Мазмунун көрсөтүү

Кошумча менюну көрсөтүү

Мазмунун тизмесин көрсөтүү

Жахабанын Күбөлөрү

кыргыз

Күзөт мунарасынын изилдөөгө арналган чыгарылышы  |  Октябрь, 2016

Чоочундарга боорукердик көрсөтүүнү унутпайлы

Чоочундарга боорукердик көрсөтүүнү унутпайлы

«Меймандостук көрсөтүүнү унутпагыла» (ЕВР. 13:2).

ЫРЛАР: 124, 79

1, 2. а) Башка өлкөгө баргандар кандай кыйынчылыктарга кабылышат? (Макаланын башындагы сүрөттү кара.) б) Ыйык Китепте Кудайдын кызматчылары эмнеге чакырылат жана буга байланыштуу кандай суроолор туулат?

ОТУЗ жылдан ашык убакыт мурун Осэ [1] Ганадан Европага жер которуп келген. Ал убакта Осэ Жахабанын Күбөсү эмес болчу. Ал мындай деп эскерет: «Көп өтпөй эле башкалардын мени менен иши деле жок экенин түшүнгөм. Аба ырайы да таптакыр башкача экен. Аэропорттон чыкканда өмүрүмдө биринчи жолу суукту сезгем. Ошондо чыдабай ыйлап жибергем». Тил билбегендиктен Осэ бир жылдан ашык убакыт бою түзүгүрөөк жумуш таба албай кыйналган. Бөтөн эл, бөтөн жерде ал жалгызсырап, үйүн сагынып куса болгон.

2 Сен да ушундай жагдайга кабылсаң, башкалардын сага кандай мамиле кылышын каалайт элең? Улутуң, териңдин түсү башка болсо да, Падышалык залындагылардын сени жылуу тосуп алышканына ыраазы болот белең? Ыйык Китепте Кудайдын кызматчылары «меймандостук көрсөтүүнү унутпоого» чакырылышат (Евр. 13:2). Бул аяттагы «меймандостук көрсөтүү» деп которулган сөз айкашы түп нускада «чоочундарга боорукердик  көрсөтүү» дегенди билдирет. Анда эмесе, буга байланыштуу төмөнкү суроолорду карап чыгалы: Жахаба чоочундарга кандай карайт? Аларга болгон көз карашыбызды өзгөртүшүбүз керекпи? Аларга өздөрүн үйүндө жүргөндөй сезүүгө кантип жардам берсек болот?

ЖАХАБА ЧООЧУНДАРГА КАНДАЙ КАРАЙТ?

3, 4. Чыгуу 23:9га ылайык, ысрайыл эли бөтөн жерликтерге кандай мамиле кылышы керек болчу жана эмне үчүн?

3 Жахаба элин Мисир кулчулугунан алып чыккандан кийин аларга арасындагы бөтөн жерликтерге кандай мамиле кылышы керектигине байланыштуу бир канча мыйзам берген. Бул анын бөтөн жерликтерге кам көргөнүн көрсөтүп турат (Чыг. 12:38, 49; 22:21). Адатта бөтөн жерликтер жардамга көбүрөөк муктаж болот. Ошондуктан мээримдүү Кудай алардын жыргалчылыгы үчүн атайын чараларды көргөн. Алсак, аларга түшүмдүн калдыгын терип алууга укук берген (Леб. 19:9, 10).

4 Жахаба элине чоочундарга урмат көрсөтүүнү буйруп эле койбостон, алардын боорукердик сезимин ойготууну көздөгөн. (Оку: Чыгуу 23:9.) Алар «келгин болгон кандай экенин» жакшы билишчү. Атүгүл кулчулукка түшө электе эле мисирликтер алардан, улуту же туткан дини башка болгондуктан, жийиркенип турушкан көрүнөт (Башт. 43:32; 46:34; Чыг. 1:11—14). Ысрайылдыктар чоочун жерде жүргөндө бир топ азап тартышса да, Жахаба алардан бөтөн жерликтерге «жергиликтүү тургундай» мамиле кылууну күткөн (Леб. 19:33, 34).

5. Бөтөн жерликтерге Жахабадай кам көрүүгө бизге эмне түрткү берет?

5 Бүгүнкү күндө да Жахабанын жыйналышка келген бөтөн жерликтерге так ошондой кам көрөрүнө эч шектенбесек болот (Мыйз. 10:17—19; Мал. 3:5, 6). Эгер алар кабылып жаткан кыйынчылыктар, мисалы, басынтылып жатканы же тил билбегендиктен кыйналары жөнүндө ой жүгүртсөк, аларга боорукердик менен мамиле кылып, жакшылык кылуунун жолдорун издейбиз (1 Пет. 3:8).

ЧООЧУНДАРГА БОЛГОН КӨЗ КАРАШЫБЫЗДЫ ӨЗГӨРТҮШҮБҮЗ КЕРЕКПИ?

6, 7. Кудайдын 1-кылымдагы кызматчыларынын башка улуттагыларга карата болгон бейкалыс көз караштан арыла алышканын эмне көрсөтүп турат?

6 Кудайдын 1-кылымдагы кызматчылары жүйүттөрдүн арасында кеңири тараган бейкалыс көз караштан арыла алышкан. Алсак, б.з. 33-жылы Элүүнчү күн майрамында ар кайсы жактан келген адамдар Исанын жолун жолдой баштаганда, Иерусалимде жашаган жүйүт шакирттер аларга меймандостук көрсөтүшкөн (Элч. 2:5, 44—47). Алардын башка жерден келген ишенимдештерине ушундайча кам көргөнү «меймандостук» деген сөздүн маанисин жакшы түшүнүшкөнүн көрсөткөн.

7 Бирок жыйналыштагылардын саны көбөйгөн сайын, кыязы, адилетсиздикке жаткан жагдайлар болгон. Мисалы, бир жолу грекче сүйлөгөн жүйүттөр алардын жесирлеринин көңүлгө алынбай калып жатканына нааразы болушкан (Элч. 6:1). Бул маселени чечиш үчүн элчилер баарына бирдей кам көрүлүшүнө көз салып турууга жети кишини дайындашкан. Жетөөнүн тең ысымы грекче болгон. Мунун себеби элчилер Кудайдын элинин арасында тек-жайдан улам пайда болгон келишпестиктерди жоюуну көздөшкөн көрүнөт (Элч. 6:2—6).

8, 9. а) Башка улуттагыларга карата терс көз карашта экенибиз же өз улутубузду жогору көрөрүбүз эмнеден көрүнүшү мүмкүн? б) Жүрөгүбүздөн эмнени түп-тамыры менен жулуп салышыбыз керек? (1 Пет. 1:22)

8 Өзүбүз байкайбызбы же жокпу, баарыбызга эле маданиятыбыз күчтүү таасир этет (Рим. 12:2). Ошондой эле кошуналарыбыздын, чогуу иштешкендерибиздин, классташтарыбыздын тек-жайы, уруусу, терисинин түсү башка болгон кишилерди  басынтып сүйлөгөнүн угуп калаттырбыз. Алардын бейкалыс көз карашы бизге канчалык таасир этет? Ал эми кимдир бирөө биздин элди тамашага чалса, маселен, маданиятыбыздагы айрым кемчиликтерди баса белгилесе, кандай жооп кайтарабыз?

9 Элчи Петир бир кезде бөтөн жерликтерге карата бейкалыс көз карашта болгон. Бирок ал бара-бара жүрөгүнөн терс сезимдерди сүрүп чыгарган (Элч. 10:28, 34, 35; Гал. 2:11—14). Эгер биз да жүрөгүбүздө бейкалыс көз караш тамыр алганын же улутубуз менен мактанууга жакын экенибизди байкасак, аны тамыры менен жулуп салууга бүт күчүбүздү жумшашыбыз керек. (Оку: 1 Петир 1:22.) Биз эч кимибиздин куткарылууга татыктуу эмес экенибизди, кайсы улуттан болбойлу, баарыбыз жеткилең эмес экенибизди унутпаганыбыз дурус (Рим. 3:9, 10, 21—24). Андыктан өзүбүздү башкалардан жогору көрүүгө эч кандай себеп жок (1 Кор. 4:7). Биз да элчи Пабылдыкындай көз карашта болушубуз керек. Ал майланган ишенимдештерине: «Силер эми чоочун же келгин эмессиңер,.. Кудайдын үй-бүлөсүнүн мүчөлөрүсүңөр»,— деп айткан (Эф. 2:19). Башка улуттагыларга карата болгон бейкалыс көз карашыбызды жоюуга аракет кылганыбыз жаңы табиятты кийүүгө жардам берет (Кол. 3:10, 11).

ЧООЧУНДАРГА КАНТИП БООРУКЕРДИК КӨРСӨТСӨК БОЛОТ?

10, 11. Бууздун чоочундарга Жахабадай караганы мааптык Рутка кылган мамилесинен кандайча көрүнгөн?

10 Байыркы убакта жашаган Бууз бөтөн жерликтерге Жахаба карагандай караган. Буга анын мааптык Рутка жасаган мамилеси далил. Бууз талаасындагы эгинин оруп-жыйып жаткан жумушчуларын текшергени келгенде жан үрөп машак терип жүргөн чоочун келинди көргөн. Руттун укугу бар болсо да, машак терүүгө уруксат сураганын укканда Бууз аябай таасирленген, атүгүл жумушчуларына ага боолордун арасынан сууруп алып таштап коюуну буйруган. (Оку: Рут 2:5—7, 15, 16.)

11 Рут экөөнүн андан кийинки маегинен Бууздун ага чындап күйүп-бышканын жана бөтөн жерлик болгондуктан абалы оор экенин жакшы түшүнгөнүн билүүгө болот. Талаада иштеп жаткан эркектер урушуп койбошу үчүн, Бууз Рутка анын жумушчу кыздары менен чогуу иштей беришин айткан. Ал тургай, ага башка жумушчулары ичкен суудан, жеген тамак-аштан ичип-жей бергенге уруксат берген. Ошондой эле аны эч басынтпастан, көңүлүн жубаткан сөздөрдү айткан (Рут 2:8—10, 13, 14).

12. Жылуу-жумшак мамилебиз бөтөн жерликтерге кандай таасир этиши мүмкүн?

12 Буузду Руттун кайненеси Наамиге көрсөткөн жан аябас сүйүүсү эле эмес, Жахабанын кызматчысы болгону да таасирленткен. Бууздун боорукердиги Ысрайылдын Кудайы Жахабанын анын «канатынын астынан баш маана издеп келген» келинге көрсөткөн туруктуу сүйүүсүн чагылдырып турган (Рут 2:12, 20; Накыл 19:17). Бүгүнкү күндө да биздин жылуу-жумшак мамилебиз «ар кандай адамдарга» чындыкты табууга жана Жахабанын аларды абдан жакшы көрөрүн сезүүгө жардам бериши мүмкүн (1 Тим. 2:3, 4).

Падышалык залына келген чоочундарды жылуу тосуп алабызбы? (13, 14-абзацтарды кара)

13, 14. а) Падышалык залына келген чоочундарды эмне үчүн жылуу тосуп алышыбыз керек? б) Маданияты башка адамдар менен сүйлөшкөндөн тартынсак, эмне кылсак болот?

13 Падышалык залына келген чоочундарды жылуу тосуп алсак, аларга боорукердик көрсөткөн болобуз. Көбүбүз эле жаңы жер которуп келгендердин айрымдары тартынып, элге аралаша албай жатканын байкаган чыгарбыз. Тарбиясынан же коомдо ээлеген абалынан улам алар расасы же улуту башка адамдардан өздөрүн төмөн сезиши мүмкүн. Андыктан демилгени колго алып, андай кишилерге жылуу-жумшак мамиле кылганыбыз жана чын дилден көңүл бурганыбыз маанилүү. Эгер эне тилибизде  «JW Language» программасы бар болсо, бөтөн тилде учурашканды үйрөнүп алсак болот. (Оку: Филипиликтер 2:3, 4.)

14 Айрымдарыбыз маданияты башка адамдар менен сүйлөшкөндөн тартынышыбыз мүмкүн. Андайда адегенде өзүбүз жөнүндө айтып берсек болот. Ошондо ортобузда айырмачылыктарга караганда жалпылыктар көбүрөөк экенин жана ар бир маданияттын жаман-жакшы жактары бар экенин байкашыбыз ыктымал.

ӨЗ ҮЙҮНДӨ ЖҮРГӨНДӨЙ СЕЗҮҮГӨ ЖАРДАМ БЕРЕЛИ

15. Жаңы өлкөгө көнүп келаткандарга канткенде көбүрөөк түшүнүү менен мамиле кыла алабыз?

15 Башкаларга жыйналышта өзүн үйүндө жүргөндөгүдөй сезүүгө жардам бериш үчүн: «Чет өлкөдө жүрсөм, башкалардын кандай мамиле кылышын каалайт элем?» — деп ойлонуп көр (Мт. 7:12). Жаңы өлкөгө көнүп келаткандарга чыдамдуулук менен мамиле кыл. Башында алардын ой жүгүртүүсүн же ар кандай жагдайдагы иш-аракетин, сезимдерин түшүнбөшүбүз мүмкүн. Андайда алар биздин маданиятыбызга ылайыкташышы керек деп күтпөй, аларды кандай болсо, ошондой кабыл алууга умтулганыбыз маанилүү эмеспи? (Оку: Римдиктер 15:7.)

16, 17. а) Маданияты башка ишенимдештерибиз менен канткенде жакыныраак тааныша алабыз? б) Жыйналышыбыздагы чет өлкөлүктөргө кантип жардам берсек болот?

16 Башка жактан келгендердин мекени, маданияты жөнүндө билип алсак, алар менен мамилелешүү оңоюраак болот. Андыктан үй-бүлө менен сыйынуу кечинде жыйналышыбыздагы же аймагыбыздагы биз жакшы билбеген адамдардын маданияты жөнүндө изилдеп көргөнүбүз дурус. Алар менен жакыныраак таанышуунун дагы бир жолу — конокко чакыруу. Жахаба «башка элдерге ишеним эшигин ачкандыктан», биздин да бөтөн жерлик ишенимдештерибизге эшигибизди кенен ачканыбыз маанилүү (Элч. 14:27, шилт.; Гал. 6:10; Аюп 31:32).

Башка жактан келгендерге меймандостук көрсөтөбүзбү? (16, 17-абзацтарды кара)

17 Чет өлкөлүк үй-бүлөлөр менен чогуу убакыт өткөрүүнүн аркасында алардын биздин маданиятка ылайыкташуу  үчүн канчалык күч жумшап жатканын биле алабыз. Ошондой эле тил үйрөнүүдө жардамга муктаж экенин байкашыбыз мүмкүн. Аларга ылайыктуу жумуш же жашай турган жай табууга көмөк кылганыбыз да зарыл. Ушундай жолдор менен жардам көрсөткөнүбүз аларга күчтүү таасир этиши ыктымал (Накыл 3:27).

18. Жергиликтүү элдин каада-салтын сыйлоо жана ыраазычылык билдирүү жагынан чет өлкөлүктөр кимден үлгү алса болот?

18 Албетте, жер которуп келгендер жаңы өлкөнүн маданиятына көнүш үчүн колунан келгендин баарын кылышат. Бул жагынан Рут жакшы үлгү болуп эсептелет. Айталы, ал машак терүүгө уруксат сурап, жаңы жердин каада-салтын сыйлаарын көрсөткөн (Рут 2:7). Ал машак терүүгө укуктуумун жана башкалар кем-карчыма каралашууга милдеттүү деп эсептеген эмес. Андан тышкары, ага жакшылык кылгандарга ыраазычылык билдирген (Рут 2:13). Эгер чет өлкөдөн келгендер ушундай сапаттарды чагылдырса, жергиликтүү эл да, ишенимдештери да аларды сыйлашат.

19. Чоочундарды жылуу кабыл алууга кандай себептер бар?

19 Биз ырайымдуу Кудайыбыз Жахабанын тек-жайы ар кандай адамдардын жакшы кабарды угушуна жол ачып жатканына абдан кубанабыз. Балким, мекенинде алардын Ыйык Китепти изилдөөгө же Жахабанын эли менен ээн-эркин жолугушууга мүмкүнчүлүгү жоктур. Ал эми биздин өлкөдө аларга Кудайдын эли менен чогуу болууга шарт түзүлүп жаткандыктан, арабызда жүргөндө өздөрүн чоочун сезбегенге жардам беришибиз керек. Аларга материалдык жактан же дагы башка жолдор менен өзүбүз каалагандай жардам бере албасак да, боорукердик көрсөтө алабыз. Муну менен Жахабанын сүйүүсүн чагылдырабыз. Андыктан, келгиле, Кудайыбызды туурап, чоочундарды жылуу кабыл алыш үчүн колубуздан келгендин баарын кылалы (Эф. 5:1, 2).

^ [1] (1-абзац) Ысмы өзгөртүлдү.