Падышалар 1-китеп 17:1—24
17 Гилат жеринде жашаган+ тишпилик Илияс*+ Ахапка: «Өзүм кызмат кылган Ысрайылдын Кудайы Жахабаны, тирүү Кудайды, оозанып ант берем: мен суранмайынча, келерки бир нече жылдын ичинде шүүдүрүм да түшпөйт, жаан да жаабайт!» — деди.+
2 Жахаба Илияска:
3 «Бул жерден чыгып, чыгышты көздөй жөнө да, Иордандын чыгышындагы Керит өрөөнүнө* барып жашын.
4 Сууну ошол жактагы өзөндөн ичесиң, азыкты болсо менин буйругум менен кузгундар ташып келип турат»,— деди.+
5 Илияс ошол замат ал жерден чыгып, Жахаба айткандай, Иордандын чыгышындагы Керит өрөөнүнө барып, ошол жерде жашай баштады.
6 Эртең менен жана кечкисин кузгундар ага нан менен эт ташып турушту, сууну болсо өзөндөн ичип жатты.+
7 Бирок жаан жаабагандыктан, бир нече күндөн кийин өзөндүн суусу соолуп калды.+
8 Ошондо Жахаба ага:
9 «Тур да, Сидондогу Сарепатка барып, ошол жерде жаша. Мен ал жердеги бир жесир аялга сени бакканга буйрук берем»,— деп айтты.+
10 Илияс Сарепатка жөнөдү. Шаардын дарбазасына жеткенде отун терип жүргөн бир жесир аялды көрүп, ага: «Мага ичкенге бир аз суу алып келип берчи»,— деди.+
11 Аял суу алып келгени кетип баратканда, Илияс артынан: «Бир кесим нан да ала келчи»,— деди.
12 Бирок аял: «Тирүү Кудайдын, Жахаба Кудайыңыздын алдында чынын айтып жатам, менде нан жок. Чоң кумурамда бир ууч ун, кичине кумурамда бир аз эле майым калды.+ Бир аз отун терип барып, балам экөөбүзгө жегенге бир нерсе жасайм. Ошону жейбиз да өлөбүз»,— деди.
13 Илияс ага: «Коркпо. Барып, өзүң айткандай кыл. Бирок адегенде калган унуңдан мага кичинекей нан жасап келип бер. Андан кийин балаң экөөңөргө жасайсың.
14 Себеби Ысрайылдын Кудайы Жахаба: „Мен, Жахаба, жаан жаадырганга чейин, чоң кумурадагы ун түгөнбөйт, кичине кумурадагы май азайбайт“,— деп айтты»,— деди.+
15 Аял барып, Илияс айткандай кылды. Анан Илияс да, аял да, анын үйүндөгүлөрү да көп күн бою ошентип жан багышты.+
16 Жахаба Илияс пайгамбар аркылуу айткандай эле, чоң кумурадагы ун түгөнгөн жок, кичине кумурадагы май азайган жок.
17 Бир күнү үйдүн ээсинин, баягы аялдын, баласы катуу ооруп, өлүп калды.+
18 Аял Илияска: «Чыныгы Кудайдын кишиси, мени эмнеге азапка салдыңыз? Күнөөмдү эсиме салып, баламды өлтүргөнү келдиңиз беле?!» — деди.+
19 Илияс ага: «Балаңды мага бер»,— деди да, баланы энесинен алып, өзү жашаган үстүнкү бөлмөгө алып чыгып, төшөгүнө жаткырды.+
20 Анан Жахабага: «Оо, Жахаба Кудайым,+ мен үйүндө жашап жаткан бул жесир аялды да азапка саласыңбы? Эмнеге баласынын өлүп калышына жол бердиң?» — деди.
21 Анан баланы үч жолу кучактап, Жахабага: «Оо, Жахаба Кудайым, суранам, бул баланын өмүрүн кайрып бере көр»,— деп жалынды.
22 Жахаба анын үнүн угуп,+ баланы тирилтти.+
23 Илияс баланы үстүнкү бөлмөдөн алып түштү да, энесине берип: «Мына, уулуң тирилди»,— деди.+
24 Ошондо аял Илияска: «Эми сиздин Кудайдын кишиси экениңизди,+ Жахабанын сиз аркылуу айткан сөздөрүнүн баары чындык экенине көзүм жетти»,— деди.
