыктангандардын баары: майлангандар да, башка койлор да кирери ачылып берилген (Жкн. 10:16). Ушу сыяктуу мааниси терең чындыктарды окуп-билүүдөн жана аларды башкаларга үйрөтүүдөн зор канааттануу алуудабыз. Жахабанын бизди жөнөкөй жол менен окутуп-үйрөтүп жатканы дагы эмнелерден көрүнүп турат?

ЫЙЫК КИТЕПТЕГИ ОКУЯЛАРДЫН ЖӨНӨКӨЙ, ТАК-АЙКЫН ТҮШҮНДҮРҮЛҮШҮ

7, 8. Ыйык Китептеги пайгамбарлык мааниге ээ билдирүүлөрдүн айрымдары кайсылар?

7 Эгер Жахабага бир топ жылдан бери кызмат кылып келатсаң, биздин адабияттарда Ыйык Китептеги окуяларды түшүндүрүү ыкмасы бара-бара өзгөргөнүн байкагандырсың. Кандайча? Мурун Ыйык Китептеги кайсы бир окуя талкууланганда көбүнчө анын кийин кантип аткарылганына басым жасалчу. Ыйык Китептеги окуялардын ошондой жол менен түшүндүрүлүшүнө негиз бар беле? Ооба. Маселен, Иса Машаяк бир жолу Жунус пайгамбардын «жышааны» жөнүндө сөз кылган. (Оку: Матай 12:39, 40). Жахаба аман алып калбаганда, балык Жунус пайгамбардын мүрзөсү болуп калмак. Ошондуктан Иса анын балыктын ичинде жаткан убагын пайгамбарлык катары колдонуп, өзүнүн мүрзөдө канча убакыт болорун алдын ала айткан.

8 Ыйык Жазмада пайгамбарлык мааниге ээ дагы башка билдирүүлөр камтылат. Элчи Пабыл алардын айрымдарын айтып өткөн. Мисалы, ал Ыбрайым пайгамбардын Ажар жана Саара менен болгон мамилеси Жахабанын ысрайыл эли жана уюмунун асмандагы бөлүгү менен болгон мамилесин билдиргенин жазган (Гал. 4:22—26). Андан тышкары, ыйык чатыр, ибадаткана, күнөөдөн арылуу күнү, башкы дин кызматчы жана ысрайыл элине берилген Мыйзамда айтылган башка нерселер «келечектеги жакшы нерселердин... көлөкөсү» болгон (Евр. 9:23—25; 10:1). Ушулар тууралуу изилдөө жүргүзүү кызыктуу болгондон тышкары, ишенимди бекемдээри күмөнсүз. Бирок Ыйык Китептеги ар бир инсан, окуя жана нерсе сөзсүз түрдө кимдир бирөөнү же бир нерсени билдирет деп жыйынтык чыгаруу туурабы?

9. Набот жөнүндөгү билдирүү мурун кантип түшүндүрүлчү?

9 Мурун Ыйык Жазмадагы окуялар түшүндүрүлгөндө аларда айтылгандардын эмнени билдирерин аныктоого көп аракет жасалчу. Мисалга Набот жөнүндөгү билдирүүнү алалы. Каардуу каныша Изабел Наботтун жүзүмзарын күйөөсү Ахапка алып бериш үчүн аны адилетсиз түрдө өлтүрткөн (1 Пад. 21:1—16). 1932-жылы «Күзөт мунарасында» Ахап менен Изабел Шайтан менен анын уюмун, Набот Иса Машаякты, ал эми анын өлүмү Исанын өлүмгө кыйылганын билдирет деп түшүндүрүлгөн. Бирок 1961-жылы чыккан «Сенин ысмың ыйыкталсын» деген китепте (англ.) Наботтун майлангандарды, ал эми Изабелдин христиан дүйнөсүн билдирери жазылган. Ага ылайык, Изабелдин Наботту куугунтуктаганы майлангандардын акыркы күндөрдө куугунтукталганын билдирген. Ыйык Китептеги окуялардын ушундайча түшүндүрүлгөнү көп жылдар бою Кудайдын элинин ишенимин бекемдеп келген. Бирок кийин бул ыкма өзгөрдү. Эмне үчүн?

10. а) Ыйык Китептеги айрым окуяларды түшүндүрүүдө ишенимдүү кул эмнеден сак болуп калды? б) Бүгүнкү күндө адабияттарыбызда эмнеге көбүрөөк басым жасалат?

 10 Жахаба «ишенимдүү жана акылдуу кулга» барган сайын акылдуу болууга жардам берип келет. Акылмандык болсо ишенимдүү кулга Ыйык Китептеги окуяларды, айрыкча, айкын негиз жок болгондо, пайгамбарлык мааниге ээ болгондой кылып түшүндүрүүдөн сак болууга көмөк кылууда. Андан сырткары, айрым окуялардын ошондой ыкма менен чечмеленишин түшүнүү көптөргө оор болору байкалган. Анткени кимдин кимди билдирери жана анын себеби майда-чүйдөсүнө чейин түшүндүрүлгөндө, аларды эстеп калуу, айтылгандарды иш жүзүндө колдонуу бир топ кыйын болчу. Андан да жаманы, окуянын пайгамбарлык маанисине өтө көп басым жасалгандыктан, андагы биз үчүн пайдалуу боло турган маанилүү ойлор көз жаздымында калып калышы мүмкүн эле. Андыктан бүгүнкү күндө адабияттарыбызда Ыйык Китептеги окуялар жөнөкөй түшүндүрүлүп, алардан ишеним, туруктуулук, Кудайга берилгендик жана башка баалуу сапаттарды өрчүтүүгө байланыштуу эмнелерге үйрөнсөк болоруна көбүрөөк басым жасалып келет *.

Набот бизге жакшы үлгү калтырган (11-абзацты кара)

11. а) Учурда Набот жөнүндөгү билдирүү кантип түшүндүрүлөт жана Набот кандайча бизге жакшы үлгү калтырган? б) Эмне себептен акыркы кездерде адабияттарыбызда окуялардын каймана маанисине көп басым жасалбай калды? (Ушул сандагы «Окурмандардын суроолорун» кара.)

11 Учурда Набот жөнүндөгү билдирүү мурункудан бир топ жөнөкөй жана айкын-так түшүндүрүлөт. Ал адил киши Иса Машаякты же майлангандарды билдиргендиктен эмес, кынтыксыз болгондуктан өлгөн. Бийлиги бар адамдардын жеткен адилетсиздигине, жүзү каралыгына карабай, Набот Жахабанын мыйзамына бекем карманган (Сан. 36:7; 1 Пад. 21:3). Биз да аныкындай жагдайга кабылып калышыбыз мүмкүн. Ошондой учурда анын үлгүсүн унутпаганыбыз маанилүү. (Оку: 2 Тиметей 3:12.) Набот тууралуу билдирүүдө камтылган бул ойду түшүнүү, эстеп калуу, иш жүзүндө колдонуу Кудайдын бардык кызматчыларына оңой болору жана анын аркасында алардын ишеними бекемделери шексиз.

12. а) Ыйык Китептеги окуялар жөнүндө кандай тыянак чыгарбашыбыз керек? б) Эмне үчүн биз мааниси терең окууларды да айкын-так түшүнө алабыз? (Шилтемени кара.)

 12 Жогоруда айтылгандардан улам Ыйык Китептеги окуяларда иш жүзүндө колдонорлук ойлор гана камтылат деп тыянак чыгарсак болобу? Жок. Бүгүнкү күндө адабияттарыбызда кайсы бир окуянын бир нерсени эсибизге салып турары же ошол нерсени билдирери айтылган учурлар көп эле кездешет. Бирок аларда Ыйык Китептеги көптөгөн окуялар пайгамбарлык мааниге ээ болгондой кылып түшүндүрүлбөйт. Мисалы, Наботтун куугунтукталганда жана өлүм менен беттешкенде кынтыксыз бойдон калганы Машаяк менен анын майланган жолдоочуларынын кынтыксыздыгын сактаганын эсибизге салат деп ишенимдүү түрдө айта алабыз. Бирок ал окуя Машаяктын «башка койлорго» кирген көптөгөн жолдоочуларынын ишенимдүүлүгүн да эсибизге салат. Анын ушундайча түшүндүрүлгөнү да Кудайдын өз элин дайыма жөнөкөй, түшүнүктүү окутарын көрсөтүп турат *.

ИСАНЫН МИСАЛДАРЫНЫН ЖӨНӨКӨЙ, АЙКЫН-ТАК ТҮШҮНДҮРҮЛҮШҮ

13. Исанын мисалдары жөнөкөй, айкын-так түшүндүрүлүп жатат деп эмне үчүн айта алабыз?

13 Иса Машаяк адамзат тарыхындагы эң улуу Окутуучу болгон. Ал элди окутканда мисалдарды көп колдончу (Мт. 13:34). Негизи, мисалдарда ой жүгүртүүгө түрткү берип, жүрөгүбүзгө терең таасир эте турган көркөм сөз каражаттары арбын кезигет. Исанын мисалдары адабияттарыбызда жөнөкөй, так-айкын түшүндүрүлүп жатабы? Ооба. 2008-жылы 15-июлда чыккан «Күзөт мунарасында» анын ачыткы, сары кычы даны, балык кармаган тор жөнүндөгү мисалдары түшүндүрүлгөндө, баарыбыз кубанганбыз. Азыр биз алардын Падышалыкка жана анын көптөргө бул дүйнөдөн чыгып, чындык жолуна түшүүгө жардам берерине байланыштуу айтылганын билебиз.

14. а) Боорукер самариялык киши жөнүндөгү аңгеме мурун кантип түшүндүрүлчү? б) Исанын ал аңгемеси азыр кантип түшүндүрүлөт?

14 Ал эми Исанын аңгемелери жөнүндө эмне айтууга болот? Алардын айрымдары каймана мааниге ээ болсо, башкаларында бизге пайдалуу боло турган ойлор гана камтылган. Бирок ал аңгемелердин кайсынысы кандай экенин кантип аныктаса болот? Бул убакыттын өтүшү менен айкын болууда. Мисалга боорукер самариялык киши жөнүндөгү аңгемени алалы (Лк. 10:30—37). 1924-жылы «Күзөт мунарасында» самариялык киши Исаны, ал эми Иерусалимден Жерихого түшкөн жол адамзаттын Эйден багындагы окуядан баштап начарлап бараткан абалын билдирет деп жазылган. Ошондой эле анда талап-тоноочулар чоң уюмдар менен ач көз алып-сатарларды, ал эми дин кызматчы менен леби христиан дүйнөсүн билдирет деп түшүндүрүлгөн. Бүгүн болсо бул аңгеме Кудайдын бардык кызматчыларына бет карама болбоо керектигин эскертүү үчүн колдонулат. Биз башкаларга жардам берүүдө, өзгөчө, Ыйык Китептеги чындыкты билүүгө көмөк көрсөтүүдө бет карама болбошубуз керек. Өзүнүн Сөзүндө жазылгандарды түшүнүктүү кылып ачып берип жатканы үчүн Жахабага кандай гана ыраазыбыз.

15. Кийинки макалада эмне талкууланат?

15 Кийинки макалада Исанын он кыз жөнүндөгү мисалын талкуулайбыз (Мт. 25:1—13). Иса акыркы күндөрдө жашаган жолдоочуларынын ал мисалды кандай түшүнүшүн каалаган? Андагы ар бир каарман, буюм же иш-аракет келечектеги кайсы бир нерсени билдиргенби? Же анда биз үчүн акыркы күндөрдө жетекчилик катары колдоно турган ой камтылганбы? Муну эмки макаладан билебиз.

^ абз. 4 «Күзөт мунарасынын» жөнөкөйлөтүлгөн чыгарылышы англис тилинде биринчи жолу 2011-жылы июлда жарык көргөн. Азыр ал дагы башка бир нече тилде чыгууда.

^ абз. 5 «Жаңы дүйнө котормосунун» кайра каралган басылышы башка тилдерде да даярдалууда.

^ абз. 10 Мисалы, «Ишеними күчтүү инсандардан үлгү алгыла» деген китепте Кудайдын байыркы убактагы 14 кызматчысы тууралуу талкууланат. Ал китепте окуялардын каймана маанисине эмес, аларда камтылган ойлорду иш жүзүндө кантип колдонсок болоруна көңүл бурулат.

^ абз. 12 Албетте, Ыйык Китепте, анын ичинде элчи Пабылдын айрым каттарында «түшүнгөнгө кыйын нерселер да бар». Бирок Ыйык Китепти жазгандардын баарын ыйык рух жетектеп турган. Ошол эле ыйык рух бүгүнкү күндө Машаяктын жолдоочуларына Ыйык Китепте жазылгандарды, «атүгүл Кудайдын терең сырларын да» түшүнүүгө жардам берип жатат (2 Пет. 3:16, 17; 1 Кор. 2:10).